Juan 18
18
Jesús a lä juwäleno wejei tä a̦
1Einaja Jesús a fa culunö, cama ebä lä nocamabono wei ebä ca̦i falayoma. Sedono u jamö bä ca̦i fa bucaduicufälönö, ö̦jamö lä ficali täca lä blaono wei jamö, bä ca̦i wawäblaliyoma. 2Jesúsnö bä lä nocamabono wei, ö̦jamö lä bä ca̦i juu yaimoma yalo, Judanö täca ca̦i daö waiquioma, a nia lä nomojoliano wei a lä cuinö.
3Judanö täca dama cudeenö, Jesús a nabä jubeje bä fa nacalänö, bä ca̦i ayofälöma. Lomateli ai bä sodado coyocomoma. Yai Bada etä yafi jamö bä lä läono wei ai bä ca̦i. ¿Ö̦jö tawä? Nofi bäyäalewä blowäjäwä bänö bä shömölemaje, faliseo bä bada ca̦inö. Cowa wacöbä shi̦i cuobä täbä däaquemaje. Wacöbä ca̦i ji̦ibomaje. Bä ishobä täbä ca̦i showabou showadaomaje.
4Ö̦jö däjä, a nia lä taamano wejei tä daö waiquilanö, Jesús a wawäblaliyoma. Bä mö fa bamalänö, abinaja bä nowa tama.
—¿Wedi jamö a lä cui, bei wama a nabä li juu cuimi?—bä nowa tama.
5—Nasaleteli a wa̦fa Jesús lä cule —bä cuma.
—Camiyä ö̦jö lä ya —Jesús a cuu showadaoma.
Ö̦jö bä nija Juda a ublao coyocooma, a lä nomöjoliano wei a lä cui.
6Jesús a lä cui, “Camiyä ö̦jö lä ya”, a cuu ja, a nabä lä juno wejei bä lä cui, bä quilili wäcäcäolaliyoma. 7Ö̦jö däjä, Jesús a wa̦ faö co̦oma.
—¿Wedi jamö a lä cui, wama a li dayäaö? —a cuu co̦oma.
—Nasaleteli a wa̦fa Jesús lä cule —bä cuu co̦oma.
8Jesús abinaja a cuu mö feduoma.
—Camiyä ö̦jö lä ya. Ya cuu malä waiquiofe. Camiyä wamale nabä yai juu yalo, ei bä lä cui bä juwäma dijejä —a cuma.
9A cuu lä balöono wei tä a̦ bejedi wawäblobä, a wa̦ li cuoma. Abinaja bä Fö̦ö e nija a lä cuno wei. “Wa bä lä jöböbeno wei bä lä cui, moli ma cui ya wa̦lidiblamanomi”, a lä cuno wei.
10Ö̦jö däjä, Simón Pedro a lä cuinö, sibala a fa ucädalänö, a ishoa mö balayoma. Nofi bäyäalewä bada a wa̦ juamobä e nabä fa queicunö, jayu boco mashi lä cui jamö e yömöca baquequeblalema. Ö̦jö a nabä lä queono wei a lä cui, Maco a wa̦fa cuoma. 11Pedro nija abinaja Jesús a cuu showadaoma,
—Sibalafä a taa da co̦cu. Ya nö yai bleaabä, Yai Bada tänö tä däamaö lä ojode wei tä ja, ya noshi umlaobä ya malä mlai —a cuma.
Anasi nijamö Jesús a
lä öbölefälöno wejei tä a̦
12Ö̦jö cudeenö, a nabä lä juno wejei bä lä cuinö, Jesús a juwäa showadalemaje. Sodado bä ca̦i lä cuono wei a bada ma cuinö, cama ebä ma cuinö, judio bä bada ma cuinö, Jesús a juwäa fa showadalöjenö, a bococu o̦cablalemaje. 13Ö̦jö däjä, Anasi a bada nija a öböa balöquemaje. Nofi bäyäalewä, ö̦jö däjä a bada lä cuono wei a Caifasi lä cui nija a fecamamoma. 14¿Ö̦jö tawä? Judio bä lä yömölano wei, ö̦jö Caifasi a li cuoma. Judio bä bluca waicaö mlaobeje, moli a shämou ja tä a̦fa dodijidawä lä tano wei a lä cui.
Pedronö Jesús a nofi jole
lä mojodubono wei tä a̦
15Simón Pedro a lä cui, Jesús nija a jäwäjäwä yauaö jäafälöma. Jesús nija ai a nocao mö lä feduono wei a sho. Ö̦jö ai a lä cui, nofi bäyäalewä a badanö a dama yalo, a jamabonomije. Ö̦jö bada e yafi je̦fa jamö a faa cadidilayoma, Jesús a lä öbölefälöno wejei jamö. 16Ö̦jö a ma fafälöö däjä ma cui, bei yoca sibo jamö Pedro a ublao siboo juoma. Ö̦jö cudeenö, Jesús nija ai a nocao mö lä feduono wei a lä cui, nofi bäyäalewä bada anö a lä dano wei a lä cui, ö̦jö a siboa co̦layoma. Yoca lä jolemabou wei a suwä nija a wa̦ fa fanö, Pedro a famalema. 17Ö̦jö däjä, yoca lä jolemabou a suwä lä cui, Pedro nija abinaja a cuma.
—Ö̦jö Jesúsnö bä lä nocamabono wei, cafä ai wa e nofima. ¿Ö̦jö tawä?
—Ma, ö̦jö yami —Pedro a cuma.
18Tä si ajioma yalo, bada a wa̦ juamobä ebä lä cuinö, ö̦jamö bä lä läono wei bä ca̦i badanö, acanafu bä wacö fa jolacöjenö, bä bomou ca̦i ublajaoma. Ö̦jö bä ublajaobä jamö, Pedro a ca̦i bomobä a coyocooma.
Nofi bäyäalewä bada anö
Jesús a lä wa̦lino wei tä a̦
19Ö̦jö däjä, nofi bäyäalewä a bada lä cuinö, Jesúsnö bä lä nocamabono wei bä wa̦lima, tä a̦ lä wäyäno wei etä a̦ ca̦i. 20Jesús abinaja e cuu mö feduoma.
—Yanowamö täbä nijamö, wawädowä ya wa̦ shino faö talei. Judio bämacö yododabä yafi bä jamö ya tä a̦ shino wäyäö, Yai Bada etä yafi jamö ca̦i, judio bä bluca lä yododadii wei jamö. Moli ma cui, ya tä a̦ wäaö ja̦toonomi. 21Wale a̦ lä ji̦lileno wejei bä lä cui nija wale a̦ yai da wa̦li, camiyä nija mlai. Ya bä nowa lä tano wei tä lä cui, cama bänö tä daöje —a cuma.
22Inaja Jesús a cuu däjä, ö̦jamö bä lä läono wei ai a bada ublao lä ajedeono wei a lä cuinö, bei imicönö a si baiblalema. Abinaja e cuma.
—Nofi bäyälewä bada a ma cui nija, ¿inaja bei wa e nia li cuu?
23Abinaja Jesús e cuma.
—Ya wa̦ faö wa̦lidiwä ja lä, tä lä wa̦lidii tä da jömöba. Ö̦jö ma cui, ya wa̦ cadidiwä waiquiwä ja, wale si baiblaö buobä tä cuami —e cuma.
24Ö̦jö däjä, nofi bäyäalewä a bada Caifasi lä cui nijamö, Anasinö a bococu o̦cama shömöa nomöjölema.
Simón Pedro a wa̦ nofi
mojoduaö lä co̦ono wei tä a̦
25Simón Pedro a bomou ca̦i ublao däjä, a wa̦lii co̦omaje.
—Ö̦jö Jesúsnö bä lä nocamabono wei, cafä ai wa e nofima. ¿Ö̦jö tawä? —a cuma.
A wa̦ jole mojodumou co̦o ja, abinaja a cuma.
—Ma. Ö̦jö ya e mlaicätä —a cuma.
26Nofi bäyäalewä a wa̦ bada juamobä ai e lä cui e a̦ fama, Pedronö yömöca lä baquequeblaleno wei e mashi lä cui.
—Cafä wa lä cui, ¿Jesús sho ficali ca jamö bäfäcö dablanomi daanö?
27Ö̦jö däjä, Pedro a wa̦ mojodumou fa co̦onö, yedu cadala a wa̦ nocablaliyoma.
Bilado a bada nija Jesús
a ca̦i lä icuqueno wejei tä a̦
28Ö̦jö däjä, Caifasi e yafi jamö Jesús a ca̦i faa fa co̦löfälöjenö, Lomateli bada e yafi jamö a öböa fenalefälömaje. Ö̦jö ma cui, Lomateli bä shomi yalo, judio bänö bä nofi fa shamibojenö, u̦eshi jamö a ca̦i fanomije. Yai Bada a waiteli lä jayuano wei a nofi co̦camoaö co̦obä jamö, bä iyaö bufi doblaoma cudeenö, bä shamiaö bufionomi. 29Ö̦jö cudeenö, cama bä nija Bilado a fa sibolunö, abinaja a cuma.
—Ei a lä cui, ¿wedinaja a fa cuaanö, bei wama a wa̦fa li dobloimi taö? —a cuma.
30Abinaja bä cuma.
—Wa̦lidiwä talewä ei a cuo mlao fa cunoja, cafä nija yama a nö jöböabö mlai.
31—A ca̦i juu da co̦lufälöje —Lomateli a bada Bilado cuma—. Wama bä dobloimi jömabä, afä Moisesi wama etä a̦ malä tabole.
Abinaja judio bä cuma.
—Yama a nia shäö lä showadao wei tä cuami. Tä a̦ läa. Lomateli wamacönö yamalecö malä wasöbole —bä cuma.
32¿Ö̦jö tawä? Jesús a befi ca̦i nia lä i̦tamano wejei, cama a wa̦fa wäyämamou balöoma. Ö̦jö a wa̦ bejedi wawäblou bufio yalo, *Lomateli a bada nija Jesús a jöböaö ojodaomaje.
33Cama etä yafi jamö Bilado a faa fa co̦lunö, Jesús a nacamaö bufima. Abinaja e cuma.
—Cafä ¿judio bada bei wa? —a cuma.
34Abinaja Jesús e cuma.
—Judio wale bada lä wa̦life, cafä wa bufi wedinajamou ja, ¿bei wa wa̦ cuo da cufanö? Ma, wale a̦ ji̦libou bäa ja, ¿bei wale wa̦lii cufe? —e cuma.
35Bilado abinaja e cuma.
—¿Camiyä judio ya daanö, ya bufi wedinajamobä? Cafä bäfä dobloimi jömabä, afä bä judio showawä ma cuinö wa bälaqueyolumaje. Nofi bäyäalewä bä blowäjäwä ma cuinö. ¿Wedinaja wa cuaaö dicooma? —e cuma.
36Abinaja Jesús e cuma.
—Bita jamö ya bada läobä yami. Yanowamö täbä nija ya bada läobä ya cuo fa cunoja, wale a̦ lä juaö wejei bä lä cui bä nö ishobö wei, judio bä nija ya jöböamou mlaobä. Ma, bita jamö bä bada lä nosiemou weinaja, ya bada cuobä yami —e cuma.
37—Ö̦jö waiquiwä —Bilado e cuma—. Bada wa wa̦fa jilou malä waiquiofe.
—Cafänö wale a̦fa shino bada jilaö lä cufe —Jesús e cuma—. Bejedi ya tä a̦ wawämabä ya oshe tablamolayoma. Inaja ya cuaabä ya bita jamö waloqueyoluma. Bejedi tä a̦ nofi lä yaibou wejei bä blucanö, wale a̦ ji̦liaöje —e cuma.
38—¿Wedi bei tä a̦ li bejedi? —Bilado e cuma.
Inaja a fa culunö, judio bä nija a faa co̦layoma. Abinaja bä nowa tama.
—Jesús a doblou lä mlai ya etä daimi. 39Ö̦jö ma cui, abinaja wamacö showadi cuaaö. Yai Bada a waiteli lä jayuano wei wama a nofi co̦camoaö co̦o däjä, afä ya fe lä lamabou wei moli wama a famaö bufio talei. ¿Ö̦jö tawä? Fei däjä, judio wamacö nija a bada cuobä a lä cui, ¿ö̦jö bei wama a jujeblamaö bufii cule?—bä nowa tama.
40I̦cali bä a̦ faö co̦oma.
—¡Miji mlai! ¡Balabasi a yai shino da cushäblalö!
¿Ö̦jö tawä? Ö̦jö Balabasi a lä cui, shomi bä madofibö lä lämadii wejei, ö̦jö a li cuoma.
انتخاب شده:
Juan 18: GUU
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
©2012, All Rights Reserved
