Kut 5
5
1Eki n'ekitabo ky'oruzaaro rwa Adamu. Obu Ruhanga yaahanga omuntu, akamuhanga naashushana nawe. 2Akabahanga bari omushaija n'omukazi; yaabaha omugisha, yaabeeta eiziina Muntu obu baahangwa. 3Adamu ku yaaherize kuhitsya emyaka igana na makumi ashatu, yaazaara omwana w'omwojo orikumushusha, yaamweta Seeti. 4Emyaka ei Adamu yaamazire aherize kuzaara Seeti ni magana munaana; kandi akazaara abandi batabani n'abahara. 5Bityo ebiro ebi Adamu yaamazire akihuriire byaba emyaka magana mwenda na makumi ashatu; atyo yaafa.
6Seeti ku yaahikize emyaka igana n'etaano, yaazaara Enosi. 7Seeti ogwo ku yaaherize kuzaara Enosi, yaamara emyaka magana munaana na mushanju; kandi akazaara abandi batabani n'abahara. 8Bityo ebiro ebi Seeti yaamazire akihuriire byaba emyaka magana mwenda na ikumi n'ebiri; atyo yaafa. 9Enosi akazaara Kenani, yaaherize kuhitsya emyaka makumi mwenda. 10Enosi ogwo, ku yaaherize kuzaara Kenani, yaamara emyaka magana munaana na ikumi n'etaano; kandi akazaana abandi batabani n'abahara. 11Bityo ebiro bya Enosi byona byaba emyaka magana mwenda n'etaano; atyo yaafa.
12Kenani, ku yaamazire emyaka makumi mushanju y'obukuru, yaazaara Mahaalaleli. 13Kenani ogwo akamara emyaka magana munaana na makumi ana, Mahaalaleli yaaherize kuzaarwa, kandi akazaara abandi batabani n'abahara. 14Bityo ebiro bya Kenani byona byaba emyaka magana mwenda na ikumi; atyo yaafa.
15Mahaalaleli, ku yaahikize emyaka makumi mukaaga n'etaano, yaazaara Yaredi. 16Mahaalaleli ogwo, Yaredi ku yaaherize kuzaarwa, yaamara emyaka magana munaana na makumi ashatu ei yaazaariiremu abandi batabani n'abahara. 17Bityo ebiro bya Mahaalaleli byona byaba emyaka magana munaana na makumi mwenda n'etaano; atyo yaafa.
18Yaredi, ku yaahikize emyaka igana na makumi mukaaga n'ebiri, yaazaara Enoka. 19Ku yaamazire kuzaara Enoka, yaamara emyaka magana munaana ei yaazaariiremu abandi batabani n'abahara. 20Bityo ebiro bya Yaredi byona byaba emyaka magana mwenda na makumi mukaaga n'ebiri; atyo yaafa.
21Enoka, ku yaahikize emyaka y'obukuru makumi mukaaga n'etaano, yaazaara Metuusela. 22Enoka, ku yaaherize kuzaara Metuusela, yaaguma akwataniise na Ruhanga, kandi yaamara emyaka magana ashatu, ei yaazaariiremu abandi batabani n'abahara. 23Bityo ebiro bya Enoka byona byaba emyaka magana ashatu na makumi mukaaga n'etaano. 24Enoka akatuura na Ruhanga, bwanyima yaabura, ahabw'okuba Ruhanga akamutwara.
25Metuusela, ku yaahikize emyaka igana na makumi munaana na mushanju, yaazaara Lameki. 26Metuusela ogwo, ku yaaherize kuzaara Lameki, yaamara emyaka magana mushanju na makumi munaana n'ebiri ei yaazaariiremu abandi batabani n'abahara. 27Bityo ebiro bya Metuusela byona byaba emyaka magana mwenda na makumi mukaaga na mwenda; atyo yaafa.
28Lameki nawe, ku yaahikize emyaka igana na makumi munaana n'ebiri, yaazaara omutabani, 29yaamweta eiziina Noa, naagira ati: ogu niwe arituruhuura omu mirimo yaitu, n'omu kwehenenga kwaitu omuri egi nsi ei Nyakubaho yaakyeenire. 30Lameki, ku yaaherize kuzaara Noa, yaamara emyaka magana ataano na makumi mwenda n'etaano, ei yaazaariiremu abandi batabani n'abahara. 31Emyaka yoona ei Lameki yaamazire, yaahika magana mushanju na makumi mushanju na mushanju, yaafa.
32Noa nawe, ku yaaherize kuhitsya emyaka magana ataano y'obukuru, yaazaara Seemu na Haamu na Yafeeti.
Abaana ba Ruhanga okushwera bahara b'abantu
اکنون انتخاب شده:
Kut 5: RKK2008
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
The Bible with Apocrypha in Runyankore-Rukiga, new revised joint translation © The Bible Society of Uganda, 2008.