Yohanes 15
15
At Yesus en e, “E anggur edip an nebeat o,”
oluk mo’gulentesi wene
1At Yesus en wene asogo mo’gulentesirik e, pobuk mesik mo’gulentesi, “E anggur edip demat a’ge re, an nebeat o. Ye, ebe eiye re, an naigat o. 2E ede’bi ebe lo’bok, an nebam hwedik welat e’gen oso erlak holuk, daksogo hwikhaik o. A’geat de, e ede’bi ebe lo’bok e’gen oso holuk e, logon eminsogoat ese lemagoluk emening ’balogo ’bogun taga leik o. 3Ye, his e, an en wene mo’gulhentasu legi ai en e, henemening ’gela’ge ’balogo ’bogunsogo henebesimu welegep o. 4Asogo henemening ’gela’ge ’belak welegep ai re, his an nemin hwedik, ye, an his henemin hwedik, wolomok o. E ede’bi ai re, ebe pam hwedik erlak holuk, e’gen u re, modok mia o. We, e ebe pam hwedik holuk, e’gen oso ai ’gela’ge, his an nemin hwedik wolorogup erlak holuk e, op a’ge tu re, mia o. We, an nebe pam hwedik holugat, op tugulom o.
5E ebe anat o. Ye, e ede’bi hisat o. His an nemin hwedik erlak, we, ’belak welat, di a’ge yu a’ge mesik tu re, modok mia ai en e, at ap sa en an ne’birek hwedik, ye, an at e’birek hwedik, wolomul holuk e, at ai e’gen a’bik u ’gela’geat, op a’ge loksogo tua o. 6Ye, e ede’bi ’balogo hwikhogwi a’ge ’buk agoam e, aphwami en odoksogo poluk odoukmu hwikhai lagaiam odouk nasu ai ’gela’ge, at ap sa en an ne’birek hwedik erlak, ’belak oruak holuk e, asogoat daksogo hwikhouema ebe odouk nouwa o. 7His an nemin hwedik welat niak honogola oruak holuk e, we, no’gwe a’ge his henagai a’ge an ’gonu mo’gulnorogup holuk wokhentaikmu hwerlagubat o. 8His hene’gen a’bik ikho ’gela’ge op a’ge loksogo togup holuk, aphwami en an naik erliktua o. His henebe nosi demat a’ge niak wogu legep a’ge welat, asogoat togu lorogup o,” oluk mo’gulentesi.
9At Yesus en wene asogo mo’gulentesirik mesik disogo mo’gulentesi,
“Naik en an ede hwedik welago ai ’gela’ge, an en his nede hwedik welegi o. Asogo his nede hwedik weleik en e, an nemin hwedigat wolomup o. 10Ye, an naik en,
Disogo tip, asogo tip, oluk nesa’go wusogo mo’gulnesi a’ge ai, an en at iak hologo tisokhwe, at en an ede hwedik welago ai ’gela’ge, his ogo asogoat, an en his henesa’go wusogo,
Disogo tip, asogo tip, oluk mo’gulhentasu legi a’ge ai, his en an niak hologo togu lorogup holuk e, an en ogo his nede hwedik weleik o. 11Ye, an nogola nagai hasu legi ai ’gela’ge, his honogola henagai hogulat, pobuk loksogo henagai hogu lemagoluk, wene ai ’berlegat mo’gulhentegis o. 12#Yoh. 13:34; 15:17; 1Yoh. 3:23; 2Yoh. 1:5His en togu lemagoluk, wene ebe yuat henesa’go wusogo mo’gulhentaik o,
An en his nede hwedik welegi ai ’gela’ge, his en asogoat his-hisat nede-hede welemagoluk mo’gulhentegis o. 13Is pema akhit enarilak enede hwedik e, mia ’gela’ge a’geat de, ap mesik arilak ede hwedik en, is enebaget warema ai nak e, modok logo yo. 14Ye, an en henesa’go wusogo,
Disogo tip, asogo tip, oluk mo’gulhentasu legi a’ge ai, niak hologo togu lorogup holuk e, his an narilagat o. 15Is aphwami eneragam a’ge ai, onuelak togwi a’ge eneperlak ai en e, an en hwerli yogodak yu pam en,
His an neragam a’ge, oluk mo’gulhentaik erlak o. Di wene yu wene naik en mo’gulnesi a’ge ’berlegat mo’gulhentasu legi ai en e,
Narilak, oluk mo’gulhentasu legi ai o. 16His en an poliknebegep puk. We, an en his polikhenebegi ai, e e’gen egesiso ai ’gela’ge, modok-modok welema a’ge ti lagup en oluk, henebe polikhonoboluk edikhenebegi. Ai en e, we, no’gwe, his henagai a’ge an nonuk ’balogo naik ’gonu mo’gulorogup holuk e, at en wokhontouwayat o. 17Ye, an en wene mo’gulhentegis ai, ebe logo re,
His-his nede-hede wolomup o, oluk mo’gulhentegis aiat o,” oluk mo’gulentesi.
At Yesus en e, “Aphwami ’gwiangma a’ge en
enebit modok hontogu lema ani o,”
oluk mo’gulentesi wene
18At Yesus en wene asogo mo’gulentesirik, pobuk mesik disogo mo’gulentesi,
“Is aphwami ’gwiangma a’ge en modok enebiraphonobogwi holuk e, naduk an enebirapnobogu legesa ano henede eberip o. 19His henebe aphwami ’gwiangma a’ge wellepma re, is aphwami ’gwiangma a’ge en e,
Is e, nis nonosi, oluk enede hwedigaphenebelip a’geat de, his henebe is aphwami ’gwiangma a’ge oruakma polikhenebegirik wokhenebegismu re, henebe is a’ge welegep puk. Ai en e, modok enebiraphonobogwi o. 20#Mat. 10:24; Luk. 6:40; Yoh. 13:16Ye, ap ’gain mesik eragam a’ge ’gela’ge oruakhwe, at eragam a’ge ano logo ’gela’ge welago erlak o, oluk mo’gulhentegis ano honogola eberit o. Is en an wiagapnobogwi holuk e, his asogoat wiagaphonobuayat o. Ye, is en an niak hologo togwi holuk e, his heniak hologo tuayat o. 21Asogo a’geat de, is en, at an peraknobou waga a’ge ano ebe eneperlak ai en e,
Is yu at osi, oluk, wene mo’gulhentegis ai ’berlegat takhonobouwa o. 22An wegirik, wene ’berlek ai is mo’gulonto erlakma en wellema re, is wiak oluk wene enebam poluk wellep erlak ani o. A’geat de, yogodak, wene mo’gulentau wegi ai en e, is en,
An wiak tu erlak, oluk, wene enebam a’ge no’gorlu miayat aga o. 23At ap sa enapseri werak nebasu holuk e, an naik ebe at apserirak pasu o. 24Is aphwami pema akhit en togwi modok erlak a’ge, di wene yu wene enilem taga legi ano tagalle erlakma re,
Is wiak, oluk eli erlak o. Asogo a’geat de, an en wene ai ’berlegat tisokhwe enil niegesarik en, an naik ne’birek modok enapserirak nonobogwi o. 25#Mzm. 35:19; 69:4Asogo a’geat de, Allah en,
Disogo tip, asogo tip, oluk enesa’go weregei wene ano pam, iak disogo pelal wogo oruak,
Wene edip erlakmayat, is en an enapseriapnebegesa,
oluk egeimu, pelal wogo pegesa a’ge ai demat emagoluk asogoat togwi o.
26His lethentasu lemagoluk Allah Arogun dem wene mo’gulontouwagoluk wago a’ge ai, an naik oruakma en his hene’bek perakpou wagoam e, at en an nobok ’baksogo mo’gulhentasu lema o. 27At en an nobok asogo osokhwe, his ogo re, an his henemin naduk nadugat welege ai en e, his en an nobok ’baksogo mo’gulontogu lorogubat o,” oluk mo’gulentesi.
اکنون انتخاب شده:
Yohanes 15: Wul
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
