Matyu 10
10
Dito sangapulu ket duwa nga apustule̍s
Mar. 3:13-19; Luk. 6:12-16
1Ket iya isa nga algew, pinaadenni ne̍ Je̍sus dito sangapulu ket duwa nga adalan na. Ket nitalec na igida ya panangituray kadiya sairu, tasun uwed pannakabalin da nga mangpatalew kadiya sairu se̍ mangpalaing kadiya orey nagan na nga sakit winno dipe̍re̍nsiya niya beggi. 2Ket igida didi diya nagnagan dito sangapulu ket duwa nga apustule̍s: Mona, e̍ Simon nga managan pe̍ ka Pe̍dru, se̍ e̍ Andre̍s nga kabsat ne̍ Simon, se̍ e̍ Santiyagu nga anac ne̍ Se̍be̍dyu, se̍ e̍ Juan nga kabsat ne̍ Santiyagu, 3de̍ Pe̍lipe̍ nge̍ Bartulume̍, e̍ Tumas se̍ e̍ Matyu nga agsingsingir ka buis, se̍ e̍ Santiyagu nga anac ne̍ Alpiyu, se̍ e̍ Tadyu, 4se̍ e̍ Simon nga maawagan ka Pasnec, se̍ to Hudas Iskariyute̍, nga itu to nangiyawat iya Apu.
To pannakaibon dito sangapulu ket duwa nga adalan
Mar. 6:7-13; Luk. 9:1-6
5Ket didi nga sangapulu ket duwa, nibon ne̍ Je̍sus da, nga binilin na da nga kinunen na, “Madi kayu mawe̍ kadiya orey nagan na nga edyan diya bekken nga Hudyu se̍ diya il-ili diya iSamarya. 6Mawe̍ kayu lugud kadiya maiyarig ka karne̍ru nga naiwawan, nga kapututan pe̍ nito Israe̍l. 7Ket mawe̍ kayu ngarud, ket mangaskasaba kayu kuma nga kunen nu, ‘Dandani yin ya panangituray niya Nailangitan,’ kunen nu. 8Palaingen nu diya agsakit, paungaren nu diya natey, paunayen nu diya agkutel, se̍ pagtalawen nu diya sairu kadiya maluganan. Ket didi nga naitalec dakayu, nae̍cde̍ da nga awan bayad na, itu nga madi kayu met agpabayad iya panangitulung nu kadidi.
9“Madi kayu agbalun ka ingina nu nga balituc, pirac man, winno burinsi iya bulsa nu. 10Madi kayu pe̍ agitarey ka legpi, winno parutap nga badu, se̍ re̍se̍rba nga palloka man, winno sacgukud. Ta ya agtarabaku, maikari ngarud nga mae̍cdan ka pagbiyag na.
11“Ket no dumateng kayu iya isa nga ili winno puruc, agsapul kayu ka umili nga rumbeng nga mangsangaili dakayu. Ket ya baley na mettas ya pagdagusan nu, agingga nga di kayu pumanaw iyan nga ili. 12Ket no umuneg kayu iya baley da, kablaawan nu da. 13Ket no tutu nga rumbeng diya bumaley iya kablaaw nu, maipaay kuma ngarud igida ya talna nga nikablaaw nu. Ngem no bekken da nga rumbeng, ket dakayu was met ya pakaipaayan niyan nga talna ngin.
14“Ket no uwed madi mangrispitar dakayu, winno madi da gabay ya dumngeg iya ikasaba nu, ket panawan nu ngarud yan nga baley winno ili yin, nga sapuken nu met iya imatang da ya tapuc iya saka nu.
15“Ket ibagac dakayu ya kinapudnu na, nga no timpu nad niya panangukum, nangnangruna nad nga kaasiyan ne̍ Apu Diyus dito iSuduma se̍ iGumura ngem diya toltoley iyan nga ili nga madi mangrispitar dakayu.”
Ya umbe̍t nga pannakairurumen
Mar. 13:9-13; Luk. 21:12-17
16“Ket ita, ya panangibon ku dakayu, ket arig mettas nga uwed karne̍ru nga iturung ku iya edyan diya atap nga asu nga nauyung. Itu nga agsalsalingag kayu kuma ngarud nga arig nga malaga, se̍ nanacman kayu kuma pe̍ nga arig nga kalapati.
17“Agannad kayu ngarud kadiya duduma nga toley, ta iyawat dakayu nad kadiya kunse̍hus da, se̍ sapliten dakayu ka latiku iya uneg mettas diya gigimungan da. 18Ket gapu iyaken, maisangu kayu nad kadiya agtuturay se̍ ar-ari. Ket itu nad ya gundaway nun nga mangipakaemmu igida se̍ kadiya bekken nga Hudyu, maipanggep iyaken. 19Ket nad no ipasangu dakayu, madi kayu madanagan no kumaan kuma niya kagiyen nu, winno no nagan na kuma ya ikagi nu igida. Ta iyan nga kanitu, maipakaemmu nad dakayu no nagan ya kagiyen nu. 20Ta ya kinapudnu na, bekken nga agtaud nad dakayu diya ikagkagi nu, no di ket agtaud iya Ispiritu mettas niya Ama nu, nga igina ya agkagkagi nad gapu dakayu.
21“Ket diya toltoley, iyawat da nad nga ipapatey orey diya kakabsat da mettas. Ket agten nad pe̍ iyan ya wanglen diya ama kadiya anac da. Agten met pe̍ diya anac, sukiran da nad met diya naganac igida, ket ipapatey da nad da. 22Ket no dakayu, kagura dakayu nad diya amin nga toltoley gapu mettas iya pannakitipun nu iyaken. Ngem maisalakan met diya mangitured kadiya agten kadiyan agingga nga di da pekkem malabes. 23Ket no irurumen dakayu diya toltoley niya isa nga ili, agtalew kayu was iyan, nga mawe̍ kayu iya sabali. Ta ya kinapudnu na, sacbay nga matungpal nu nad ya pakaibonan nu kadiya amin nga il-ili niya Israe̍l, ket agparang met ya Anac nga Naipatoley yin.
24“Emmu nu nga ya agad-adal, bekken met nga nangatngatu ngem iya mangisursuru igina. Agten pe̍ ya tagabu, bekken met nga nangatngatu ngem iya amu na. 25Kustu no matulad kuma niya agad-adal ya ugali niya mangisursuru igina, se̍ no matulad kuma niya tagabu ya ugali niya amu na. Ket iya agten iyan, no iyaken nga maiyarig ka apu niya isa nga baley ya panaganan diya toltoley nga Be̍e̍lse̍bub, di ngarud nakarkaru ya dake̍c nga ipaay da dakayu nga maiyarig ka kabbalay ku?”
E̍ Apu Diyus kuma ngas ya kansing tida
Luk. 12:2-7
26“Dikad pe̍ madi kayu kuma ngarud mansing ka toley. Ta ya kinapudnu na, masapul nga maiparangarang nad diya amin nga palimed ita, se̍ maipakaemmu nad met diya amin nga madi naipadlaw ita. 27Ngarud, diya ibagbagac dakayu ita nga sililimed iya gicbet, ipakaemmu nu nad met nga silalatac iya wada. Ipakaemmu nu ngarud diya banbanag nga naiyasasim dakayu ita, nga arig nga ipkaw nu nad manipud iya tuctuc diya babaley. 28Ket bekken kuma nga diya mabalin nga mangpatey ngas iya beggi ya kansing nu, ta madi da mabalin ya mangpukaw iya kararuwa. Ngem ya kansing nu kuma nga gennung, ket e̍ Apu Diyus. Ta igina, uwed lugud ya turay nga mangpatey iya beggi se̍ mangpukaw pe̍ iya kararuwa ka impiye̍rnu.
29“Panunuten nu pe̍ yani: No diya sibud nga lignes, malaku da met ka pisus ngas ya duwa. Ngem orey e̍teng ya pateg da, awan met orey isa igida nga matey, no di pekkem ipalubus niya Ama nu. 30Ket no dakayu, orey ya bilang mettas diya ebbuc nu, emmu na met pe̍. 31Dikad pe̍ madi kayu lugud mansingin, ta napatpateg kayu met ngem iya orey adu nga lignes.”
Ya pagbanagan diya mangilibac e̍ Kristu
Luk. 12:8-9
32“Itu nga amin nga mangipakaemmu nga siaannamung iya imatang diya toley iya pannakitipun da iyaken, ket ipakaemmuc nad pe̍ nga siaannamung iya imatang niya Amac nga uwed ka langit ya pannakitipun ku kadiyan nga toley. 33Ngem ya mangipakaemmu iya imatang diya toley nga di nac kanu annamunganin, ket ipakaemmuc nad met iya imatang niya Amac nga uwed ka langit, nga madic pe̍ annamungan nga pulusin.”
Ya panagkukuntra diya toley gapu e̍ Kristu
Luk. 12:51-53, 14:26-27
34“Mabalin nga ipagarup nu nga inumbe̍t tac tasun pagtutunusec kuma diya toltoley idi nga lubung. Ngem ya kinapudnu na, ya numbe̍tac, bekken nga agbanag ka panagtutunus diya toley, no di lugud agbanag ka panagkukuntra da. 35Ta ya numbe̍tac, ket tasun mangpakuntra ngac kadiya toltoley. Ta gapu iyaken, maikuntra met ya lalaki iya ama na. Ket ya anac nga babey, maikuntra pe̍ iya ina na. Ket agten pe̍ ya manugang nga babey, maikuntra met iya katugangan na nga babey. 36Ket diyan nad kabbalay mettas niya toley diya gumura igina.
37“Ket ya toley nga napatpateg igina ya ama winno ina na ngem iyaken, bekken nga maikari nga maibilang nga toley ku. Se̍ agten pe̍ no ipatpateg niya isa nga toley ya anac na nga lalaki winno babey ngem iyaken, bekken met nga maikari nga maibilang nga toley ku. 38Se̍ bekken pe̍ nga maikari nga maibilang nga toley ku ya madi mangitured iya arig nga panangagtu na iya krus na nga pakailansaan na mettas, tasun sumurut iyaken. 39Ket ya mangipaidam iya biyag na, mapukaw nad mettas igina ya kaipapennan niya biyag na. Ket ya mangipalikud nga gennung iya panangipateg na iya biyag na gapu iyaken, masmac na nad ya kaipapennan niya biyag na.”
Maipanggep kadiya mae̍cdan ka gun-guna
Mar. 9:41
40“Ket ya mangrispitar dakayu, maibilang nga iyaken mettas ya rispitaren na. Ket iya agten iyan, ya mangrispitar iyaken, rispitaren na met pe̍ ya nangibon iyaken. 41Ket ya mangrispitar iya isa nga mammadtu gapu iya panangipateg na kadiya ibon ne̍ Apu Diyus nga mammadtu na, ket mae̍cdan nad iya agten mettas nga gun-guna nga mae̍cde̍ kadiya mammadtu. Se̍ ya mangrispitar iya isa nga nalinteg nga toley gapu ta napateg igina ya panagariman kadiya nalinteg, ket mae̍cdan nad met iya agten mettas nga gun-guna nga mae̍cde̍ kadiya nalinteg nga toley. 42Ket tutu met nga siguradu nga magun-gunaan nad ya orey mangpainum ngas ka danum iya isa kadidi nga naibilang nga nababa ngas nga toley, no painumen na gapu ta emmu na nga pasurut ku,” kunen ne̍ Je̍sus.
اکنون انتخاب شده:
Matyu 10: YBT
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© 1990 New Tribes Mission, Sanford, FL 32771-1487, USA.
Printed in the Philippines.
