लूका 23

पिलातुस थमां यीशु कन्ने सुयाल

1पी सारी सभा उठीयै यीशु गी पिलातुस दे कोल लेई गेई। 2ते ओ ए आखीयै ओदे उपर दोष लान लगे; “असैं इसी लोकें गी बकांदै, ते कैसर गी चुंगी देने लेई मना करदे, ते अपने आप गी मसीह, राजा आखदे सुनया ऐ।” 3पिलातुस ने उसी पूछेया, “के तू यहूदीयें दा राजा ऐं?” ओनें उसी जबाब दिता, “तू अप्पुं गै हे आखा करना ऐ।” 4ओस बेलै पिलातुस ने प्रधान याजकें ते लोकें गी आखया, “मिकी एस मनुक्ख च कोई कसुर नेई लबदा।” 5लेकन ओ ओर बी जोर पाईयै आखन लगे, ए गलील जिले थमां लेईयै इत्त्थैं तकर सारे यहूदीया दे लाके च शिखया देई देईयै लोकें गी पड़कांदा ऐ। 6ए सुनीयै पिलातुस ने पूछया के ए मनुक्ख गलील दा रौने आला ऐ? 7ते ए जानिऐ के यीशु हेरोदेस राजा दी रियासत दा ऐ, उसी हेरोदेस राजा दे कोल पेजी दिता, किके उनै धयाडें च ओ बी यरूशलेम च हा।

यीशु गी हेरोदेस दे कोल पेजया जाना

8हेरोदेस राजा यीशु गी दिखियै बड़ा गै खोश ओया, किके ओ बड़े दिना कोलां उसी दिखना चांदा हा; एसकरी के ओदे बारै सुना हा, ते ओदा केछ चेन्न दिखने दी आस रखदा हा। 9ओ उसी बड़ी सारीयां गल्लां पुछदा रिया, लेकन ओनें उसी केछ बी जबाब नेई दिता। 10ते प्रधान याजकें ते शास्त्री खडोईयै तन मन कन्ने ओदे उपर दोष लांदे रे। 11ओस बेलै हेरोदेस राजा ने अपने सपाईयें दे कन्ने ओदा अपमान करियै मजाक कित्ता, ते राजे आले कपड़े पुआईयै उसी पिलातुस दे कोल पेजी ओड़या। 12उसै धयाडै पिलातुस ते हेरोदेस राजा दोस्त बनी गै; एदे पैलैं ओ एक दुए कन्ने बैर करदे हे।

पिलातुस थमां यीशु गी मौत दी सजा

13पिलातुस ने प्रधान याजकें ते प्रधाने ते लोकें गी बुलाईयै उनेंगी आखया, 14“तोस एस मनुक्ख गी लोकें गी बकाने आला समझीयै मेरे कोल लेई आए ओ, ते दिखो, आऊँ थुआड़े सामने ओदी जांच कित्ती, लेकन जिन्नें गल्लें दा तोस ओदे उपर दोष ला दे ओ, उनै गल्लें दे बारै च मैं ओदे बेच केछ बी दोष नेई दिखया ऐ; 15नां हेरोदेस राजा ने, किके ओनें उसी साड़े कोल पेजी ओड़या ऐ; ते दिखो, ओदे कोल ऐसा केछ नेई ओया के ओ मौत दी सजा दे काबल ठहराए जाए। 16एसकरी आऊँ उसी डंडे मारीयै छुड़ी दिना ऐं।” 17पिलातुस त्यार उपर उन्दे लेई एक कैदी गी छुड़ने उपर मजबूर हा। 18ओस बेलै सारे मिलिऐ कर्लान लगे, “एदा कम तमाम कर, ते साड़े लेई बरअब्बा गी छुड़ी दे!” 19ओ किसे चगड़े दे कारन जेड़ा शैर च ओया हा, ते कत्तल दे कारन कैदखाने च पाए दा हा। 20लेकन पिलातुस ने यीशु गी छुड़ने दे मन कन्ने लोकें गी पी समझाया, 21लेकन उनै क्रल्लाईयै आखया, “उसी सूली उपर चढ़ा, सूली उपर!” 22ओनें त्री बार उनेंगी आखया, “कि ओनें केड़ी बराई कित्ती ऐ? मैं तां ओदे च मौत दी सजा दे काबल कोई गल्ल नेई दिखी। एसकरी आऊँ उसी डंडे मारीयै छुड़ी दया नां ऐं।” 23लेकन ओ क्रल्लाई-क्रल्लाईयै पिछें पेई गै, के ओ सूली उपर चाढ़या जा, ते उन्दा क्रल्लाना ठीक बैठा। 24खीरी च पिलातुस ने उक्म दिता, के उन्दी अर्ज दे मताबक कित्ता जा। 25ते ओनें ओस मनुक्ख गी जेड़ा चगड़े ते कत्तल दे कारन कैदखाने च पाया गै दा हा, ते जिसी ओ मंगदे हे, छुड़ी दिता; ते यीशु गी उन्दे मरजी दे मताबक सौंपी दिता।

यीशु गी सूलीयै उपर चाडया जाना

26जेलै ओ उसी लेई जा दे हे, तां उनै शमौन नां दा एक कुरेनी जेड़ा शैर बार आवा दा हा, पकड़ीयै ओदे मूंढे उपर सूली गी रखी दिता के ओ उसी यीशु दे पिछें-पिछें लेई अवै।

27ते लोकें दी बड़ी पीड ओदे पिछें ओई गेई, ते उन्दे च बड़ीयां सारीयां जनांनीयां बी, जेड़ीयां ओदे लेई छाती पीटदी ते वलाप करदीयां हां। 28यीशु ने उन्दी बखी मुड़ीयै आखया, “ए यरूशलेम दी पुत्रियो, मेरे लेई नेई रुओ; लेकन अपने ते अपने जागतें लेई रुओ। 29किके ओ देन औंदे न, जिन्दे च लोक आखघन, तन्न ए ओ जेड़ी बांझ ऐ, ते ओ गर्भ जेड़ा नेई जम्मे ते ओ स्तन जिनैं दोध नेई पलाया। 30ओस बेलै ओ पाडें गी आखघन, के साड़े उपर प्यो। 31किके अगर ओ अरे बूट्टे कन्ने ऐसा करदे न, तां सुके दे कन्ने के केछ नेई कित्ता जाग?”

32ओ दुए दो मनुक्खें गी बी जिनैं पैड़े कम कित्ते हे ओदे कन्ने मारी ओड़ने गी लेई गै।

33जेलै ओ ओस जगै च जिसी खोपड़ी आखदे हे पूजे, तां उनै उत्थें उसी ते उनै पैड़े कम करने आलें दों मानुऐं गी बी, एक गी सजे ते दुए गी खबे पासे सूलीयें उपर चाढ़या। 34ओस बेलै यीशु ने आखया, “ए पिता इन्नें गी माफ़ कर, किके ए जांनदे नेई के के करा दे न?” ते उनै चिट्ठीयां पाईयै ओदे कपड़े बंडी लेते।

35लोक खडोते-खड़ोते दिखा दे हे, ते ओस देश दे राज करने आले बी तान्ने मारीयै बोलदे हे, “एनें दुए लोकें गी बचाया, जेकर ए परमेसर दा मसीह ऐ, ते ओदा चुने दा ऐ, तां अपने आप गी बचाई लै।” 36सपाई बी ओदे कोल आईयै ते उसी सेरका देईयै तान्ने मारीयै आखदे हे। 37“जेकर तू यहूदीयें दा राजा ऐं तां अपने आप गी बचा।” 38ते ओदे उपर ए कसुर-पत्र बी टंगया हा; “ए यहूदीयें दा राजा ऐ।”

सूली उपर मन फेरने आला पापी मानु

39जेड़े दो पैड़े मानु सूलीयें उपर टंगे दे हे उन्दे बिचा एक ने यीशु दी निंदया करियै आखया, “के तू मसीह नेई? तां पी अपने आप गी ते असेंगी बचा!” 40एस गल्ल उपर दुए ने उसी चेडकीयै आखया, “के तू परमेसर थमां बी नेई डरदा? तू बी तां उवै सजा पोगा नां ऐं, 41ते अस तां न्याय दे मताबक सजा पोगा नयाँ न, किके अस अपने कम्में दा ठीक फल पानयां न; लेकन एनें कोई गलत कम नेई कित्ता।” 42ओस बेलै ओनें आखया, “ए यीशु, जेलै तू अपने राज बेच औगा, तां मेरा बी चेत्ता करयां।” 43ओनें उसी आखया, “आऊँ तुगी सच आखना ऐं के अज्ज गै तू मेरे कन्ने सोर्गलोक बेच ओगा।”

यीशु दा प्राण छुड़ना

44ते लगपग दपैर थमां लेई त्रिऐ पैर तकर सारे देश च न्हेरा पेदा रिया, 45ते सूरज दी लो नेई रेई, ते मंदर दा परदा बिचा फटी गीया, 46ते यीशु ने बड़ी बाज कन्ने करलाईयै आखया, “ए पिता आऊँ अपनी आत्मा तेरे अथ्थें च सौंपना ऐं।” ते ए आखीयै प्राण छुड़ी दित्ते। 47सूबेदार ने, जे केछ ओया हा दिखियै परमेसर दी मैमा कित्ती, ते आखया, “पक्का गै ए मानु तरमी हा।” 48ते पीड जेड़ी ए सब केछ दिखने गी किठी ओई दी ही, एस कटने गी दिखियै छाती पिटदे ओई बापस चली गेई। 49लेकन ओदे सारे जान पन्शान, ते जेड़ीयां जनांनीयां गलील जिले थमां ओदे कन्ने आईदी हियां, दूर खडोईयै ए सब केछ दिखा दियां हां।

अरिमतिया दे युसूफ थमां यीशु गी दफनाना

50ते उत्थें, युसूफ नां दा महासभा दा एक मनुक्ख हा, जेड़ा सज्जन ते तरमी मनुक्ख हा 51ते उन्दे वचार ते उन्दे एस कम उपर खोश नेई हा; ते ओ यहूदीयें दे शैर अरिमतिया दा रौने आला ते परमेसर दे राज गी बलगनें आला हा। 52ओनें पिलातुस दे कोल जाईयै यीशु दी लाश मंगी; 53ते उसी सूली उपरा तुयारियै चिट्टे कपड़े दे कफ़न च लपेटया, ते एक कबरां च रखया, जेड़ी बड़े पत्थर च कढी दी ही; ते ओदे च कोई कदें बी नेई रखया गेदा हा। 54ओ त्यारी दा धयाडा हा, ते यहूदीयें दे बसां दा धयाडा शुरू ओनें आला हा। 55ते ओ जनांनीयां जेड़ीयां ओदे कन्ने गलील जिले थमां आई दियां हां, पिछें-पिछें, जाईयै ओस कब्र गी दिखया, ते एबी के ओसदी लाश कियां रखी गेदी ऐ। 56पी ओनें बापस जाईयै खशबूदार मसाले ते इत्र त्यार कित्ता; ते सब्त दे धयाडै उनै उक्म दे मताबक बसां कित्ता।

اکنون انتخاب شده:

लूका 23: DOG

های‌لایت

به اشتراک گذاشتن

کپی