MATEO 6
6
Aashichaato tödöödö jäcä Jesuuquidiito nowaanoma’jödö
1“Äädai’chätääcä; soto wwäiñe adheenedööcomo wetä mma männötäi’che aashichaato. Yääje tödööa’jäcä äwwäiñe adheejemaatäiñe’da na’de Oomotoncomo caju ñano. 2Yääje yeijäcä wentumja’como wwäiñe utuudawä äwwä, maneecadeeme’joi’che. Ñanno yääjönö wa’co’como wäänejoodö naatoodöje’daane eichäcä. Tönwanno we’jummatoojo taca, jata antai mmaja, töwääcadeeme’jo weneeneto wentumja’como i’wa’tädaawäiñe töwwäiñe. Mädä tönnöe weneeneto aashicha soto we’deuwödööcomo wetä yaawä töjääcäiñe. Chäänönge yääje wä’döa äwwäiñe, mädä que mma täjeema naato. 3Amäädä mmaane wentumja’como wwäiñe utuudawä äwwä, aweichacoono wwä’jödöödä maneecammai’che. 4Tacaade’da mmaane äntudu eijai ña. Yaawä Oomo caju ñano, ñäädä äänejöönö eneenei, adheejema’de.
Wanaadi wwä wa’deunä jäcä Jesuuquidiito nowaanoma’jödö
5“Wanaadi wwä awa’deuwödaawäiñe ñanno yääjönö wa’co’como wäänejoodö naatoodöje’daane eichäcä. Tönwanno yaacö’comje Wanaadi wwä töwa’deuwödööcomo jiidi, we’jummatoojo taca, jödo’na mmaja, täneedöcoomo wetä soto wwäiñe. Chäänönge yääje wä’döa äwwäiñe, mädä que mma täjeema naato tönwanno. 6Amäädä mmaane Wanaadi wwä awa’deuwödaawä, adhe’saca odhoomoncä. Mönaatata a’dudu’jo tacaade’da adha’deucä’de Oomo wwä, ñäädä äjääcäjeene aweichö ajaadä weneenedö. Yaawä Oomo, ñäädä äänejöönö eneenei, adheejema’de.
7“Awa’deuwödaawäiñe iiña mmädä’da adha’deutäcä. Mädääje tönnöe weneeneto ñanno Wanaadi dhowaanojöncomo. Tönwanno necaanö’aato jooje töwa’deuwödööcomo que mma Wanaadi wwä tätaatäiñe. 8Ñanno wei’yejeiñe meichäi’che änwanno. Oomotoncomo dhowaanäcä na äwwäiñe a’cato, töwwä e’catäädö owaajodä dea. 9Edääjeene Wanaadi wwä adha’deutäcä’de:
Jaaja caju ñano,
Töwaanadiiyöcoomoje adhe’tä’ña’to soto;
10töcaajichaanaichomooje ayöödö’ña’to.
Ämjummadö woije nödö’ña’to edä nono de’woncomo, caju ñancomo tönnöe weneenetoodöje mmaja.
11Ñaa ewanshiñö änu’cä edä anootoi’chädö awä.
12Ñaa cone’nadiiyö encwanno’jocä, ñaa mmaja töjääcä conemjönö tödöödö tönencwanno’jo ñaa weneenedööje mmaja.
13Ñaa mäiñunaacajoi’che; tösancwajoone ñaa sancwajoocä conemjönö jonno.
Ñäädä mma amäädä Cajiichaana Jäduujato, aashichato wa’deuto’mato mmaja, yeichöödäje. Amén; quee caichäcä’de.
14“Änwanno äwwäiñe encwannä’ja’jäcä conemjönö äjääcäiñe ajimmotoncomo nödöödö, ocoone’nadiiyöcoomo nencwannä’ja’dede yaawä Oomotoncomo caju ñano. 15Dha’da ajimmotoncomo nödöödö anencwanno’jo’da aweiya’comjäcä, ocoone’nadiiyöcoomo anencwanno’jo’da mmaja na’dede Oomotoncomo.
Wäänemaanä jäcä Jesuuquidiito nowaanoma’jödö
16“Äwäänemaadawäiñe yäänemaadö nönge mma määnejootäi’che, ñanno yääjönö wa’co’como wäänejoodö naatoodöje’daane. Tönwanno ecoonecaajätö’da weneeneto yaawä, soto wwäiñe täneedöcoomo wetä mmädä töwäänemaadöcoomoje yeichö. Chäänönge yääje wä’döa äwwäiñe, mädä que mma täjeema naato tönwanno. 17Amäädä mmaane äwäänemaadawä töwäätäichaane ätäichacä’de; töweeconeecajä’eene adheeconeecajä’cä, 18soto wwäiñe ääne’da meiye wäänemaanäje aweichö. Oomo caju ñano mma dhowaanäcä na’de, ñäädä äjääcäjeene aweichö ajaadä weneenedö; töwö adheejema’de.
Caju ña mösooma i’jummadö
19“Mösooma mani’jummatäi edä nono de’wä. Eetä cödhaucwä tönäu’cwe, töcaamadaata mmaja, tämeena’como töneememme’que mmaja. 20Caju ñaane änsomaadöcoomo i’jummatääcä. Iiña änäu’cwa’da cödhaucwä, chaamadaata’da mmaja, tämeena’como aneememmecö’da mmaja. 21Tönsomaadö weichö dö’tä tö’tajä’nä töweiye nai.
Soto dhawaadö
22“Soto enuudu na yeichö dhawaadöje. Aashicha adheenudu yeichawä aweijotä yaawä. 23Yaawääne’ adheenudu cone’da yeiya’jäcä, tööjano’taca ma amäädä yaawä. Yää adhaawadööjato’jödö änweijo’da yeiya’jäcä tööje äwwä eijai ña yaawä.
Jödaata ijummadö, Wanaadi ijummadö mmaja
24“Aacä tädhaajä tödööjai’cha weiña nai. Yääje tödööa’jäcä tooni mma ijummajai ña ñäädä yaawä, yeichacoono ämjumma’da mma. Yeichacoono jadä aashicha etaadawa’cajoojai ña; yeichacoono ’quene chiiñeme’jai. Mädääje mmaja änwanno, a’nädäncädä ijummajai’cha maato, Wanaadi mmaja, mösooma mmaja.
Wanaadi tönnacoomo töneedai’chä yeichö
25“Yääje yeijäcä yääje wä’döa äwwäiñe: Eetä aweichöcoomo jäcä mma mätäncano’tätäi’che, yää adheewanshiñööcomo ejoodödö jäcä, owoocödööcomo jäcä mmaja, owoomöcoomo jäcä mmaja. ¿Tujunne’cä jönca nai aweichöcoomo, äwanshi e’jodhe’cä? Adheejöcoomo tujunne’cä mmaja, womö e’jodhe’cä. 26Tadiiñaamo naatoodö naane’, tönaichöque’da, äämichö’da mmaja, tuduucomo ñeecauto’como ’je’da mmaja. Yääje yeichaame Oomotoncomo caju ñano töneewanshichä weneeneto ñanno. Änwanno tujunne’cä jeene maato chäwwä, ñanno e’jodhe’cä jeene. 27¿Änääcö adhantawäiñe tötö’tajäätödö woije mma tooni meetodo annai aatö’nä’jai ñai?
28“ ¿Ane’cotoojo owoomöcoomo ejoodödö tönencano’tä määnetääne? Chääjödö woi awoono naadö naane’; töwö töwa’ta, etaadawa’cajo’da töweichaame, wadeecu ane’joi’cha töweichaame mmaja. 29Yääje wä’döa äwwäiñe, ñäädä cajiichaana Saadomón womö edä chääjödö wa’cä’da cönä’jaacä iiñataaje yeichö, jooje tönsomaaque yeichaame töwö Saadomón. 30Jötaadi o’cäi tödhau’cwaamöje mma yeichaame Wanaadi woi töniiñataama weneene. Töwaacö’je änwanno adheedai’chäjaiñe na, änwanno aneecanö’jöncomoiche. 31Yääje yeijäcä aaquiñu’tä’da eichäcä. Edääje mä’dötäi’che: “ ¿Ane’cäämö jäcuinche queichantäi’che? ¿Ane’cäämö quentantäi’che? ¿Äsha cöwoomöcoomo queejodöötantäi’che?” quee mä’dötäi’che. 32Yää nöngato jäcä töwäätancano’tä weneeneto ñanno Wanaadi dhowaanojöncomo. Dha’da änwanno; töweiye Oomotoncomo caju ñano. Töwö dhowaanäcä tameedä yääcomo äwwäiñe tujunne yeichö. 33Wanaadi acaajichaanaichomooje tödöödö jäcääne ätäncano’tätääcä, töwö yoije tödöödö jäcä mmaja. Tameedä yääcomo äwwäiñe nä’tua’de yaawä. 34Yääje yeijäcä mätäncano’tätäi’che jenamma aweicho’como jäcä. Jenammade’ ätö’tajä’aatoone’ jenamma aweicho’como jäcä. Chääwa’cä mma töweiye nai conemjönö anooto waadäi.
اکنون انتخاب شده:
MATEO 6: MCH
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© 2014 Reservados todos los derechos
