Matayo 7
7
Atubonokin Luce
(Luk 6:37-38,41-42)
1“Mam atubonokin luce tetere mam Akuju kitubokini ijo de. 2Naarai etubokini Akuju ijo kokipone kalope kang'oli lo itubonokina ijo luce, itosomae nesi kama kon ikisila lupe ng'ulu lu itosomae ijo kamaka luce. 3Inyoo iteo ijo ibore ka kong' ka onac kon konye mam ijo kitee ibore ni ejii akong' kon ka elope? 4Kere de ikoni ijo ilimokini onac kon ai, ‘Kicamit kinyek kalema eong' ibore ng'in ka akong' kon,’ konye ijaasi ijo de ka ibore akong' kon? 5Ijo nika esoswai! Kolema bere ibore ni ejii akong' kon nesi ibeikina ijo anyun tena ka alemar ibore ka kong' ka onac kon.”
6Mam ainakin ing'okwo iboro lukalaunak, ebong'okinete ka alomikin ijo. Mam acakakini ipegei amoru nu epolo adumunet naarai ebunete akipuda.
Kilip, Komoo, Kikong'ok
(Luk 11:9-13)
7“Kilip, kiinakino ijo; komoo, kosodi ijo adumuni; kikong'ok, king'akino ijo. 8Naarai ng'ini itwan ni ilipi, einakino; ng'ini itwan ni ekote, edumuni; ng'ini itwan ni ikong'ikong'i, eng'akino. 9Kere ng'ai kama kus, kilip ikoku keng' emugati kosodi ainakin amoru? 10Kere de kilip ekoleit, kosodi ainakin emun? 11Kijenete bere osi lu lukarokok kona, ainakin idwe kus idutan lukajokak, ekipone ali einakina Papa kus lo ejii toma kuju osi iboro lukajokak!”
12“Kanuka ng'unu, nu ikote ijo kisomakisi itung'a ijo, kisomak kesi; naarai lo nes Ekisil ka Musa ka akisisianakino ka ikadwarak.”
Erute lo Ediding'
(Luk 13:24)
13“Kolomata ko orute kalo ediding'; naarai elala erute, bobo etapana eroto, lo idirarit amudiaro, bobo ng'ulu lu elomete ko oroto kang'olo ipuaka. 14Konye ediding' erute, bobo icasit eroto lo idirarit akijar; bobo edisiaka itung'a lu edumunete eroto ng'oli.”
Ekitoi kitoni Araito keng'
(Luk 6:43-44)
15“Kocoikinosi ka ikadwarak lukaliokonu, lu ebunete nama kus enapito inapen ka amerekekin konye kotoma kes eraito ipeen. 16Ijenunete osi kesi ka araito kes. Edeng'unono emusabibu kokokwa? Kere araito ka ekaererete ko okodokodo? 17Kanuka ng'unu, ekitoi kere lokajokan ileleng'i araito nukajokak, konye ekitoi lokaronon ileleng'i araito nukarokok. 18Ekitoi lokajokan mam kileleng'i araito nukarokok. Kere ekitoi lokaronon akileleng' araito nukajokak. 19Ekitoi kere lo emam kileleng' araito nukajokak ejepakino kwap kocakakinete toma akimi. 20Kanuka ng'unu ijenuni ijo kesi karaito kes.
Mam Eong' Kajeni Osi Cut
(Luk 13:25-27)
21“Mere ng'in itwan ni enyarit eong', ‘Lokapolon, Lokapolon,’ elomi Ajakaanut nako kuju, konye ng'in bon ni isomae nu ekote Papa kang' loko toma kuju. 22Apaaran ng'ini, elimokinete eong' lu ipuaka, ‘Lokapolon, Lokapolon, mam siong' kadwarito ko okiror kon, ka akireng'iar ajokin ko okiror kon, ka asoma nu ipuaka nukagogong' ko okiror kon?’ 23Neni nesi alimokina eong' kesi, ‘Mam eong' kajeni osi cut. Koikasi kama kang', osi lukarokok!’
Iare Lukadukok Etogo
(Luk 6:47-49)
24“Ng'ini kere ni iirari akiro kang' nu, ka asoma, eputosi ka etwan loka acoa lo aduki etogo keng' kuju ataaba; 25kosodi akiru adoore; kobuni akaale; kokutuni ekuwam lokapolon noi lo kijang'ijang'i etogo ng'oli, konye mam akibirori, naarai kedukokiite ataaba.
26“Itwan kere ni iirari akiro kang' kong'eri akitup, eputosi ka etwan lo ebang'ana lo kedukokini etogo keng' asing'e; 27kodoe akiru, kobuni akaale; kokutuni ekuwam lokapolon noi lo kijang'ijang'i etogo ng'oli, kibiror; kepolo akibiror ng'in.”
Apedor ka Yesu
28Kedau Yesu awaragasia nu, koumokinete itung'a lu ipu akisisianakino keng', 29naarai kebu nesi kisisianak kesi kwape kang'oli kalo kejaatatar ka apedori mere kwape ka lukesisianakinak kes.
اکنون انتخاب شده:
Matayo 7: TESOP
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
©Bible Society of Kenya, 2020
info@biblesociety-kenya.org
AKITUTUKET NAKITETET (NEPEPEKA ISABULIN KA AWARAGASIA)
TESO NEW TESTAMENT PSALMS amp PROVERBS
