DEDI 18
18
I Ala ba nanjanji-nya haàtu anakeda mini i Ambarahàmu
1I MIRI na-pawuwangu wikina lai Ambarahàmu la lihida da pingi ai hàri ngia pa-lumungu la Màmurei. La rehi nuna lalu mbanana na lodu, tàka i Ambarahàmu mandapu-na padua la pindu maüna. 2Ba na-wulaku-yaka na katiku-na, ita-nanjaka da tau madua haàtu da ma-ndolaku la hanggana. Ka lumbatu wàna-madua-ka i Ambarahàmu hi na-manyamalu palua pa-tàbuku-ha. Nawàngu pa-maràbaku 3ba napanii, “Miri, àmbi laku lànga-dunya na maünggu dàngu nda li pàkumi; pahia àrungga ka ku-lumunggai Miri. 4Màta ka kupiti wai kai baha wàngu wihimi Miri. Màlawa Miri kai hangahu pàku la lumbu ai yiana. 5Napa nyungga ka ku-paloku-nggai ana pangangu hakudu, ka peku hayandalu belimi kai mangu pa-pangala-nya na lakumi. Tembi-mami-nggaka nu bai wàngu pali la umanggu nyungga atami,” wànanja.
Napaha nyuda, “Malangu-mu ba tuna nu na hàmumu. Li-madu-manya,” wàdanya.
6Ka manyamalu-nanyaka i Ambarahàmu hi natama la maü tàka hi napanii-nya i Hara, “Pa-renggangu, piti hau karungu kanguta mahàmu halawàla kau pandoi roti ka-bunggulu,” wànanya. 7Tunaka nu nyanyaru-nanyaka la pangia kabàba bandana, hi napindi heu ana hapi kambombu dàngu na mamàja toluna, hàla hi nawua-nya na papalewa-na, na marengga la pa-paloku-ya. 8Hàlaka nu i Ambarahàmu hi napiti wai huhu, ihi mbàngi huhu, dàngu tolungu pa-manahu, hàla hi na-kamahi-nja da ariyaa-na. Ba talànga nganguda nu, nyuna wikima i Ambarahàmu na ma-paloku la palumu-nja nyuda la lumbu ai nuna.
9Tunaka nu paàrangu-danyaka, “Ka nggiya i Hara na papaha-mu?” wàdanya.
“Ni-madunya lua, daa la maü,” wàna i Ambarahàmu.
10Na haàtu welingu lai nyuda napanii, “Hiwa mbua wulangu-kiaka,#Hiwa mbua wulangu-kiaka; jàka ndia: la ndaungu na manàmu-nya la rehi tungu nàhu. Nyungga napa kumai beli. Dàngu la rehi nuna i Hara na papaha-mu napa ngalangu-nanyaka haàtu anakeda mini,” wàna.
La rehi nuna i Hara patingingu-na-padua la pindu maü, la kajia-da da ariyaa. 11Nyuda i Ambarahàmu dàngu i Hara kaweda nàkapu-mada-nyaka, nyuna i Hara nda nahau-apa katàri. 12Jia-duyaka i Hara hi nariki la etina, dàngu hi napanii, “Nyungga mambàda kaweda dàngu ma-malaï tunggu yia, hilu ningu-ipa patikingu-nggu pa-papohungu dàngu leinggu? – Tàka na leinggu kaweda-madu-nanyai-ka,” wàna.
13Ka paàrangu-nanyaka i MIRI lai Ambarahàmu, “Nggikina i Hara hi nariki dàngu hi nandua ndandi wànya, peku-napa ihu nyungga la pa-paanangu ana la rehi kaweda-nggu? ba wàna. 14Màla ningu nu manda peku lai MIRI? Hama tuna ba mbàda wànggu kawai, hiwa mbua wulangu-kiaka napa kuhilu mai lai yiahu. Nu la rehi nuna i Hara napa pa-anangu-nanyaka haàtu anakeda mini,” wàna.
15Paraï pa-mangàdatu i Hara na-pahiningu, “Ndia-a, nda kuriki-a duku,” wàna.
Nanapa-ya i MIRI, “Bau riki-madu kawai,” hi wàna.
I Ambarahàmu ba na-kamahi-nya ndumana na Hondumu
16Hàlaka nu hadangu-danyaka da ariyaa pa-kadua haàtuda hi na-karia-nja paraïna i Ambarahàmu. Hàla tàka-danyaka la hau pangia na ngia papeku ita-danya la Hondumu. 17Napanii i MIRI la eti, “Nda ku-mbuhangu-a Nyungga pawini-nya lai Ambarahàmu jàka nggàraya napa na pa-patumbu-nggu. 18Ka nda jiaha da wàla wuana napa da madedi banjaru bokulu dàngu da ma-kuaha? Ka nda rukuna nyuna, hi ku-pakanyuru-nya napa mbuu ndàbana na banjaru la pinu tana?#hi ku-pakanyuru-nya ... banjaru la pinu tana; jàka ndia: Napa mbuu ndàbana na banjaru na-kamahi-ngga ka ku-pakanyuru-ha hama tuna na-pakanyuru-nggunya nyuna. 19Mbàda pindi-manggu-nyaka nyuna ka na-pareta-ha da anana dàngu dawàla wuana la pa-karadaku-ngga Nyungga dàngu la pawunda-ya na mahàmu dàngu na mamola. Jàka dawunda-ya nuna, ku-palundu-manya duku napa na pa-njanjingu-nggu lai Ambarahàmu,” wàna.
20Na pangalangu-na napanii i MIRI lai Ambarahàmu, “Ningu mambotu pa-panjala wànya na Hondumu dàngu na Nggomora, tàka tubangu-ma ba lalu bokulu-mada da njalada. 21Jia-duyaka nu hi kupuru Nyungga lai nàhu, la pa-hàlatu-ya, jàka na-padeningu hi ndia mbuu ndàbana na pa-panjala wànja na parongu-nggu,” wàna.
22Hàla da madua da ariyaa laku hanggangu-danyaka la Hondumu, tàka i MIRI ni bia-nyapa dàngu i Ambarahàmu. 23I Ambarahàmu nalihi-nya i MIRI hi na-paàrangu, “Tuba-manaka nu MIRI patàlaru-ya ba wàmu na tau manda njala papohu-nya na tau na manjala? 24Jàka era ningu tau lima kambulu manda njala la paraingu nuna, jiangu-maka MIRI bau patàlaru hàlaya nuna na paraingu? Ka ndau jàma-manyapa MIRI ka peku marada nuda da tau lima kambulu? 25Màta àrunja MIRI nuda da tau da manda njala ka àmbu pameti papohu-nja dàngu da tau manjala. Màtangu MIRI! Nadu jàka uwunda-mayaka MIRI, na tau na manda njala jiangu-maka duna ba huku papohu-nya dàngu na manjala. Nggiki peku-naka na ma-patandangu ngera la pa-nggubulu awangu hi jia tu bia-nanya na manda mola!” wàna.
26Napa i MIRI, “Ngera hama tuna jàka ku-hunggunggu tau lima kambulu manda njala la Hondumu, napa kujàma-nya nggubulu-na nuna paraingu lumuda nyuda,” wàna.
27I Ambarahàmu hili panii-nanyai, “Jàma àrungga MIRI ba kutoru mbeni lerangu pa-panua-nya na kareuku-nggu. Nyungga duku tau-aka dàngu nda ngera-anggunya la patuu ana hau. 28Tàka napa hi ningua tau patu kambulu malima na manda njala, nda lima kambulu-ada. Jiangu-maka nu MIRI bau pamolu-nya nggubulu-na nuna na paraingu ba na-pahilitu na tau malima-a?” wàna.
Nanapa-ya i MIRI, “Na paraingu nuna nda pa-patàlaru-aya jàka era hunggunggu lai nu tau patu kambulu lima manda njala,” wàna.
29I Ambarahàmu hilu panii-mananyai, “Ka nu jàka ningu tau patu kambulu-a?” wàna.
Nahema i MIRI, “Lumuda nuda da tau patu kambulu nda ku-pangala-anyapa na pawuku-nggu,” wàna.
30I Ambarahàmu napanii, “Àmbu hànggadu MIRI jàka kuhili panii. Ka nu jàka tau tailu kambulu-aya?” wàna.
Nahema i MIRI, “Jàka ku-tomangu tau tailu kambulu, kumàta-nya na pawuku-nggu,” wàna.
31I Ambarahàmu napanii, “Jàma-kingga MIRI ba kutoru mbeni pa-panua-nya na paniinggu. Ka nu ka tau dua kambulu-aya?” wàna.
Nahema i MIRI, “Jàka kuhunggu-madu tau dua kambulu, nda jia patàlaru-anggunya nuna na paraingu,” wàna.
32Ba jiaka wàngu i Ambarahàmu napanii, “Àmbu hànggadu MIRI, panii-nggunya handàkangu-aka. Màla jàka ana hakambulu-ya na maninya?” wàna.
Nanapa-ya i MIRI, “Jàka ningu tau hakambulu manda njala, nda jia patàlaru-anggunya nuna na paraingu,” wànanya. 33Hàlaka papanii dànya i Ambarahàmu, laku-nanyaka i MIRI, tàka i Ambarahàmu beli-nanyaka la umana.
اکنون انتخاب شده:
DEDI 18: KAM
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
@LAI 1995 Indonesian Bible Society (Lembaga Alkitab Indonesia)