Juan 7
7
Jesús bä fääshä ebänö
a bejedi bufino lä mlajei tä a̦
1Ö̦jö tä cublou waiquilayono wei ja, Calilea jamö Jesús a juu cuaama. Judio bänö a shäö bufi doblao waiquiomaje cudeenö, Judea jamö a juu bufionomi.
2Bei. Yano bä wai jamö bä cublamou däjä judio bä showadi iyaö ca̦i lä co̦camou wei, tä ajeoma. 3Ö̦jö cudeenö, Jesús bä fääshä ebänö abinaja a nowa tamaje.
—Eja wa cudio mlai ja, Judea jamö a yai da ju, ö̦jamö cafä nija bä nocao bufi lä doblao wei bä lä cuinö wa dablabeje. Wa lä cuaaö wei tä ca̦i möbeje. 4Wawädowä bä nö ö̦jöböamou bufi lä doblao wei bä lä cui, bä cuaaö ja̦too malä mlai. Wa jo̦wa lä cuaaö wei wa tä taö ja, yanowamö täbä nija a da damolaludu —a nowa tamaje.
5Bä fääshä ebä ma cuinö a wa̦ bejedi bufino malä mlajei. 6Abinaja Jesúsnö bä nowa tama.
—Cafä wamacö juu bufi doblao däjä, wamacö juu showadaobä wamacö ma cule, ö̦jamö lä camiyä ya jubä tä cuami showawä. 7Yanowamö bänö cafä wamacö nofi wa̦libou dao ma mlajei ma cui, camiyänö ya täbä a̦fa dobloimi wäyäö yalo, wale nofi yai li wa̦libouje. 8Bä iyaö ca̦i co̦camobä jamö, cafä bä da ju. Fei däjä camiyä ya nia juimi. Ya nia yai lä juu wei tä cua showaa malä mlai —bä nowa tama.
9Einaja bä nowa fa talönö, Calilea jamö yanöcöwä a cuo juoma.
Bä iyaö ca̦i co̦camobä jamö
Jesús a juu lä juono wei tä a̦
10Ö̦jö ma cui, bä iyaö ca̦i co̦camobä jamö bä fääshä ebä aa waiquilayono wei ja, wawädowä a juu mlai ja, ja̦towä Jesús a nodia jälayoma. 11Bä iyaö ca̦i co̦camobä jamö judio bänö a dayäalajenö, a wa̦liadalaö cuaamaje.
—¿Wedi jamö ö̦jö lä bei a li? —bä cuma.
12Bluca bänö a wa̦fa wajado wayoaö cuaamaje.
—A dodijaö —ai bä cuma.
—Ma. Täbä mölamaö dicoo talei —ai bei bä cuu mö feduoma.
13Ö̦jö ma cui, judio bada bä nö quili fa tajenö, wawädowä a wa̦fa wayoanomije.
14Bä iyaö ca̦i lä co̦camou wei bä nö dedejeblou waiquio däjä, Jesús a aa fa jälönö, Yai Bada etä yafi jamö a co̦blou jälayoma. A co̦blou fa jälonö, Yai Bada etä a̦ ja bä yömölama. 15A wa̦ lä macocoablalou wei a wa̦ ja, judio bä bufi shädayaimoma. Abinaja bä cuma.
—¿Wedinaja dodijiwä? Bada bä nija ei a damamono ma mlai ma cui, ¡tä nofi daö dodijiwä yai!—bä cuma.
16Ö̦jö däjä, abinaja Jesúsnö bä nowa tama.
—Ya tä a̦ lä wäyäö wei, camiyä ya wa̦ bädawämi. Wale lä shömöleno wei, ö̦jö lä ya wa̦no li wäyäö. 17¿Ö̦jö tawä? Yai Bada tänö bä taamaö lä bufii wei tä ja bä lä ojodao wei bä lä cuinö etä a̦ nö nia ö̦jöböaöje. Camiyä ya bufi cuu lä bädao weinaja ya tä a̦ wäyäö dicoo ja, wale nia ca̦i daöje. 18Cama bä bufi cuu lä bädao weinaja tä a̦ lä wäyäö wejei bä lä cui, cama bä a̦fa dodijidawä nia fa tamamonö bä a̦ li bädawä. Ö̦jö ma cui, a lä shömöleno wei a nö nia dodijidawä lä ö̦jöböamaö wei a lä cui, ö̦jö a shino yai bejedimou. A jolemou daomi.
19’Yai Bada tänö tä tamaö lä bufii wei, cafä wamacö nija Moisesinö tä a̦ jöböquema, ¿ö̦jö tawä? —a cuma—. Tä a̦ ma jöböqueno wei ma cui, moli ai wamacö ma cuinö wama etä a̦ nofi cadidiboimi. ¿Wedi tabä bei wamale shäö bufi li doblao, ö̦jö lä?
20Abinaja bä cuma.
—¡Jolemou dijä! Fecula wa tabou yalo, wa wa̦ li faö mojodi. ¿Wedi jamö a lä cuinö wa li shäö bufi doblao? —bä cuma.
21Abinaja Jesúsnö bä nowa tama.
—Täbä yanöcöobä tä mö jalu sábado jamö, tä nö lä quilijii moli ya tä wawämaö ja, wamacö bufi bluca wedinajamou. 22Wamale a̦fa ma taö wei ma cui, inaja showawä cafä wamacö malä cuaaö wei. Wamacö mosi sicö lä joyamou wei tä lä cui, Moisesinö tä nabä li shömöquema, ¿ö̦jö tawä? Ijilufä bä mosi sicö nia yai lä joyamou wei tä cublou däjä, täbä yanöcöobä tä mö jalu ma cui ja, wama bä mosi sicö joyaö fe yadio. ¿Ö̦jö tawä? Moisesinö tä jaba tamano ma mlai ma cui, bämacö nö badabö ai a jaba lä bälöono wei a lä cuinö, ö̦jönö tä yai jaba tamaö bufima.
23’Moisesinö tä tamaö lä bufii wei tä ja wamacö cadidobä, täbä yanöcöobä tä mö jalu ma cui ja, ijilufä wama bä mosi sicö joyaö dao. Inaja wamacö ma cuaaö däjä ma cui, ¿wedi tabä ö̦jö tä mö jalu jamö ai ya jalomaö ja, camiyä nija bei wamacö shino li jushudou? 24Wama täbä jömaö däjä, bä bufi yai da dayäo. Wamacö bejedimolanö bä yai jömaö da cadidioje. Inaja tä mömou cuwä ma cui, wamacö bufi nia lobe cuu jaödaomi —bä nowa tama.
Jesús nija bä bufi lä
wedinajamono wei tä a̦
25Wawädowä Jesúsnö bä damaö cudeenö, abinaja Jelusaleteli ai bä cuma.
—A shäö bufi lä doblao wejei, ¿fei bei ami? 26Eja wawädowä a wa̦ ma fale ma cui, a wa̦ wasöimije. “Yai Bada tänö a shömabä a lä yaileno wei a lä cui, ö̦jö lä a waiquiwä”, bada bänö ¿fei bei a nofi tabou cadidia da culajenö? 27Ö̦jö ma cui, fei a lä cui, cama bäma ebä mashi malä daö wei. Yai Bada tänö a shömabä a lä yaileno wei a yai wawäblou cadidio däjä, a nia daimije —bä cuma.
28Inaja bä cuma yalo, Yai Bada etä yafi jamö Jesúsnö bä damaö ja, a wa̦ i̦cali fama. Abinaja a cuma.
—¿Camiyä wamale daö da culanö? Camiyä ma cui, ya jaba lä cuono wei jamö wama tä daimi. Ö̦jö ma cui, camiyä ya juu bufi doblao tänö ya juu bädaonomi. Wale lä shömöleno wei a lä cui a bejedimou. Ö̦jö wama a ca̦i daimi. 29Camiyänö ya shino daö lä cule. Cama a lä culadi jamö ya cuoma ya malä waloqueno wei. Ö̦jönö wale shömölema —a cuma.
30Inaja a cuu yalo, a nia juwäama ma cujei, a nia yai lä shämou wei etä cuonomi showawä yalo, bä imicö queonomi. 31Ö̦jö ma cui, ai bä bluca lä cuinö a wa̦ bejedi bufia fe yadilemaje. Abinaja bä cuma.
—Yai Bada tänö a shömabä a lä yaileno wei a lä cui, fei a waiquiwä. ¿Wedi tabä ai bäma tä nö li dabou nomöjöquei? Yai Bada e nö ö̦jöböamobä, fei a lä cuinö, tä nö lä quilijii tä bluca wawämaö malä waiquii—bä cuma.
32Jesús a wa̦fa wajado lä wayoaö wejei, faliseo bä bada lä cuinö bä a̦ fa ji̦liläjenö, cama bä ma cuinö, nofi bäyäalewä blowäjäwä bä ma cuinö, Yai Bada etä yafi jamö bä bada lä läono wei bä nija, Jesús a juwäamaö bufimaje.
33Ö̦jö däjä, judio bä nija abinaja Jesús a cuma.
—Cafä wamacö nija ya nö dedejedou fa bälonö, wale lä shömöleno wei nijamö ya nia juu co̦o. 34Ö̦jö däjä, wamale nia ma dayäö wei ma cui, wamale nia dablaimi. Ya nia lä cuo wei jamö, wamacö juu daomi —a cuma.
35Judio bä wa̦liyou ja, abinaja bä cuma.
—Fei a lä cui, ¿wedi jamö a nia li juu fa nomöjöonö, a wa̦ li? Bei bäma a nia jo̦wa dablaö co̦daaimi. Clesiateli bä nijamö, ai bämacö judio lä coyocole bä nijamö, ¿ö̦jamö a nia juu tawä, shomi täbä nija tä a̦ li wäyäö nomöjöobä? 36“Wamale nia ma dayäö wei ma cui, wamale nia dablaimi”, a cuma. “Ya nia lä cuo wei jamö, wamacö juu daomi”, a ca̦i cuma. ¿Ö̦jö tawä? ¿Wedinaja a bufi yai fa cunö, bei a wa̦ li cuo cufe? —bä cuma.
Ba̦limiblamamodima u
a̦fa lä wäyäno wei tä a̦
37Bä iyaö waicou lä bufiono wei däjä, bä yai co̦camobä jamö, Jesús wawädowä a ubladaliyoma. A fa ubladalunö, a wa̦ i̦cali faö ja, abinaja a cuma.
—Ai bä amishaö bädao ja, camiyä nija bä yai fa icubonö, bä amishi co̦oyolubä. 38Camiyä wale a̦ bejedi lä bufii wejei bä lä cui, bei bä bufi jamö, ba̦limiblamamodima u fa bäda bädamonö u nia caläö cuaaö, Yai Bada etä a̦ lä cuu weinaja showawä —a cuma.
39¿Ö̦jö tawä? Cama a wa̦ bejedi lä bufii wejei bä lä cui nija, Yai Bada tä Bufi nia lä jöböamou wei tä a̦fa yai tama. Fedu jamö a doblaodayobä a ösönomi showao yalo, a Bufi jöböamou showaono malä mlai.
Jesús a wa̦ ja bä bufi judio
lä shelelelaliyono wei tä a̦
40Jesús a wa̦ ji̦liaöje däjä, abinaja ai bä cuma.
—Yai Bada bäma a wa̦no wäyälewä nö lä dabole, fei a waiquiwä —ai bä cuma.
41Ai bä lä cui, abinaja bä cuma.
—Yai Bada tänö a shömabä a lä yaileno wei, fei ö̦jö a waiquiwä —ai bä cuu mö feduoma.
Ö̦jö ma cui, ai bä mö feduwä lä cui, abinaja ö̦jö bä li cuma.
—A shömabä a lä yaileno wei a lä cui, Calilea jamö a oshe nia wawäblono malä mlai. 42Yai Bada etä a̦ oni cuu malä wawädoo wei. A shömabä a lä yaileno wei a lä cui, bada tä David a nodiwä nia cuo. Belenateli bä nijamö a nia oshe tablamou, David a oshe lä cuono wei jamö showawä, ¿ö̦jö tawä? —bä cuma.
43Inaja bä a̦ cuablalou ja, Jesús a wa̦ ja, bä bufi bluca sheleleolaliyoma. 44Ai bä lä cuinö a juwäamaö bufi ma doblaono wejei ma cui, moli ma cui imicö queo bädaonomi.
Judio bada bänö Jesús a
bejedi bufino lä mlajei tä a̦
45Ö̦jö däjä, Jesús a juwäabeje, bada bä lä shömöleno wejei bä lä cui, shinoco bä waloa co̦quema. Nofi bäyäalewä bä lä blowäjäi bä ma cuinö, faliseo bä ma cuinö, abinaja ö̦jö bä nowa tamaje.
—¿Wedi tabä bei wama a ca̦i li juu showadaonomi? —bä nowa tamaje.
46Bä lä shömöleno wejei bä bada lä cui, abinaja bä cuma.
—Quiji a lä cui, a wa̦ yai walalawä fe balojowä. Ö̦jö a wa̦ yai ji̦limamou lä culenaja, yedu ja ma cui, fei däjä ma cui, ai bä a̦ ji̦limamou cuwämi waiquiwä —bä cuma.
47Abinaja faliseo bä bada cuu nomöjöoma.
—Cafä wamacö ma cui, ¿ö̦jö nija wamacö nia ca̦i luluamou dicoo tawä? 48Bada ai bä ma cuinö, faliseo ai yamacö ma cuinö, ¿ö̦jö yama a wa̦ bejedi lä bufii wei, wama tä a̦ ji̦libou da culanö, wama a bufii mö feduobä? 49Ö̦jö ma cui, fei bä lä co̦camole bänö Moisesi etä a̦ daö fa mlacujenö, bä li lulamou. Yai Bada nija bä waimobä cäbä —faliseo bä bada cuma.
50Ö̦jö däjä, cama faliseo ai a bada lä cui, a wa̦ fama, Nicodemo a wa̦fa lä cuono wei, Jesús nija a jaba icua fe lä jaluqueno wei a lä cui. Cama ai ebä nija abinaja a cuma.
51—Ma, inaja mlai. Inaja Moisesi bäma etä a̦ lä tabole tä a̦ cuimi. Cama bäma a wa̦ ji̦liaö balöa mlai ja, a yai lä cuaaö wei bäma tä daö mlalanö, bäma a nia jömaö showadaomi —a cuma.
52Abinaja cama nija bä cuu nomöjöoma.
—¿Cafä Calileateli wa mö fedua tawä? Yai Bada etä a̦ oni da mö. Calilea jamö Yai Bada a wa̦no wäyälewä a nia lä wawäblou wei, tä a̦fa wäyämoimi —bä cuma.
53Ö̦jö däjä, cama bä yafibö jamö bä bluca co̦o co̦omobodayoma.
اکنون انتخاب شده:
Juan 7: GUU
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
©2012, All Rights Reserved
