Matta 4

Ibȓis itjarrab Siḏiṯneɣ Ƹisa

1Ssenni Arruḥ nni n Arebbi yuwi Ƹisa ɣar ȓexȓa ḥima aṯ ijarreb Ibȓis. 2Wami iẓumm Ƹisa arbeƹin yum jar ǧiyaȓi ḏ wussan yusa-as-d jjuƹ. 3Ikkar wenni itjarraben iqarreb-d ɣar Ƹisa inna-as: "Meȓa cek ḏ Mmis n Arebbi, ini-yasen i yizra-ya aḏ ḏewȓen ḏ aɣrum."

4Indeq-d Ƹisa inna-as: "Lla, Lkitab iqqar: <Bnaḏem war itƹic ca s uɣrum waha, itƹic s mkuȓ awaȓ ig iqqar Arebbi.>"#4.4 Xzar Afessar n Ccariƹa n Musa (Deutéronome) 8:3. S ṯayunaniṯ, iƹni bnaḏem iddar s mkuȓ awaȓ iy d iteffɣen zeg uqemmum n Arebbi.

5Ssenni Ibȓis yuwi Ƹisa ɣar ṯendint n Lquds, isiȓi-ṯ x ṯqiccat n ṯemziḏa ṯameqqrant. 6Inna-as: "Cek meȓa ḏ Mmis n Arebbi ngez ssanita ɣar ṯmurṯ. Aqa Lkitab iqqar: <Qa Arebbi aḏ iweṣṣa bac ac ḥḍant lmalaʼikaṯ nnes. Ac ysint x ifassen nsent bac war ṯeȓqifeḏ uȓa ḏ ij uzru s uḍar nnec.>"#4.6 Xzar Zzabur (Psaumes) 91:11-12.

7Inna-as Ƹisa: "Lla, Lkitab iqqar: <War tjarrab ca Siḏi Arebbi nnec.>"#4.7 Xzar Afessar n Ccariƹa n Musa (Deutéronome) 6:16.

8Ssenni Ibȓis yuwi Ƹisa ɣar ṯqiccat n yijjen n uḏrar yuƹȓa aṭṭas. Ismeḍhar-as-d marra lmemlakaṯ n ddunect-a ḏ ṯuṣubḥant nsent. 9Inna-as: "Aḏac uceɣ marra ṯina meȓa ṯewḍiḏ x ifadden nnec ṯsejjḏeḏ-ayi."

10Indeq-d Ƹisa inna-as: "Ruḥ, beƹƹeḏ-ayi a Cciṭan. Aqa Lkitab iqqar: <Sejjeḏ i Siḏi Arebbi nnec, ƹbeḏ-iṯ netta waḥḏes.>"#4.10 Xzar Afessar n Ccariƹa n Musa (Deutéronome) 6:13.

11Ssenni ibeƹƹeḏ xas Ibȓis. Usint-id lmalaʼikaṯ bḏant tsexxarent x Ƹisa.

Siḏiṯneɣ Ƹisa itȓaɣa-d i imeḥḍaren nnes imezwura

12Wami isȓa Ƹisa belli Yaḥya aqa itwaḥebbes, iƹqeb ɣar Naṣira ɣar ṯmurṯ n Ljalil. 13Walakin war iqqim ca ḏi Naṣira, iruḥ aḏ izḏeɣ ḏeg yijjen n ubilaj qqaren-as Kafernaḥum ig iǧan x ṭṭarf n ȓebḥar n Ljalil, jjiheṯ n ṯmurṯ n Zafulun ḏ Naftali. 14Amenni ikemmeȓ wawaȓ nni iy inna Siḏi Arebbi i nnabi umi qqaren Icaƹya ḏeg yijjen n zman:

15<Ṯamurṯ n Zafulun ḏ ṯmurṯ n Naftali,

ṯinni umi qqaren ṯamurṯ n Ljalil,

x ubriḏ n ȓebḥar ḏi ccarq n yiɣzar n Lʼurdun,

mani iy zeddɣen uȓa ḏ yinni war iǧin zi Ayṯ-Israʼil.

16Ccaƹb-a iy izeddɣen ḏi ṯaǧest,

aḏ iẓer ṯfawṯ ḏ ṯameqqrant.

Yina izeddɣen ḏi ṯaǧest n ȓmewṯ

aḏasen d imeḍhar nnur.>#4.16 Xzar Icaƹya (Esaïe) 9:1-2.

17Zi ssenni ibḏa Ƹisa itbeccar iqqar-asen: "Tubeṯ, aqa yuḏes-d ȓmulk n ujenna."

18Iggur Ƹisa x cceṭṭ n ȓebḥar n Ljalil, yufa ḏinni ṯnayen n iḥeǧaqen n iseȓman niṯni ḏ awmaṯen. Ijjen qqaren-as Simƹan tȓaɣan-as s Buṭrus, akiḏes umas qqaren-as Andrus. Neṭṭaren ṯracca ḏi ȓebḥar. 19Inna-asen Ƹisa: "Ḏfarem-ayi-d, aqa ȓexxu iy kenniw ɣa arreɣ ḏ iḥeǧaqen n yiwḏan." 20Ȓexddenni semḥen ḏi ṯracciwin nsen ḏfaren-ṯ.

21Iƹḏu aɣiȓin, yufa ṯnayen n wawmaṯen nneɣni, ijjen qqaren-as Yaƹqub ijjen qqaren-as Yuḥanna. Niṯni ḏ ṯarwa n yijjen n uryaz umi qqaren Zabadi. Aqaṯen ḏi ṯɣarrabut ak babaṯsen ƹeddȓen ṯiracciwin nsen. Iȓaɣa-yasen-d Ƹisa, 22ḏeg umcan semḥen ḏi ṯɣarrabut nsen ḏ babaṯsen ḏfaren Ƹisa.

23Iggur Ƹisa ḏi lʼiqlim n Ljalil marra, iseȓmaḏ ḏi ṯemziḏawin n Ayṯ-Israʼil itbeccar-iṯen s Lʼinjil n ȓmulk n Arebbi isgenfa marra ȓehȓacaṯ ḏ ddiƹan n ddat ḏeg yiwḏan. 24Iffeɣ ȓexbar nnes ḏi Surya amen-ṯekmaȓ. Tawin-d ɣares marra yinni iheȓcen tƹeddaben s lʼanwaƹ n ȓehȓacaṯ ḏ ȓeḥȓiqaṯ, mkuȓ imaryaḥen ḏ imejnunen ḏ inecrufen netta isgenfa-ṯen. 25Ḏfaren Ƹisa aṭṭas n ȓɣaci zi Ljalil ḏ lʼiqlim umi qqaren Dikaplis ḏ ṯendint n Lquds ḏ Yahuḏiya ḏ jjiheṯ n ccarq n yiɣzar n Lʼurdun.

اکنون انتخاب شده:

Matta 4: RIF

های‌لایت

به اشتراک گذاشتن

کپی