Akisy. 45
45
Kiteyenikin Yosepu neni a ŋikaitotoi keŋ
1Abu Yosepu nyepedo akidaŋidaŋ ŋakiro keŋ alokiŋaren daadaŋ ŋulu awuasi alodiyete keŋ, kirworik igworo tema, “Kitorotokisi ŋituŋa daadaŋ aneni kaŋ.” Aŋun, mam ituŋanan arukito ka Yosepu apaki ŋina eteyenikinor iŋes neni a ŋikaitotoi keŋ. 2Kikalou Yosepu nooi, kiirasi tari Ŋijipitian ka ŋituŋa ŋulu a ekal a Parao. 3Tema Yosepu neni a ŋikaitotoi keŋ, “Arae ayoŋ Yosepu. Eriŋa papa kaŋ eyari a?” Nai nyepedosi ŋikaitotoi keŋ aboŋokin iŋes ŋakiro, anerae abu ekabule kitomaranik ikes alokiŋaren a Yosepu.
4Tema nai Yosepu neni a ŋikaitotoi keŋ, “Toapuutu neni kaŋ.” Toapuut ikes neni keŋ. Tema Yosepu, “Arae ayoŋ Yosepu lokaato kus, ŋolo ipotu iyes togyelasi Ijipit. 5Tokona, nyiyaloloŋo, kori nyitama ŋace aŋuna ikigyelaryata iyes ayoŋ nakwap na, anerae Akuj abu ekeyakuu ayoŋ ne eriŋa iyes nyepona, ikotere aiuni akiyar a ŋituŋa. 6Eyai tokona eron nakwap ŋikaru ŋiarei lu, ka iyatakin nabo ŋikaru ŋice ŋikan ŋulu emamukaunor akitare, kori akilem. 7Abu Akuj ekeyakuu ayoŋ ne eriŋa iyes nyepona, aiun ŋipiya anakwap aŋuna kus ka akiturubakin ŋikalalak eyarete aŋuna kus. 8Aŋun, meere iyes ikiyakuunete ayoŋ ne, nai Akuj. Eketuruwo Akuj ayoŋ papa a Parao, ekapolon a ekal keŋ a daadaŋ ka ekepukan a akwap a Ijipit daadaŋ. 9Kiwonyakisi atipei, toloto neni a papa kaŋ temasi neni keŋ, ‘Abala lokoku kon Yosepu ne: Adau Akuj akituruwor ayoŋ ekapolon anakwap a Ijipit a daadaŋ; potu totiyaunos neni kaŋ, nyididyoto. 10Ani ipote, toloma nakibois ŋina enyaritae Gosen, ikidunyete iyes ayoŋ a nen, iyes ka ŋidwe kus ka ŋidwe a ŋidwe kus kaapei ka ŋakinei kus, ŋaatuk kus ka ibore daadaŋ ŋini iyakatar iyes. 11Eketani ayoŋ iyes a nen, ikwapei eriŋaakatar ŋikaru ŋikan ŋulu a eron eya kiŋaren; ikotere nai iyes ka ŋikalya kus ta daadaŋ ŋulu irukitotor iyes nyiruworosi ŋikulyak.’ 12Itete tokona iyes a ŋakonyen kus ka ite lokaato kaŋ daŋ Benjamin atemar ayoŋ elope erworo neni kus. 13Tolimokisi papa kaŋ epite ŋolo eketopolooritere ayoŋ alo Ijipit ka daadaŋ ŋuna iŋolikis iyes. Kiwonyakisi atipei iyaut papa kaŋ totiyaunotor kwap ne.” 14Torwakin nai Yosepu a ŋakan keŋ lomosiriŋ alokaato keŋ Benjamin, kikalou, kikalou Benjamin daŋ alomosiriŋ a Yosepu. 15Tonu nai Yosepu ŋikaitotoi keŋ daadaŋ, kigwor aŋuna kec; kedau akigwor, kirworikinos ka ikes.
16Ani iiraryo ŋakiro ŋun alokai a Parao atemar, apotu ŋikaitotoi a Yosepu, tolakaros Parao ka ŋiketiyak keŋ. 17Tema Parao neni a Yosepu, “Tolimok ŋikaitotoi kon ebe, ‘Kitiyata nu: Toenikisi ŋiboro lobaren kus toboŋosi nakwap a Kanaan. 18Yautu papa kus ka ŋikalya kus, ipotu neni kaŋ, akainakini ayoŋ iyes ŋalup ŋuna ajokak anakwap a Ijipit, topedosi aryamun akimuj analup a ŋuna ajokak.’ 19Ikicikakinitae daŋ iyes atemar, ‘Kitiyata nu: Yaasi ŋagaari anakwap a Ijipit, iyauniata ŋidwe kus ŋulu cicik ka ŋaberu kus, yautu papa kus, ipote. 20Nyitamatamata ŋakiro a ŋiboro a ŋulu iyakatar iyes, anerae ŋalup ŋuna ikiinio iyes alo Ijipit, ejokak nooi akilo ŋalup a Ijipit ŋunace daadaŋ.’”
21Kitiyata ŋidwe a Isirael ikwapei alimokinitere. Inak Yosepu ikes ŋagaari ikwapei alimunitor Parao, inak ikes akimuj aŋuna ke erot. 22Inak Yosepu ŋikaitotoi keŋ a ŋinituŋanan ŋilowi ŋice ŋulukilocokinet ŋulu anapito ikes akilocokinet apei bon nai aponi inakinae Benjamin ŋisilipae ŋamiae ŋauni ka ŋilowi ŋulukilocokinet ŋulu enapi iŋes ŋakilocokinet ŋakan. 23Abu Yosepu kiyakiya ŋiboro lu neni a papa keŋ: Ŋisigirya ŋitomon iwokito ŋiboro a Ijipit ŋulu ajokak, ŋasigirya ŋatomon iwokito ŋikinyom, ŋamugati ka akimuj a papa keŋ alorot epote Ijipit. 24Kitolot nai Yosepu ŋikaitotoi keŋ, ani erotokinete, tema Yosepu neni kec, “Nyiburata alorot.”
25Torotokis ikes kitipeiyosi alo Ijipit, potu neni a papa kec Yakob, nakwap a Kanaan. 26Temasi ikes neni a papa kec, “Eriŋa Yosepu eyari! Erae daŋ iŋes ekepukan anakwap a Ijipit a daadaŋ.” Kiyalaar etau a Yakob, anerae pa anupit iŋes ŋakiro a ŋidwe keŋ. 27Nai, ani elimokinete ikes papa kec ŋakiro a Yosepu daadaŋ ŋuna kelimokini ikes ka iŋolikini ŋagaari ŋuna kebu Yosepu kiyaku ayaarya iŋes, totikiun etau a papa kec. 28Tema Isirael, “Etemokin! Eriŋa lokoku kaŋ Yosepu eyari. Itemokino ayoŋ olot oanyu iŋes eriŋa ayoŋ nyetwana.”
انتخاب شده:
Akisy. 45: NIB2008
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Ngakarimojong Interconfessional Bible © Bible Society of Uganda, 2008.