Akisy. 47
47
1Aŋun, abu Yosepu tolot tolimok Parao tema, “Adaut papa kaŋ ka ŋikaitotoi kaŋ ta ŋamesekin ka ŋaatuk kec ta ŋiboro kec daadaŋ adolun anakwap a Kanaan. Elomito tokona ikes nakwap ŋina a Gosen.” 2Aŋun, abu Yosepu tosea ŋikaitotoi keŋ ŋikan ŋulu abu kitoodiya neni a Parao. 3Kiŋit Parao ŋikaitotoi a Yosepu tema, “Nyo etic kus?” Toboŋokis ikes Parao temasi, “Isua ŋiketiyak kon, ikirae ŋikeyokok a ŋamesekin, ikwapei araakatar atapapaa kosi.” 4Temasi nabo ikes neni a Parao, “Ikiponit isua akiboi anakwap a na ikirae ŋigelae; isua ŋiketiyak kon, ikimamukar ŋinya a ŋamesekin kosi, anerae epol nooi eron anakwap a ŋina a Kanaan. Ikiŋisit tokona isua iyoŋ itocamak isua ŋiketiyak kon tolomae nakwap ŋina a Gosen.” 5Tema nai Parao neni a Yosepu, “Adaut papa kon ka ŋikaitotoi kon aponare neni kon. 6Eyai akwap na ŋina a Ijipit nakan kon; kitolomu papa kon ka ŋikaitotoi kon nakibois ŋina ejok nooi anakwap a na; kimyek ikes toloma Gosen. Ani kiyeni iyoŋ atemar eya kidiŋ kec ŋulu epedorete akiyok ŋibaren kaŋ, inak ikes kiyoko.”
7Ekaku a ŋun, yau Yosepu papa keŋ kitoodiya neni a Parao, kiterereŋ Yakob Parao. 8Kiŋit Parao Yakob tema, “Ŋikaru kon ŋiyai?” 9Toboŋok Yakob Parao tema, “Erae ŋikaru kaŋ anakwap a na amiat apei ka ŋatomoniuni. Ekudyoko ka etyoko ŋikaru ŋulu a akiyar kaŋ ŋul, nyikwaan ka ŋikaru a akiyar atapapaa kaŋ apaki ŋina awosyata akaoyan.” 10Kiterereŋ nai Yakob Parao, torotok aneni a Parao. 11Kitolomu Yosepu papa keŋ ka ŋikaitotoi keŋ Ijipit, inak ikes anakwap a ŋin akibois ŋina ajokan nooi ŋina anyaritae Ramases ikwapei alimokinitor Parao iŋes. 12Inak Yosepu akimuj neni a papa keŋ ka ŋikaitotoi keŋ ta ŋituŋa a ekal a papa keŋ; inak alokimar a ŋituŋa a ŋolokal.
Eron alo Ijipit
13Todaun akimuj anakwap a Ijipit a daadaŋ, anerae abu eron toroniar nooi. Kikar ŋituŋa a Ijipit ka ŋulu a Kanaan, aŋuna a eron. 14Kijaununu Yosepu ŋisiliŋa daadaŋ ŋulu aya nakwap a Ijipit ka Kanaan, kilokony ka akimuj a ŋina agyelete ikes. Ya Yosepu ŋisiliŋa ŋul kai a Parao. 15Ani kedaut ŋituŋa a Ijipit ka Kanaan agyelar ŋisiliŋa kec, potu Ŋijipitian daadaŋ neni a Yosepu temasi, “Inakinae isua akimuj! Kaanukiro ikitwakya isua alokiŋaren kon? Adaun isua ŋisiliŋa.” 16Toboŋok Yosepu ikes tema, “Inakinae ayoŋ ŋibaren kus, okoinak ayoŋ iyes akimuj, erae kedauna ŋisiliŋa aneni kus.” 17Aŋun, apotu ikes yaut ŋibaren kec neni a Yosepu; inak Yosepu ikes akimuj kilokonyu ŋaŋolei, ŋamesekin, ŋaatuk ka ŋisigirya. Abu Yosepu inak ŋituŋa akimuj ekaru ŋol, kilokonyia ŋibaren kec daadaŋ. 18Ani edaun ekaru ŋol, potu ŋituŋa neni a Yosepu temasi, “Nyimunonio isua aneni a ekapolon kosi atemar agyelar isua ŋisiliŋa kosi daadaŋ ka ŋisipanin a ŋaatuk, aruwor ŋulu a ekapolon kosi. Emam ibore ice eyai kiŋaren kon ekapolon kosi, nai ŋawat kosi bon ka ŋalup kosi. 19Kaanukiro emaikina isua ka ŋalup kosi ikiŋopiyari alokiŋaren kon? Togyelae isua ka ŋalup kosi ka akimuj. Ikicamit isua aruwwor ŋipi a Parao ka ŋalup kosi toruwor ŋuna a Parao. Inakinae isua akimuj ikotere ikiyari, nyikitwaka, toruwor ŋalup kosi ŋacaryo.”
20Aŋun, abu Yosepu togyelu aŋuna a Parao akwap a Ijipit daadaŋ. Togyelasi Ŋijipitian daadaŋ ŋimaanikorin kec, anerae abu eron min neni kec nooi; kituruwosi ŋalup kec ŋuna a Parao. 21Ani eruwor ŋituŋa, abu Parao kituruwo ŋipi keŋ; anyoun alowae a Ijipit a apei tari ŋoloce. 22Ŋalup a ŋisacaradotin bon aponi kimyekinae akigyel, anerae a ŋinapaki aryamununeete ŋisacaradotin aneni a Parao akimuj ŋina eriyan etyae. Etemokino ikes akimuj ŋina aryamununeete ikes aneni a Parao ayarya. Ŋakiro ŋun pa agyelaryata ikes ŋalup kec. 23Tema Yosepu neni a ŋituŋa, “Aŋuna tokona adaunia ayoŋ agyelun iyes ka ŋalup kus ta ŋiboro kus toruworos ŋulu a Parao, ŋikinyom kus lu; kitata ŋalup. 24Ani edoli apaki ŋina ilemyata iyes, itemokino inakis Parao atutubet apei alotooma ŋakan, kidoŋo ŋatutubeta ŋaomwon alotooma ŋakan neni kus ikwapei ŋikinyom ŋulu eekinio ka akimuj ŋina inyamete iyes ka ŋikalya kus ta ŋidwe kus ŋulu cicik.” 25Temasi ŋituŋa, “Iiu iyoŋ akiyar kosi; ikilipi kitalakasi ŋun ekapolon kosi, ikiruwor isua ŋipi a Parao.” 26Aŋun, abu Yosepu kituruwo ŋakiro ŋun ekisil a akwap a Ijipit, ido eriŋa tari tokona eyai ekisil ŋol ebe, atutubet apei alotooma ŋakan alokinyom a daadaŋ, erae ŋina a Parao. Ŋalup a ŋisacaradotin bon apotu nyeruwor ŋuna a Parao.
Ŋirwa ŋulu esidyok anakiyar a Yakob
27Kiboiyoto Ŋisirael anakwap a Ijipit, anakibois a ŋina anyaritae Gosen; kituruwosi ikes akibois ŋin ŋina kec, touryata topitut nooi. 28Kiboi Yakob anakwap a Ijipit ŋikaru ŋitomon ka ŋikanikaarei, aŋun, arae ŋikaru keŋ amiat ka ŋatomoniomwon ka ŋikanikaarei.
29Ani eapuuni Isirael atwanare, tonyarau lokoku keŋ Yosepu, tema neni keŋ, “Ani karae ayoŋ ŋolo ajok aneni kon, kiwuak akan kon kwap amuro kaŋ, ido kikoŋ akitiya ikitopoloorit ayoŋ ka iyookino aneni kaŋ. Nyinuka akuwan kaŋ Ijipit. 30Ani atwani ayoŋ, yaarae ayoŋ alo Ijipit, itonukakis neni enukitae ata papa kaŋ.” Toboŋok Yosepu tema, “Etiyae ayoŋ lopite ŋolo ilimunio iyoŋ.” 31Tema Isirael, “Kikoŋ neni kaŋ.” Kikoŋ Yosepu neni a Isirael. Togwaŋakin nai Isirael nakou a ekitaada keŋ, kilip neni ka Akuj.
انتخاب شده:
Akisy. 47: NIB2008
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Ngakarimojong Interconfessional Bible © Bible Society of Uganda, 2008.