Yohanes 1
1
Dem Wene ai abat aga wene
1Page edip pam en, wene Dem Wene welaga. Dem Wene ai re, Allah eminat welat e, ebe Allah at o. 2At ai page edip pam enat Allah emin welat e, 3Allah en di a’ge yu a’ge ’berlegat walhil waga ai ebe re, at Dem Wene enat walhesi. At ebe erlak wellepma re, mesigat nak ogo walhelep erlak o. 4Nenelalugapnenebiso a’ge edip arat welago ai en e, nis aphwami dakharak nonobou waga o. 5Nis o hiktak oruakma dakharak nonobou waga a’ge ’gwielak oruakma, o hiktak ai en orlomong ho mia en ’gwielagat welago yo.
6-7 #
Mat. 3:1; Mrk. 1:4; Luk. 3:1,2 Ye, o dakharak nenebasu a’ge ai aluk a’ge en obok mo’gulnontouwagoluk e, Allah en ap onuk Yohanes ai yo’go poluk perakpou waga. Perakpou wagama waga ai re, dakharak nenebasu a’ge ai, obok aphwami ’berlegat mo’gulentasuam, enede at ebam he’berik pou wagoluk waga ai o. 8At Yohanes ebe dakharak nenebasu a’ge ano puk. We, at dakharak nenebasu a’ge ai obok mo’gulnentaigoluk waga. 9At dakharak ebe demat a’ge ai, ’gwiangma yema wagalat, nis aphwami ’berlegat nenebe lo’bok dakharak nonobou waga.
10At enat ’bogorl ’gwiang walhesi a’geat de, at ebe ’gwiangma wagarik oruakma re, is aphwami ’gwiangma a’ge yema en, at ebe pobirak erlak welegesa. 11At u’gwarek owi pam waga a’geat de, at ue ari en ebe wo erlakma en ukpegesa. 12Asogo ukpegesa a’geat de, is aphwami nin pema en, at ebe wegesarik e, enede at ebam he’berik pegesema, Allah eiyagai demat a’ge emagoluk eiyerak enebesi. 13Eiyerak enebesimu, at eiyagai egesa ai re, aphwami eneiyagai dakhorlo enagai en pelelonobogulat mep a’ge odoksogo dagonobogwi ai ’gela’ge puk. We, at Allah enat dagenebegei yo.
14Dem Wene ano abat agarik e, neneminat welege o. Neneminat welat e, at ebe ai Allah omlogo mesigat dogo a’ge no oluk e, erliktogwi a’ge nenil hege o. At ebabut op en, opsogo taknenebasulat, wene dem wene mo’gulnentasulat, tago modok oruakma nenil hege o.
15Wene at ebe paget Yohanes en disogo mo’gulentesi,
“An ne’berlik pobuk ap akhen wema o, oluk obok mo’gulhentasu legi ano re, ebe yuat o. At yu pobuk an ne’berlik waga a’geat de, ebe an owan dagom erlak oruakhwe, at nadugat welaga ai en e, an nebe mia o. ’Gain e, arat o,” oluk, iak loksogo mo’gulentesi.
16Ye, at ebabut modok op en nenebe ’berlegat pobuk naduk obapnenebiso yo. 17Wene Allah en nenesa’go weregei a’ge ano mo’gulnontouwagoluk, nadugat Musa perakpou wagama, mo’gulnentesi a’geat de, Allah ebabut op en obapnenebiselat, dem wene mo’gulnentasulat, tuagoluk, Yesus Kristus perakpou wagama mo’gulnentesi ai o. 18Ye, aphwami logon en Allah ebe enil modok ho erlak a’geat de, at omlogo mesigat dogo aik eragam emin hegit welagai a’ge ai enat Allah ebe se’geksogo mo’gulnentau waga ai yo.
At Yohanes u’gwarek paget obok ’beli’gogo mo’gulentesi wene
(Matius 3:1-12; Markus 1:1-8; Lukas 3:1-18)
19At Yohanes en wene asogo mo’gulentasu oruakma, is ap Allah eiye a’ge emin, ena’gul onuk Lewi a’ge emin, enemin en e,
“Yohanes. Hat hebe sa ’gela’ge no,” oluk, ebam hin wouwagoluk, ap Yahudi a’ge o Yerusalem en peragonobou wegesema Yohanes e’bek wegesa. 20Wegesarik, at ebam hin wegesema re, at Yohanes en u’gwarek obok elabesogo mo’gulonto erlak, we selakma ’baksogoat mo’gulentasulat e, disogo mo’gulentesi,
“An nebe re, aphwami delnenebiso a’ge Allah en yo’go poluk perakpou weik egei a’ge ano re, puk. Erlak o,” oluk mo’gulentesi. 21#Ula. 18:15,18; Mal. 4:5Asogo mo’gulentesimu is en e, disogo mo’gulegisa,
“Holuk e, hat hebe sa no. Hebe Elia ya?” oluk mo’gulegisema, at en e,
“An nebe at ai puk o. Muat o,” oluk, mo’gulentasu lagama, is en e, disogo mo’gulegisa,
“Holuk e, ap mesik Allah iak mo’gulnentasu lemagoluk yo’go poluk perakpou weik egei ano hwi a?” oluk mo’gulegisema, at en e,
“Ai pugat o,” oluk mo’gulentesi. 22Asogo mo’gulentesimu is en e, disogo mo’gulegisa,
“Holuk e, hat e, hebe sa no. Nis wene se’geksogo mo’gulnentagunmu re, is ap nis peraknonobou wegesa a’ge, nis en wene mesik mo’gulentai lulmu re, hat hu’gwarek hobok no’gosogo ese legen. Nenaluk emagoluk, pobisogo mo’gulnentemen da,” oluk mo’gulegisa. 23#Yes. 40:3Asogo mo’gulegisema re, at Yohanes en disogo mo’gulentesi,
“At Yesaya Allah iak mo’gulentasu laga a’ge ano en, disogo egei o,
Ap mesik o leimu aphwami erlakma eba en iak ngai eselat e,
Nonue ’gain Onuk Logo a’ge ebela wema’gwe hegitsogo yorogu lemis o, oluk, ese lema o,
oluk egeimu pelal wogo oruak ano re, nebe anat o,” oluk mo’gulentesi. 24Is ap wegesa ai re, is ap Farisi a’ge enat peragonobou wegesema wegesarik, logon disogo mo’gulegisa,
25“Hat en e,
An nebe re, aphwami delnenebiso a’ge Allah en yo’go poluk perakpou weik egei a’ge ano erlak o. Ye, Elia erlagat o. Ye, Allah iak mo’gulnentasu lemagoluk perakpou weik egei ano erlagat o, e’gen a’geat de, aphwami ik olomu ’belabenebise legen ai nopaget,” oluk mo’gulegisema re, 26at Yohanes en e, disogo mo’gulentesi,
“An en aphwami weat ik olomu ’belabenebise legi a’geat de, ap mesik his en ebe pobirak erlak a’ge hene’gerlakma edik oruak o. 27At ai ebe pobuk an ne’berlik waga a’geat de, at ebe ’gainat o. An nebe malik wei a’ge ai en, at oyuk owi herle hettak a’ge ai, an en hebelu mia o,” oluk mo’gulentesi. 28Wene asogo egesa ai re, at Yohanes en aphwami ik Yordan etle akhit, ik olomu ’belabenebise lagama eba, o onuk Betania welat en egesa.
At Yohanes en Yesus ebe mo’gulentesi wene
29Wene asogo egesarik, nogo oluk, hubet o’gwe re, at Yesus Yohanes e’bek wagokhwe il yetholuk e, wene disogo mo’gulentesi,
“Allah uam domba a’ge nis aphwami ’gwiangma wiak togu lege a’ge no’gorlogo ukpouwa a’ge ano waga etle henil yethemit o. 30Nadugat wene an en mo’gulhentasulat e,
Ap mesik ne’berlik wema a’geat de, an owan dagom erlak oruakhwe welaga ai en, an nebe malik wei a’geat o. Ye, at nak e, ’gain o, oluk, obok mo’gulhentasu legi ano re, at ebe waga aiat o. 31An nadugat, at ebe neperlakma re, sa hweat, pobirak erlak welegi a’geat de, aphwami Israel a’ge at ebe enaluk emagoluk ik olomu ’belabenebise leigoluk wegi o,” oluk mo’gulentesi.
32Asogo mo’gulentesirik, pobuk at il hesi a’ge ’baksogo disogo mo’gulentesi,
“Allah Arogun sue ’berl ’gela’ge ’bogorl pam en ’bu agarik Yesus ebam duktak oruakma nil hegi o. 33Ai erlige, at ebe sa hweat an neperlak welegi a’geat de, Allah en an aphwami we ik olomuat ’belabenebise lemagoluk peraknobou waga a’ge ano en mo’gulneselat e, disogo mo’gulnesi,
An Narogun ap mesik ebam duk la’bumarik oruakma hil hagun holuk e, at ai en aphwami ik olomu ’belabonobu ’gela’ge, Narogun enebam ’belakpou waga lema o, oluk, mo’gulnesimu no oluk e, 34at ebe nil dokhumsogo hegirik pobi tegis o. Asogo pobi tegistik, at ai Allah omlogo demat o, oluk, obok his ’baksogo mo’gulhentasu legi yu i o,” oluk mo’gulentesi.
At Yesus osi naduk-naduk e’berlik legesa wene
35At Yohanes en asogo mo’gulentesirik nogo oluk hubet o’gwe, at Yohanes ebe emin, osi iak wogu legesa a’ge enebe ’biren emin, enemin, eba edik welegesa. 36Asogo oruakma, Yesus ebela’gwe ai laigoluk wagoma Yohanes il yethesirik e, disogo mo’gulentesi,
“Allah uam domba a’ge ano waga etle yethemit,” oluk mo’gulentesimu, 37osi enebe ’biren eriano en at iak mo’gulentesi a’ge enesa’go hweligisarik e, Yesus e’berlik legesa. 38Asogo e’berlik lagaimu, Yesus orogole edenogo il yerontoluk e, disogo egei,
“Nosi, his no heratil wegep,” oluk mo’gulentesimu, is en e, nis neniak pam,
“Wene mo’gulnentasu legen a’ge nue,” oluk u ’gela’ge, is eniak pam,
“Rabi nue. Hat howi o ’geba welegen a’ge o,” oluk mo’gulegisema, 39at en e,
“His en henil domok hagup en manis o,” oluk mo’gulentesi. Asogo mo’gulentesimu, at e’biregat emin legesarik e, o mo ’gorok i lasukhwe jam 4 sore ’gela’ge, at welagama ebano enil hegesarik, emin welegesa.
40Ye, is ap enebe ’biren Yohanes iak osokhwe enesa’go hweligisarik, Yesus e’berlik legesa a’ge eriano ap mesik onuk e, Andreas, Simon Petrus ano ot. 41Yesus e’berlik loluk emin welegesarik e, at Andreas ai naduk ue Simon ano heratil lagarik, e’birek sarlok tigisarik e, disogo mo’gulesi. Nis neniak pam Kristus aphwami delnenebiso a’ge Allah en yo’go poluk perakpou weik egei ano u ’gela’ge re, is eniak pam, Mesias oluk,
“Mesias ano nis nenemin arat sarlok tige,” oluk mo’gulesi. 42Asogo mo’gulesirik e, Yesus e’bek woluk wagama, at Yesus il at ebam yetholuk e, disogo mo’gulesi,
“Simon Yona omlogo yu, not o. Hat honuk Kefas ogu lemagoluk tualegis o,” oluk mo’gulesi. Asogo mo’gulesi ai re, nis yema neniak pam onuk helep ia u ’gela’ge, Yunani eniak pam Petrus ogwi ’gela’ge, Ibrani eniak pam onuk Kefas oluk tuelak pesi ai o.
At Yesus en Filipus Natanael e’birek yo’go enebesi wene
43Onuk asogo tualegeitik, nogo oluk hubet o’gwe re, at Yesus o Galilea orlu weigoluk epesirik orlu waga ’gal e, ap onuk Filipus emin sarlok tigisarik e, disogo mo’gulesi,
“Not o. An ne’berlik suk o,” oluk yo’go pesimu e’berlik laga. 44At Filipus ai re, Andreas emin, Petrus emin, enemin onowi seli o Betsaida mesikmu a’ge. 45E’berlik lasulat, at Filipus ano pobuk ap Natanael emin sarlok tigisarik e, disogo mo’gulesi,
“Natanael. At Musa wene Allah en nenesa’go weregei a’ge wene ano pam, ap mesik obok eselat pelal wasulat, ye, is ap Allah iak mo’gulontogu legesa a’ge ebano en obok ogulat pelal wogulat, tigisa a’ge ebano, nis arat nemin sarlok tige o. At ebe re, Yusuf omlogo o Nazaret a’ge Yesus at o,” oluk mo’gulesi a’geat de, 46at Natanael en e, disogo mo’gulesi,
“A! O Nazaret eba en op a’ge mesik elirat wema no? Mia o,” oluk mo’gulesimu, at Filipus en e,
“Hat hil domok hanok en suk o,” oluk mo’gulesi. 47Asogo mo’gulesimu, at Natanael Yesus e’bek weigoluk wagoma, at Yesus il yetholuk, at obok disogo mo’gulentesi,
“Ap ai ebe Israel a’ge demat a’ge. At iak ’biren oso modok erlak a’ge ai yethemit!” oluk mo’gulentesimu, 48at Natanael en e,
“Eige! Nue. An taga legi a’ge nebabut no’gosogo en haluk aga o,” oluk ebam hin wesimu, at Yesus en e, disogo mo’gulesi,
“Not o. Filipus en hat owan worlhio erlak oruakhwe, hat hebe e ara edipmu hweriogo welegen ano, an naduk yethiegi o,” oluk mo’gulesimu 49at Natanael en e, disogo mo’gulesi,
“Nue. Allah omlogo nis Israel a’ge nonue ’gain Honuk Logo a’ge harat hiegi o,” oluk mo’gulesi. 50Asogo mo’gulesimu, at Yesus en e, disogo mo’gulesi,
“An en,
Hat e ara edipmu hweriogo welegen ano an arat yethiegi ani o, oluk, mo’gulhegis ai pam pobi nebigen a? Ai re, we weisogo ’gela’ge tisokhwe niegen a’geat de, pobuk e, loksogo tagokhwe hil niagun o,” oluk egeitik, 51#Kej. 28:12pobuk wene mesik disogo mo’gulentesi,
“Pobuk ’bogorl hialogo is malaikat Allah en yo’go peragonobou wago a’ge ebano, an abat daklau wegi a’ge ano nebam ligagalat, ’bu agalat, tugukhwe henil niogu lorogup ani o, oluk niak demat mo’gulhentegis o,” oluk mo’gulentesi.
اکنون انتخاب شده:
Yohanes 1: Wul
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
