Matyu 6
6
Maipanggep iya panangaasi kadiya makasapul
1“Agannad kayu, tasun bekken nga pammasingen nas kadiya toley ya panagwangel nu ka nalinteg. Ta no agten iyan nas ya gapu niya panagwangel nu ka nalinteg, ket awan lugud gun-guna nu nga e̍cde̍ niya Ama nu nga uwed ka langit.
2“Itu nga no mangikaasi ka kadiya makasapul, madi ka kuma ipacpakaemmu kadiya toltoley ya wangwanglem. Ta bekken kayu kuma ngarud nga agten kadito aginsisingpet nga toley nga agpatangguyub met kadiya gigimungan se̍ kadiya kalkalsada, tasun dayawen diya toley da. Pudnu met nga itu wasin ya gun-guna diya agten iyan nga toley. 3Ngem ya kustu nga wanglem kuma nga gennung, no mangikaasi ka, ket madi ka kuma ipakaemmu ya wangwanglem, tasun arig nga madi maemmuwan niya katigid nga imam ya wangwanglen niya diwanan mu. 4Ket no agten iyan, madi ngarud maemmuwan diya sabali nga toley maipanggep iya panangikaasim. Ngem ya Amam nga makasingen kadiya amin nga nalimed, igina met ya manggun-guna ikew.”
Maipanggep iya panagkararag
Luk. 11:2-4
5“Ket no agkararag ka, madi ka kuma pe̍ tultuladen diya aginsisingpet. Ta magustuwan da ya agkararag nga nakasikad kadiya gigimungan se̍ kadiya paguurnungan toley kadiya kalkalsada, tasun masingen diya toley da. Pudnu met nga itu wasin ya gun-guna dan. 6Ngem ikew, no agkararag ka, umuneg ka kuma iya siled mu, ket igiset mu kuma pe̍ ya gagayangan na, ket agkararag ka ngarud iya Amam nga madi masingen. Ket idi nga Amam, nga makasingen kadiya nalimed, ket igina met ya manggun-guna ikew.
7“Ket no agkararag kayu, madi kayu dagdagolliten diya kagi nga awan banbanag da, nga agten iya ugali diya madi makaemmu e̍ Apu Diyus. Agten iyan ngarud ya ugali da, ta ipagarup da nga maipangag ya kararag da no adu ya kagiyen da. 8Ngem madi nu lugud tuladen ya agten iyan nga ugali da, ta ya Ama nu, emmu na met ya kasapulan nu, orey madi kayu pekkem adngen igina.
9“Dikad pe̍ no agkararag kayu, agten idi kuma:
‘Ama mi nga uwed ka langit,
madaydayaw kuma ya napudnu nga turay mu,
10madatngan kuma ya panangituray mu,
ket maariman kuma ya tarigagay mu
idi nga lubung,
nga agten mettas iya maar-ariman enna langit.
11E̍cde̍m kay dakami
ya masapul mi nga pagbiyag ita nga algew.
12Se̍ pakawanen nakami kuma
kadiya basbasul mi,
nga agten met iya panangpakawan mi
kadiya nakabasul dakami.
13Se̍ di nakami kuma
iturung ka pakasulisugan,
no di lugud ilisi nakami iya Managdacdake̍c.’
14“Tutu met nga no pakawanen nu diya toley nga nakabasul dakayu, pakawanen nakayu met pe̍ ya nailangitan nga Ama nu. 15Ngem no madi kayu pakawanen diya toley kadiya basbasul da, madi pe̍ pakawanen niya Ama nu diya basbasul nu.”
Maipanggep iya panangiparit iya beggi nga mangan
16“Ket no uwed kari nu gapu iya pammati nu, nga mangiparit iya beggi nu nga mangan, singen nu tasun madi kuma mad-adlaw iya langa nu ya panaganus nu, nga agten iya gangey diya aginpapasnec. Ta pasabaliyen da ya langa diya rupa da, tasun masingen diya toley ya panaganus da nga madi mangan. Ket pudnu met nga itu wasin ya gun-guna dan. 17Ngem ya wanglem kuma nga gennung, no uwed karim nga mangiparit iya beggim nga mangan, agpamada ka se̍ agemwas ka kuma ngarud, 18tasun madi kuma maem-emmuwan diya toley nga aganus ka iya madi mangan, no di lugud ya Amam nga madi masingen kuma ngas ya makaemmu idi. Ket ya Amam nga makasingen kadiya nalimed, igina met ya manggun-guna ikew.”
Maipanggep iya nailangitan nga kinabacnang
Luk. 12:33-34
19“Bekken kuma nga ya kinabacnang idi nga lubung ya punduwen nu. Ta ya kinabacnang idi nga lubung, mapirdi ngas met gapu ka bucbuc se̍ kirang, winno matakew nga takawen diya mangtulisan iya baley. 20Ngem ya ipateg nu kuma, itu ya arig nga panangipundu nu ka kinabacnang enna langit. Ta antuni, awan met mangpirdi nga bucbuc winno kirang, se̍ awan tulisan nga makalnec nga mangtakew. 21Ya nailangitan nga kinabacnang kuma ngarud ya ipateg nu, ta no awac ya edyan niya kinabacnang nu, itu pe̍ ya panpanunuten nu nga pe̍yeng.”
Ya arig nga pannakadilag niya beggi
Luk. 11:34-36
22“Agten idi: Ya mata niya toley, itu ya maiyarig ka pannakadilag na. Ket no nabaru ya matam, paglaingan niya amin nga beggim ya wada. 23Ngem no bekken nga nabaru ya matam, ket arig nga uwed iya gicbet ya amin nga parte̍ niya beggim. Ket iya agten iyan, no nagicbet ikew ya wada niya dilag mu, nakaru ngarud met ya gicbet niya kasasaad mu!”
Maipanggep iya panagayat e̍ Apu Diyus
se̍ ya panagayat ka kuwarta
Luk. 16:13
24“Ket no ya tagabu, madi met mabalin nga duwa ya pagsirbiyan na. Ta no duwa ya amu na, guraen na met ya isa, ket ayaten na nga gennung ya isa. Winno patgen na ya isa, ket kalucsew na nga gennung ya isa. Ngarud, no dakayu, madi met mabalin nga agpaay kayu e̍ Apu Diyus se̍ agpaay kayu pe̍ iya panangipateg ka kuwarta.”
Maipanggep iya pakasikuran se̍ pagdanagan niya toley
Luk. 12:22-31
25“Dikad pe̍ idi ngarud ya ibagac dakayu: Madi kayu kuma nga pakadanagan ya pagbiyag nu, nga agten no nagan ya kanen nu winno inumen nu, se̍ madi kayu kuma pe̍ pakadanagan ya beggi nu, nga agten no nagan ya pagkawwes nu. Ta bekken nga didi ya kapatgan, no di ngarud met napatpateg ya biyag ngem kadiya makan, se̍ napatpateg met ya beggi ngem kadiya lupluput.
26“Singen nu lugud diya sibud. Madi da met agmula winno agapit, winno agipundu ka kanen da ka sarusar. Ket ya nailangitan nga Ama nu met ya mangpakan igida. Ket dakayu, di kayu ngarud napatpateg iya imatang na ngem kadiya sibud? 27Ngarud, awan sirsirbi niya panagdanag, ta awan met toley nga makapadeddu iya biyag na, orey no is-isa ngas nga uras, gapu ngas ka panagdandanag na.
28“Se̍ ape̍ nga agdanag kayu maipanggep ka pagluput nu? Kaspagarigan, panunuten nu nga nalaing ya panagdackel diya napaw-is nga belbellad diya ruut iya away. Madi da met agtartarabaku winno agab-abel. 29Ngem kinapudnu na met, orey to Ari Sulumun nga napalaus ya kinabacnang na itun, awan met pagkawwes na nga maipada iya kapaw-is niya orey nagan na kadiyan nga bellad. 30Ket agten iyan ngarud ya arig nga panangkawwes ne̍ Apu Diyus kadiya rucruut iya away. Ruut ngas diyan nga e̍teng ya pateg da, ta orey uwed da ita nga sibibiyag, ket maidungsu da nad ngas met no damlagin. Ket no agten iyan ya kinalaing niya arig nga panangkawwes ne̍ Apu Diyus kadiya rucruut, di ngarud nangnangruna ya panangisagana na ka pagkawwes nu? Paya ngin, nakapsut ngas met ya panamati nu!
31“Agten ngarud to kunec: Madi kayu agdandanag. Madi kayu ngarud panpanunuten nga sidadanag nga, ‘Awac ngata ya pamettan mi ka kanen mi?’ winno ‘Awac ngata ya pamettan mi ka inumen mi?’ winno ‘Awac ngata ya pamettan mi ka pagluput mi?’ 32Bay-an nu ngarud ya agten iyan nga panpanunut, ta amin didi, itu met diya panpanunuten nga pe̍yeng diya di makaemmu e̍ Apu Diyus. Ngem no dakayu, emmu met niya nailangitan nga Ama nu nga masapul nu amin diyan. 33Itu nga diya banbanag maipanggep iya panangituray na se̍ diya nalinteg nga panggep na, itu kuma nga gennung ya ipangpangruna nu nga panpanunuten. Ket iya agten iyan, mae̍cdan kayu pe̍ yin ka amin diyan nga kasapulan nu.
34“Itu nga madi kayu agdanag maipanggep kadiya masapul nu iya sumarunu nga algew. Ta kada sumarunu nga algew, uwed manin tumaud nga pakadanagan nu. Awan kuma idga nu iya pakasikuran nu iya agdama nga algew!”
اکنون انتخاب شده:
Matyu 6: YBT
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© 1990 New Tribes Mission, Sanford, FL 32771-1487, USA.
Printed in the Philippines.
