Kut 8
8
1Bwanyima Ruhanga akaijuka Noa n'enyamaishwa zoona n'ebitungwa byona ebyabaire biri hamwe nawe omu meeri. Ruhanga atyo yaahuuhisa omuyaga ensi, amaizi gaatandika kwijururuka. 2Enshuro z'okuzimu n'emicungiro y'eiguru byaigarwa, enjura eyaabaire neegwa neeruga omu iguru yaazibirwa; 3amaizi gaaguma nigakyeiha aha nsi. Ku haahingwireho ebiro igana na makumi ataano, ago maizi gaatuuba. 4Mpaho omu kwezi kwa mushanju, aha kiro kya ikumi na mushanju eky'okwo kwezi, emeeri yaahitsya ekibunu aha nshozi za Araraati. 5Amaizi nago gaagumizamu nigakyeiha, okuhitsya omu kwezi kwa ikumi. Reero omu kwezi kwa ikumi, aha kiro ky'okubanza eky'okwo kwezi, emitwe y'enshozi yaareebwa.
6Ebiro makumi ana ku byahingwireho, Noa yaigura edirisa ry'emeeri ei yaakozire, 7yaatuma ekikoona, kyaguma nikikora oku n'oku, okuhitsya obu amaizi gaayomire ahansi. 8Bwanyima yaayohereza enkombe kureeba yaaba amaizi gaijururukire ahansi. 9Kwonka egyo nkombe tiyaabona h'okuteekama, yaagaruka ahu ari omu meeri, ahabw'okuba amaizi gakaba gakisyaraire omu nsi yoona. Atyo ashohoza omukono, agikwata, agitaasya omu meeri. 10Ku yaategyereizeho ebindi biro mushanju, yaagaruka yaagyohereza naagiiha omu meeri. 11Haza egyo nkombe yaagaruka ahu ari omu mwabazyo, eine omu kanwa akababi kabisi k'omuoliva aku yaacwire. Noa yaamanyiraho ku amaizi gaijururukire ahansi. 12Bwanyima yaategyerezaho ebindi biro mushanju, yaagaruka yaayohereza egyo nkombe, kwonka tiyaagira bu egarukire ahu ari.
13Omuri ogwo mwaka gwa magana mukaaga na gumwe, omu kwezi kw'okubanza, aha kiro ky'okubanza eky'okwo kwezi, amaizi gakooma ahansi, na Noa yaihaho ekyabaire kisangiire emeeri. Ku yaamagamagire, yaareeba ahansi hoomire.
14Omu kwezi kwa kabiri, aha kiro kya makumi abiri na mushanju eky'okwo kwezi, ensi yaayomooka.
Noa okuruga omu meeri
15Bwanyima Ruhanga akagira Noa ati: 16Shohora orugye omu meeri, iwe n'omukazi waawe na batabani baawe n'abakazi baabo. 17Shohoza hamwe naiwe ebintu byona ebihuriire, byona ebiine omubiri ebi obaire oine ebirikugurukisa amapapa, n'enyamaishwa, na ibara kintu ekirikugyendesa enda ekirikwekururura aha itaka bibone kuzaara munonga, bikanye, biijurirane omu nsi. 18Atyo Noa yaashohora n'abatabani n'omukazi we na bak'abatabani, 19kandi buri nyamaishwa, na buri kirikugyendesa enda, na buri kirikugurukisa amapapa, na ibara kintu ekirikugyenda, byaruga omu meeri biri omu nganda zaabyo.
20Bwanyima Noa yaayombekyera Nyakubaho eitambiro, yaatoorana omu nyamaishwa zoona ezitarikuzira n'omu birikugurukisa amapapa byona ebitarikuzira, yaabihongyera aha itambiro biri ebihongwa bicwekize. 21Nyakubaho ku yaakagire ekisooroora kyabyo ekirikumugwisa gye, yaagira omu mutima gwe ati: Tindikyeena nsi bundi ningitura omuntu. Manya ebiteekateeko by'omu mutima gw'omuntu biba bibi okwiha omu buto. Kandi tindigaruka kucwekyereza ekihangwa kyona ekiine amagara nk'oku ngizire. 22Obunaku bwona ensi ekiriho, eibiba n'eigyesha, embeho n'obutagatsi, omushana n'enjura, ekyanda n'eitumba, nyomushana na nyekiro, tibirigira bu bihwaireho.
Ruhanga okuha Noa endagaano
اکنون انتخاب شده:
Kut 8: RKK2008
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
The Bible with Apocrypha in Runyankore-Rukiga, new revised joint translation © The Bible Society of Uganda, 2008.