Juan 5
5
Mau uca casö jamö a
jalili lä jalomaleno wei tä a̦
1Ö̦jö tä cublou waiquilayono wei ja, Jelusale jamö judio bä nia iyaö ca̦i fa co̦camonö, ö̦jamö Jesús a alayoma. 2¿Ö̦jö tawä? Jelusaleteli bä shabonobö jamö, oweja yoca lä cule jamö mau uca cuoma. Ebleo bä caficö a̦ ja, Besada uca a̦fa jilabouje. Ö̦jö u casö jamö, yano bloque 5 maloco bä fe fa̦yooma. 3Ö̦jö bä yano jamö, bä lä wa̦lidii bä bluca blaoma. Ai bä jubäböoma, ai bä mata wa̦lidioma, ai bä ya̦toliböoma. 4¿Ö̦jö tawä? Yai Bada etä a̦jele fa itoblaayonö, u qui̦yaamaö ja, a jalili itoo lä balöo wei a lä cui, bä jaloobloma.
5Bei. Ö̦jamö lä ai a jalili nö dedeaö däjä, lasha 38 a faa ma waiquimaleno wei ma cui, a jalili cuo showaoma. 6Jesúsnö ö̦jö a dablaö däjä, a jalili blao nö lä dedeano wei tä daö waiquioma yalo, a wa̦lima.
—¿Wa jalou bufi doblaa cule? —e cuma.
7Abinaja a jalili cuma.
—Tä a̦ wäyäle. Mau u qui̦yaamaö däjä, lobe wale itoblamabä a cuami. Ya nö icublobimi. Ya obisai juu showai ja, ai bä shino itou balöo dicoo —a cuma.
8Abinaja Jesúsnö a nowa tama.
—Bei. A da ubladalu. Wa lä maquele wa täcö fa jocälänö, täcö cai̦ co̦jamöö da co̦o —a nowa tama.
9A jaloa fa showadalunö, a lä maqueono wei täcö fa jocälänö, täcö ca̦i co̦layoma. ¿Ö̦jö tawä? Täbä yanöcöobä tä mö jalu sábado cuoma. 10Ö̦jö cudeenö, abinaja judio bä cuma, a lä jalolayono wei a nija.
—Bämacö yanöcöobä tä mö jalu. Wa lä maqueono wei wa täcö ca̦i jubä tämi. Tä a̦ läa —bä cuma.
11Ö̦jö ma cui, abinaja a cuma.
—Wale lä jalomaleno wei a lä cuinö, abinaja wale nowa tama. “Wa lä maquele wa täcö fa jocälänö, täcö ca̦i co̦jamöö da co̦o”, wale nowa tama —a cuma.
12Abinaja faliseo bä bada cuma.
—Wa täcö fa jocälänö wa täcö ca̦i co̦jamöbä, ¿wedinö bei wa li shömölei cufe? —bä cuma.
13¿Ö̦jö tawä? A lä jalolayono wei a lä cuinö, Jesús a daö fa mlacunö a danomi showawä. A ca̦i dablaö co̦daanomi. Täbä bluca lä mashicono wei jamö, a nofi mojodudou showalayoma.
14Ö̦jö tä cublou fa waiquilonö, a lä jalomaleno wei a lä cui, Yai Bada etä yafi jamö Jesúsnö a daa fa co̦lalönö, e a̦ fama. Abinaja e cuma.
—Fei däjä wa demi, ¿ö̦jö tawä? Wa̦lidiwä tä taö co̦daa dijä, wa nö yai bleaaö fe balojoa dicoicu —a cuma.
15Ö̦jö däjä, a lä jalomaleno wei a lä cui, judio bada bä nijamö a fa alunö, Jesús a wa̦fa wäyäö showadaoma.
—Wale lä jalomaleno wei, ö̦jö Jesús a waiquiwä —a cuma.
16Täbä yanöcöobä tä mö jalu jamö Jesúsnö a jalomalema yalo, judio bada bänö a bäyäblabeje a nabä jumaje. 17Ö̦jö ma cui Jesús a nofi bäyäo ja, abinaja bä nowa tama.
—Fayä a yanöcöblao mlai ja, showadi täbä bayeliblaö ojodao. Inaja showawä, camiyä ya ca̦i cuaaö mö fedua —bä nowa tama.
18Täbä yanöcöobä tä mö sábado jalu ma cui ja a wasöomi cudeenö, Jesús a shäö bufi doblao waiquiomaje. Yai Bada nija a ca̦i Fö̦ömou fa cadidionö, bä jushuo balaö showadaoma, Yai Bada a sho cama cäcöbö a̦fa wäyämoma yalo.
Yai Bada tänö Jesús a nö
lä wa̦lojomabono wei tä a̦
19Abinaja Jesúsnö bä nowa tama.
—Cafä wamacö nija ei ya wa̦ lä cui, bejedi lä ya wa̦. Yai Bada bei Ijilubö ya e lä cui, camiyä ya cuaaö bufi lä doblao wei tänö ya cuaaimi. Fayä a lä cuaaö wei ya tä möö yalo, inaja camiyä ya e ca̦i cuaaö mö fedua. Fayänö tä lä taö wei, bä Ijilubö ya enö ya tä cai̦ taö mö fedua. ¿Ö̦jö tawä?
20’Fayänö bä Ijilubö wale nofimaö dodijia yalo, a lä cuaaö wei camiyä nija tä bluca wawämaö. Ya lä cuaafenaja bädawä mlai, tä yai lä lojode wei tä nia wawämaö cuaaö. Camiyä nija tä fa wawämalönö, inaja showawä, yanowamö wamacö nija ya etä nia wawämaö cuo mö feduo, wamacö bufi yai shädayaimobä. 21Bä lä nomaö wei, Fayänö bä demi jocädamaö lä co̦o weinaja, inaja showawä, bä Ijilubö ya e cuaaö mö feduo. Ya bä demi jocädamö lä ojode wei, ya bä li jocädamaö.
22’¿Ö̦jö tawä? —Jesús a cuma—. Fayänö yanowamö täbä dobloimi jömaimi. Bä Ijilubö ya enö, ya täbä dobloimi jömabä wale yai tablamalema, 23wale nofi dodijidawä tabobeje. Fayä Yai Bada a lä cui, a nofi dodijidawä lä tabou wejeinaja, bä Ijilubö ya e ma cui wale nofi ca̦i tabou mö feduobeje. Bä Ijilubö wale nofi dodijidawä tabou lä mlajeinaja, Fayä a ma cui inaja showawä a nofi ca̦i taboimi mö feduweje, wale lä shömöleno wei a lä cui.
24’Cafä wamacö nija ei ya wa̦ lä cui, bejedi lä ya wa̦—a cuma—. Wale a̦ fa ji̦liajenö, wale lä shömöleno wei a wa̦ bejedi lä bufii wejei bä lä cui, ba̦limi bä cuobä bä li waiquiwä. Bä dobloimi jömamobä bämi. Ö̦jö bä lä cui, bä nomabä bä ma cuono wei ma cui, bä ba̦limiblou nomöjöa lä cule.
25’Cafä wamacö nija ei ya wa̦ lä cui, bejedi lä ya wa̦ —a cuma—. Abinaja tä nia cuo. Tä cua waiquia a lä cule. Bufi nomawä bä lä cuinö, camiyä Yai Bada bei Ijilubö wale a̦ nia ji̦liaöje. Wale a̦ fa ji̦liläjenö, ba̦limi bä nia cuo. 26Ba̦limi bä cuobä Fayänö bä lä taamaö weinaja, bei Ijilubö ya e ma cui, inaja showawä ya e ca̦i cuaaö mö feduobä wale malä tablamaleno wei. 27Ya täbä dobloimi jömabä wale ca̦i lämabou, ya lä yanowamöblaleyoluno wei ya waiquiwä cudeenö.
28’Camiyä ei ya wa̦ lä cui ja, bä bufi mla dijä —a cuma—. Abinaja tä nia malä cublou wei. Bä lä nomalaliyono wei bä bluca lä cuinö, wale a̦ fa ji̦liläjenö, 29bä demi nia jocäcou. Demi bä cuo däjä, bä lä bejedimono wei bä lä cui, ba̦limi bä cuobä bä nia jocäcou. ¿Ö̦jö tawä? Wa̦lidiwä talewä bä lä cui, bä dobloimi jömamobä, bä nia ca̦i cama jocäcou mö feduo, bä nö yai bleaaö nomöjöobä.
Jesús a nö bejedi nia
lä ö̦jöböamono wei tä a̦
30Abinaja Jesús a cuma.
—Camiyä ya cuaaö bufi lä doblao wei tänö ya cuaaimi. Fayä ya wa̦ fa ji̦linö, ya bä yanowamö li jömaö. Camiyä ya cuaaö bufi lä doblao weinaja mlai, wale lä shömöleno wei a lä cuinö wale yai taamaö bufi lä doblao weinaja, ya li cuaaö. Ö̦jö cudeenö, ya bä jömaö ja ya bejedimou showadawä.
31’¿Ö̦jö tawä? —Jesús a cuma—. Camiyä ya wa̦fa shino wäyämamou ayao fa cunoja, wamale a̦ bejedi bufibä tä nö cuobö mlai. 32Ai tänö wale a̦fa li yai wäyäö culadi. ¿Ö̦jö tawä? Ö̦jönö wale a̦fa lä wäyäö wei, ya bejedimou daö.
33’Bä fe lä ojomaö wei a Juan ma cui nija afä wama bä ca̦i shömölema, wama a wa̦no ji̦liaö co̦ojolobä. ¿Ö̦jö tawä? —a cuma—. Ö̦jönö wale a̦fa wäyäö ja, a ca̦i bejedimoma. 34¿Ö̦jö tawä? Yanowamö täbä a̦ ja, ya mölabä ya mlai ma cui, cafä wamacö bufi jaducublobä ya wa̦. Juannö wale a̦fa lä wäyäno wei, wama tä a̦ bejedi fa bufinö, wamacö jucäamou fe yadiobä. 35Cowa wacö shi̦i lä culenaja a li Juan cuoma. Ö̦jö wama tä shi̦i nofi jaba doaö ma ojodaono wei ma cui, wamacö nö dedejeblonomi dicowä.
36’Ö̦jö ma cui, Juannö wale a̦fa ma wäyäö wei ma cui, yale a̦fa yai bejedi wäyäö lä lojode wei, ai tä cua. ¿Ö̦jö tawä? Ya lä cuaaö wei tä showawänö, Fayänö wale lä shömöleno wei tä dablamou malä wawädole. Camanö wale taamaö cudeenö, ya e li cuaaö.
37’Fayä cama a showawä ma cuinö wale a̦fa ca̦i bejedi wäyäö mö feduo, wale lä shömöleno wei a lä cuinö —a cuma—. Ö̦jö wama a wa̦ ji̦liaö mlai ja, wama a dablaö mlai ja, wamacö cua showaa. 38Wale lä shömöleno wei ya lä cui, wamale a̦ ca̦i bejedi bufiimi dicowä ja, cama ma cui wama a wa̦ ca̦i bejedi taboimi.
39’Ba̦limi wamacö cuobä, Yai Bada showadi wama tä a̦ oni mödii. ¿Ö̦jö tawä? Camiyä ya wa̦fa yai lä wäyämou wei, ö̦jö lä tä a̦ oni waiquiwä. 40Ö̦jö ma cui, wamacö ba̦limi cuobä, camiyä nija wamacö juu moji dicowä.
41’Yanowamö täbä nija ya nofi doamobä, ya tä dayäimi —a cuma—. 42Ö̦jö ma cui, cafä bämacö daö. Bei wamacö bufi yainö, Yai Bada wama a nofimaimi. 43Fayänö wale ma shömöleno wei ma cui, wamale a̦ juaimi. Ai a lä cui, a juu bufi doblao lä bädao wei a lä cui, ö̦jö lä wama a wa̦ nia shino yai juaö. 44Yai Bada a yami lä cule nija wamacö a̦fa dodijaö tamobä tä ma cule ma cui, ö̦jö tä lä cui wama tä nofi yai cadidiboimi. Ma, Yai Bada nija mlai, yanowamö täbä nija wamacö a̦fa shino dodijaö tamou bufi doblao. Ö̦jö cudeenö, camiyä wamale a̦ bejedi nö bufibimi waiquiwä.
45’Fayä nija camiyänö bämacö a̦fa nia taimi —a cuma—. Inaja wale nofi tabo dijejä. Moisesi a yai lä cuinö, wama a nofi lä mölabou wei a showawä lä cuinö, ö̦jönö wamacö a̦fa nia dobloimi taö. 46Moisesi wama a wa̦ bejedi bufii fa cunoja, camiyä wamale a̦ nö ca̦i bejedi bufii mö feduobö wei. Cama etä a̦ oni jamö, camiyä wale a̦fa malä wäyäno wei. 47Ö̦jö ma cui, Moisesi wama tä a̦ bejedi bufiimi waiquiwä ja lä, camiyä ¿wedinaja wamale a̦ bejedi bufii li cuo ayaobä?
اکنون انتخاب شده:
Juan 5: GUU
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
©2012, All Rights Reserved
