LUKAS 17
17
Meya yidnak pem nggomo indidnak wene
17:1-4
(Mt 18:6-7,21-22; Mk 9:42)
1Yesus-nen at owosirak yak ondosolar-e: ”Meya yuwakluk ap enarem woraga pil nggurak mende lak ma-ge lag-o. Irit pempa kwarogolat wolma-o. Alat nde, nin nap meya rak inpili nap enpem mbuma mende bem enabuwa-o! 2Nde, ap li marik nggal ndeyak yeba ennggendumu ap misiger-o luk tet meya yuwakluk arem woraga pil nggusu nap iri perak nde, kerep nggulok mbi at urusuwak pem tiyong tak puruk, yi koma arem peleksa ibil nggurak perak ob-o. 3Kir-e kwil kwalsa wolmer-o.
Kat kowe kowot mbi meya yosola-ge, ’Iri nggal kwarurak pug-o’ luk yak turag-o. Nde, at na kondok yosola-ge, at meya yidnak kamberam tak purag-o. 4O misik pem nag-et nde kanggam-nen nde tuju bem-et meya rak kuburuk, tuju bemet kat keram lobok yosolat-nen ’Nab-o. Kat kimin meya yigi-o’ luk yosola-ge, at meya yidnak kamberam tak purag-o” luk yak indij-o.
Inndi angin tubu yurak wene
17:5-6
5Nde, wirik inpidnak nap-nen Nagawan Indo yak togolar-e: ”Nit ninndi angin tubu yidnag-e kwara amawi rak pi-o” luk yiga-o. 6Yogolikma-ge, Nagawan Indo-nen yosolar-e: ”Kit kinndi angin tubu yidnak nde sawi uwi kubuk lan iri nggal woragolat-nen nde, e wariya yu yak togolar-e: ’Kar-e konoksa yi koma arem yak yil mbiri-o’ yak togola-ge, kit-nen yak tugup iri nggal-et kwaruwa-o” luk yij-o.
Ndegel oboso nap-nen kwarurak wene
17:7-10
7Yuruk, Yesus-nen yosolar-e: ”Kit misig-e ndegel konposo nap mbi-ge yabu wanoso ala na, lomba wam yik karok woraso ala na, yabu ebem pidnak na wanuruk lobok yosola-ge, kit-nen-e: ’Ndag-et nak nunggwi mende yu min-o’ luk yak tugub-a? 8Mondok lag-o. Are, yu nggal yak tugub-o: ’An norak mende nanduk lid lud tak puruk, kusum konak yutluk, an mburu min yi min nasola-ge, ndegel nubugun-o. Nde, an namu-nen kar-e mburu min yi min nunggun-o’ luk yak tugub-o. 9Nde, ndegel oboso nab-e at eid-nen yak tidnak irit kwarosola-ge, entembel wanugwi-a? 10Kit-nen na iri nggal-et kwarurag-o. ’Kit-nen kwarer-o’ luk kenpem pidnak mende na ndegera kwatlug-e, yu nggal yurag-o? ’Nir-e we ndegel ubugwi nap-nen yili-o. Nir-e nenpem pidnak mende iri na-t kwarogolat woraige-o’ luk yugup na-e” luk yij-o.
Yesus-nen ap sepulu ki rak inpid wene
17:11-19
11Yesus na Yerusalem mborosolar-e, Samaria wok Nggalilea wok iri nggwe mbirij-o. 12Mborosolar-e, o siri misik me wok yidnggal-e, mbijap nggal enpem idnak nap sepulu iri inmin lambuk yij-o. It iri-ge erepma nggal mendak woragolat-nen 13wene ngguloksa yogolar-e: ”Nagawan Indo Yesus wa-e. Nenabuwa ki-o” luk yiga-o.
14Yogola-ge,Yesus na it eneyaruk-nen yak ondosolar-e: ”Ud iri mbenat kunpuwakluk tepan omborak endam mberer-o” luk yak ondosoloma-ge,
it na mburukmu ereya na-net ud ereba na lak yij-o. 15Alama-ge, it ennggendumu-nen ap misik na at ebem mbidnak ud na lak yidnak karug-e, nden karuk ijok lem lobok yosolar-e, ene nggulok pem-et Mbal Pem Nagawan erembel wil wil lobok yij-o. 16Lobok luk, Yesus ijok eralu mbud lug-e, wiwa-o kwarat yak tij-o. Nde, ap iri-ge Samaria nap-nen kwarij-o. 17Iri ala-ge, Yesus-nen yosolar-e: ”Ab-e sepulu ki rak inpigi-t nde, enpe sembilan-e ngge me worali-o? 18Noluk-nen ap sal yu arig-et nak Mbal Pem Nagawan wa yak til lobok yij-o?” luk yij-o. 19Yurug-e,Yesus-nen ap na yak tosolar-e: ”Men luk mbiri-o. Kindi angin tubu yigen iri-nen ki rak kibij-o” luk yak tij-o.
Mbal Pem Nagawan-nen tenagaidnak wi wok yurak wene
17:20-37
(Mt 24:23-28,37-41)
20Parisi nap erep-nen Yesus kin wok obogolar-e: ”Mbal Pem Nagawan-nen tenagaidnak wi-ge mepme tarem-nen wok yuwa-o?” luk yogoloma-ge, Yesus-nen wene erep nggarosolar-e: ”Mbal Pem Nagawan-nen tenagaidnak wi wok yosolar-e, ap-nen karuk yenggerak pugwi mende min wok yuwa bug-o. 21Nde, Mbal Pem Nagawan-nen tenagaidnak wi-ge kit kennggendumu worasu me, ap-nen yogolar-e: ’Nde, ar-e indi me worasu-o. Yu me worasu-o’ luk yurag-e meya-o” luk yij-o.
22Iri lug-e, Yesus-nen owosirak na yak ondosolar-e: ”Abok-nen-e ’Ap Ambara-nen idnak tarem mbi kayeg-o’ luk yugub-et nde, kagup pug-o. 23Nde, abok ap-nen kit yak kondogolar-e: ’Ar-e iri me worasu-o. Ar-e yu me worasu-o’ luk yak kondogola-ge, kir-e ereba na me ogore mbururak pug-o. 24Nde, obinel mbal pem-nen yebek yosola, mbal erep ponok ponok yembak yil mburusu iri nggal-et Ap Ambara an lobok yimin tarem-e iri nggal-et ma-o. 25Alat nde, nanduk nandug-er-e an-e kwarat andi bandi kasolat, yawo worali nap-nen-e insili rak nobogolat ma-o. 26Nde, Nu worala tarem-nen kwariga nggal-et, Ap Ambara an lobok yurak tarem-e iri nggal-et kwat ma-o. 27It pidsa-nen nunggwi mende min yi min nonggolat, kwe wok kerak mbogolat kwat tenak worakmu, Nu na o iri na arem nggosola-ge, yi wasolar-e, it pidsa lak tak inpij-o. 28Lut woragaid tarem-nen na it pidsa-nen-e nunggwi mende min yi min nonggolat, silobulo onggo pogolat, onggo wanogolat, yabu wanogolat, o worogolat woraiga-t nde, 29Lut na Sorom wi keya buruk mborosola tarem-e mbal pem-nen kanduk min emben worak kule (belerang) min nggilara pil mbuwasola, it pidsa lak tak inpij-o. 30Ap Ambara an lobok yimin tarem-e iri nggal-et kwat ma-o.
31Iri kwat ma tarem-e ab-e erema worasoma, at arengge silabaga wolma na-ge wil ludtak pug-o. Iri nggal-et yapmu wolma nab-e tuguruk o ma mbururak pug-o. 32Lut ogwe-nen kwarid iri-ge yeberak wolmer-o. 33Indi abuwa nggok tak puwa nab-e lak ma-o. Nde, ta-nen nde at indi abuwa lak tak posola-ge, urug-et wolma-o. 34An yak kendeyeg-o. Iri kwaruwa tarem kubu-ge ap mberen-e misik mu nene yuwa-t nde, misig-e wok uburuk mborosolat, misig-e keya bosolat ma-o. 35Kweyap mberen-e enmberek mburu marukmu, misig-e wok uburuk mborosolat misig-e keya bosolat ma-o. 36[Mberen nab-e yabu wanukmu, misig-e wok uburuk mborosolat, misig-e keya bosolat ma-o]” luk yij-o.
37Yosoloma-ge, at owosirak-nen at kin wok obogolar-e: ”Nagawan Indo wa-e. Ngge me-nen kwarurak nde yigen-o?” luk yogoloma-ge,
Yesus-nen it yak ondosolar-e: ”Ontogwak woraso sa-ge ontogwak naso towe-nen nil ndok woroso-o” luk yij-o.
انتخاب شده:
LUKAS 17: inondx
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
@LAI 1992, 1994
