Matayo 1
1
I ndelwa ya Yesu
(Lk. 3:23-38)
1U wityatye we ndelwa ya Yesu Kilisito mono yali we ndelwa ya Dawudi, wa mu ndelo ya Abulahamu. Na awuno ahano wo wityatye we mbeyu yakwe vyono yinha.
2Abulahamu yakamulela Isaka, nayo Isaka yakamulela Yakobo, nayo Yakobo yakamulela Yuda ne wanduguze. 3Nayo Yuda yakamulela Pelezi na Zela (unyina yawo yali Tamali), nayo yuyo Pelezi yakamulela Hezeloni, Hezeloni nayo yakamulela Lami, 4nayo Lami yakamulela Aminadabu, Aminadabu nayo yakamulela Nasoni, nayo Nasoni, yakamulela Salimoni, 5Salimoni nayo yakamulela Bowazi (unyina wa Bowazi yacemagwa Lahabu). Nawo wa Bowazi na Lutu, wali wo walezi wa Obedi, nayo Obedi yakamulela Yese, 6nayo Yese yo yamulela u mutemi Dawudi. Nayo u mutemi Dawudi, yo yamulela Solomona, (unyina wa Solomona yali yo mugolece wa Uliya).
7Nayo Solomona yakamulela Lehobowamu, nayo Lehobowamu yakamulela Abiya, Abiya nayo yakamulela Asa, 8Asa yakamulela Yehoshafati, nayo Yehoshafati yakamulela Yolamu, na Yolamu nayo yakamulela Uziya, 9Uziya yakamulela Yotamu, nayo Yotamu yakamulela Ahazi, nayo Ahazi yakamulela Hezekiya. 10Nayo Hezekiya yakamulela Manase, Manase nayo yakamulela Amoni, nayo Amoni yakamulela Yosiya. 11Yosiya nayo yakamulela Yekoniya, ne wanduguze. Na mu vilo vivyo, vyali vyo vilo vyono i Wayahudi wahamizizwa no kutegulwa ku Babiloni.
12Ne Wayahudi waza kuwa wasolwa no kutegulwa ku Babiloni, baho Yekoniya yakamulela Salatiyeli, nayo Salatiyeli yakamulela Zelubabeli, 13nayo Zelubabeli yakamulela Abihudi, nayo Abihudi yakamulela Eliyakimu, Eliyakimu nayo yakamulela Azoli. 14Azoli nayo yakamulela Sadoki nayo Sadoki yakamulela Akimu, na Akimu nayo yakamulela Eliwudi. 15Eliwudi nayo yakamulela Eliyeza, Eliyeza yakamulela Matani, nayo Matani yakamuleta Yakobo. 16Yakobo yakamulela Yusufu, nayo Yusufu yo yali mulume wa Malyamu u nyina wa Yesu mono kacemagwa Kilisito.
17Ale, kwali na ndelo yikumi na yine, kuwulawilila ha Abulahamu sunga ha Dawudi, na kanyhi ndelo yikumi na yine, kuwulawila ha Dawudi sunga lono i Wayahudi wahamizizwa no kutegulwa ku Babiloni, na kanyhi ndelo yikumi na yine kuwulawilila lono i Wayahudi wasolelwa mateka no kutegulwa ku Babiloni sunga mu vilo vya Kilisito.
U wulelwe wa Yesu
(Lk. 2:1-7)
18Ale, no wulelwe wakwe Yesu Kilisito wali nhavi. U nyina Malyamu yali yakondya kubanywa na Yusufu. Ninga lono wali wakali si nekalana hamonga nha vyono yinha u mulume no mucekulu, Malyamu yakejela yena muda wono yawutuga kwe vilungo vyo Muhe Mono Yelile. 19Nayo Yusufu u mulume wakwe, vyono yali yo munhu we lingʼani, si yenda kumuleka Malyamu cagalanze, langa yasakaga yamulece cinyele. 20Ninga lono yali yakali yakuyihwesa inghani yiyo, malayika wo Muwaha yakamulawila mu ndoto, yakamulonjela, yakatya, “Gwe Yusufu go mwana wa Dawudi, wulece kogopa kumusola Malyamu yawe mugolece wako, hambi u muda wuwo wono yena nawo, nha kawutuga kwe vilungo vyo Muhe Mono Yelile. 21Nayo kolela mwana we cilume, nagwe komucemela ilitagwa lya Yesu, hambi u mwene nha yo kolowaponya iwanhu wakwe mu wubi wawo.”
22Na zizi zose zikejela, ho yifisilizwe inghani yiyilya yono u Muwaha yayilonga mu nzila ye wawizi, yono yatya, 23“Langa ta, u musindile kodinghula muda, nayo kolela u mwana we cilume, nayo kocemwa Emanuweli” (nhunizo yayo wo wutya “U Mulungu yali hamonga nase.”) 24Nayo Yusufu yaza kusinhuka mu zinhongo, yaketuma nha vyono yalonjelwa na yuyo Malayika yakamusola u mugolece wakwe, yakamutegula kukaya kwakwe. 25Ninga Yusufu si yamusejelela yaye, sunga Malyamu yaza kuwa yakondya kumulela u mwana we cilume. Nayo Yusufu yakamucemela ilitagwa lya Yesu.
اکنون انتخاب شده:
Matayo 1: GOG91
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Cigogo New Testament © Bible Society of Tanzania, 1991.
