MATIUS 14
14
Ap yi maroso nap Yoanes na wiridnak wene
14:1-12
(Mk 6:14-29; Lk 9:7-9)
1Ereya tarem-e o Nggalilea tena woraso nagawan Erores-nen-e Yesus obok kulij-o. 2Kuluruk yarik, at-nen at eyabu wanugwi nap na yak ondosolar-e: ”At yu-ge ap yi maroso nap Yoanes na-ge wat yidnak nap ennggendumu-nen uruk yidnak-nen yusu-o. Uruk yidnak me, at arem-e kwiye worak mende kwarurak amawi worasu-o” luk yij-o.
3Nde, Erores na-nen-e Yoanes na tenaguruk, kere kamasa o kubu me pil nggwij-o. Iri kwarid iri-ge at owot Pilipus na ogwe Erorias na wene lit lit-nen iri kwat ibij-o. 4Nde, Yoanes-nen at yak tosolar-e: ”Kwe Erorias wanigen yu-ge meya-t kwarigen-o” luk yak tij-o. 5Erores na-nen-e Yoanes na wururak peragaij-et nde, ap kwarat ereba-nen-e Yoanes na-ge Mbal Pem Nagawan ene lomboksa yoso nap-nen yusu-o yugwi alama, it inndi aye-nen larok yij-o.
6Alat nde, at Erores na ndesa mbidnak tarem inik inik, yogolar-e, ap kwarat iri na inmbriri bem Erorias ara na-ge ndawi ndorosolat kot kasolar-e, la kwe na-nen Erores na alen tak posoloma-ge, 7at-nen la kwe na yak tosolar-e: ”Kat kindi-n peragun mende iri-ge mondok wok kirimin-o” luk owak mbarij-o. 8Iri yak tosoloma-ge, la kwe na ija-nen wene yu emndam tak posoloma-ge, la kwe iri-nen yosolar-e: ”Ap yi maroso nap Yoanes na anggul mbara piring pem puruk yanem-et wok niril lobok yi-o” luk yij-o. 9Iri yosoloma-ge, nagawan-nen-e umud kwarat kagaij-et nde, at-nen yonggo inpid nap kwarat ereba na inmbiri bem wog-et kirimin-o luk owak mbaridnak me, at-nen-e: ”La kwe yu-nen nggi yid irit kwasa wok til lobok yer-o” luk wene yak indij-o. 10Iri ala-ge, ap ndimirik enpamu, o kubu me iri me-nen Yoanes na urusu mbariga-o. 11Mbarigarik, anggulwak na-ge piring pem puruk, la kwe iri na wok tikma-ge, at-nen-e ija eram waruk mbirij-o. 12Nde, Yoanes imin nugwi nap na lobok yigarig-e, at orogwak waga yapma puruk, iri wene-ge Yesus yak til mbiriga-o.
Yesus-nen ap limaribu mburu mak indid wene
14:13-21
(Mk 6:30-44; Lk 9:10-17; Yo 6:1-14)
13Yesus na wene iri kuluruk yarik, e koma arem ngguruk, arig-et nak ap lak ma ereba mbirij-o. Mberamu-ge, ap kwarat-nen iri wene kuluruk, unuwi lombok-nen nggweyak tu at imbirik mbiriga-o. 14Yesus na e koma arem-nen kenangga mbidnggal-e, ap kwarat eneyaruk, at-nen it enabuwa yuruk, indi andi luk, kugi worak nap ereba na-ge ki rak inpij-o.
15Iri rak unpuruk, keyama nggwe-ge at owosirag-e at eram wok luk-nen at yak togolar-e: ”O yu me-ge ap lak ma me, o na komo ki yamu me, ap yeba-ge nunggwi mende onggo paga nujwak-nen o siri lombok wirik inpi-o” luk yiga-o. 16Yogolikma-ge, Yesus-nen wene erep nggarosolar-e: ”It mbururag-e lag-o. Kit-net nunggwi mende mak ender-o” luk yij-o. 17Yosoloma-ge, it-nen yogolar-e: ”Nit nendam-e mburu-ge lima, keyane-ge mberen nak worasu-o” luk yiga-o. 18Yogolikma-ge, Yesus-nen yosolar-e: ”An neram yu me waruk lobok yer-o” luk yij-o. 19Yurug-e, ap ereba na yak ondosolar-e: ”Tusuwangge bem kore yer-o” luk yak unduruk-nen mburu lima ereya na min keyane mberen ereya min wanuruk yarik, erengen aid arem nggwe lik karok woralat-nen-e Mbal Pem Nagawan wa yak tij-o. Iri luk, mburu ereya na ndek pendeksa at owosirak ininggem pamu-ge, it-nen-e ap ereba na tembesa mak indiga-o. 20Mak ondogolikma-ge, it pidsa inmbitsa nonggola karuk, erep minggirik ereba na-ge ndok wiriganggal-e, mul sum duabelas irit kobong yij-o. 21Nde, mburu iri ningga nab-e ap nag-e limaribu-o. Nde, mburu ningga kwami min li marik min-e wonarigit lag-o.
Yesus-e yi ombolwak pem lobok yidnak wene
14:22-33
(Mk 6:45-52; Yo 6:15-21)
22Iri rak purug-e, Yesus-nen ap kwarat iri na ”Kenma mberer-o” luk yak ondosolat-net at abuwok nanduk eyak ele bem ndil lujwakluk, Yesus-e at owosirak na-ge e koma arem inpil nggwij-o. 23It iri na wirik onposoluk, at ariget nak tepan yekluk ndobo misik pem lagaij-o. Lagarik, at ariget nak iri me worala, o ndamuk yamu, 24at owosirak nggwiga e koma na-ge yi koma enggendumu nggal wok yukmu-ge, obube kwarat puk kil lobok yosolar-e, e koma na-ge yi-nen logus perel tak pij-o. 25Nde, kubu o nda nda jam tiga nggal, Yesus na-ge yi ombolwak pem it iri na endam lobok yij-o. 26Lobok yosola-ge, at owosirak-nen yik kaiga nggal, ar-e yi ombolwak pem lobok yosola-ge, ”Iri-ge ngena-o!” luk, kwiye kwarat luk, ene ya nga mbiga-o. 27Mbogolikma-ge, ereya na-net Yesus-nen it yak ondosolar-e: ”Kinndi tugup lak wolmer-o! An-net yusu-o. Kwiye kali-ge meyog-o” luk yak indij-o. 28Yak ondosoloma-ge, at Peterus-nen wene erep nggarosolar-e: ”Nagawan Indo wa-e. Ndemeret kar-et nde ala-ge, ’Yi ombolwak pem an neram lobok yi-o’ luk yak niri-o” luk yij-o. 29Yosoloma-ge, Yesus-nen yosolar-e: ”Lobok yi-o” luk yij-o. Yosoloma-ge, Peterus na-ge e koma arem-nen kenangga mburuk yarik, yi ombolwak pem Yesus eram mbirij-o. 30Alat nde, at-nen obube amawi kwarat iri kasolar-e, kwiye karuk, yi arem yubuk yosolat-nen: ”Nagawan Indo wa-e. Nimiri yi-o!” luk ene ngguloksa yij-o. 31Yosoloma-ge, Yesus na ereya na-net at inggi pil mbarik, at tenaguruk-nen yosolar-e: ”Kwara kindi angin tubu yoso buk nap wa-e. Kar-e noluk-nen kindi angin tubu yigit lak yigen-o?” luk yij-o. 32Iri luk, it enmberek na e koma arem nggogola-ge, obube na kondok yij-o. 33Kondok yosoloma-ge, it e koma arem woraiga nap-nen Yesus erembel wanogolar-e: ”Kar-e ndemeret Mbal Pem Nagawan Ambara-nen yusu-o” luk yiga-o.
Yesus na-ge o Nggenesaret-nen ap ki rak inpid wene
14:34-36
(Mk 6:53-56)
34It iri na-ge yi koma bem eyak ele bem ndil laigarig-e, o Nggenesaret wok yogola-ge, 35o iri me woragwi nap-nen Yesus lobok yidnak karug-e, at lobok yidnak wene-ge o iri me wigaril mborogola-ge, kugi indidnak nap oboksa-ge at eram inpil lobok yiga-o. 36Iri luk, it-nen-e: ”Kusum unggut marig-et tenabuwog-o” luk at emengen mbarogolat woraiga-o. Nde, at usum erep ininggi pidnak nap oboksa-ge ki yiga-o.
انتخاب شده:
MATIUS 14: inondx
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
@LAI 1992, 1994
