Akisy. 40
40
Ŋakirujaeta a ŋimabus a ŋiarei
1Apaki ace kelunyar ŋakiro ŋun, kitoŋoa ekapolon erwosit ŋolo a Ijipit ŋiketiyak keŋ lu: Ŋolo apolokinit ŋulu ayaununeete ekopo neni a erwosit ka ŋolo apolokinit ŋulu epoete ŋamugati a erwosit. 2Toŋoik Parao ŋikapolok lu ŋiarei: Ŋolo apolokinit ŋulu ayaununeete ekopo neni a erwosit ka ŋolo apolokinit ŋulu epoete ŋamugati a erwosit. 3Kikama erwosit ikes ya kidarae alokai a ekapolokiniton ŋasigarya ŋuna a ejera a ŋolo aenitere Yosepu. 4Kicikak ekapolokiniton ŋasigarya ikes neni a Yosepu akitere ikes. Kiboiyoto ikes idaritae a nen ŋirwa ŋidi. 5Akoloŋit apei nakwaare, kirujata alojera aneni aenitere ikes ŋienan ŋuluarei ŋul; ŋolo apolokinit ŋulu ayaununeete ekopo neni a erwosit ka ŋolo apolokinit ŋulu epoete ŋamugati a erwosit a ŋolo a Ijipit. Agelaaka ŋakiro ŋuna abu ŋinituŋanan kiruja ka agelaana apolou a ŋakiro a ŋuna erujat ŋinituŋanan. 6Ani taparacu ebuni Yosepu neni kec, kiŋolik ikes ebulit iyalaara ŋawat. 7Aŋun, kiŋit Yosepu ŋikapolok ŋulu sek arae ŋiketiyak a Parao ŋul, ŋulu aya ka iŋes lojera ŋulu edaritae alokai a esigarit a ŋolo apolokinit ŋisigarya tema, “Nyo enyorididyoto ŋireetin kus nakoloŋit na?” 8Toboŋokis ikes temasi, “Irujatae isua, ido mam ituŋanan ikisileerekini isua apolou a ŋakiro a ŋuna irujatae.” Tema Yosepu neni kec, “Meere mono Akuj epedori akisileerekin apolou a ŋakiro a ŋuna irujatae a? Tolimokinae ayoŋ ŋakiro ŋuna irujato iyes.”
9Tolimu ŋolo apolokinit ŋulu ayaununeete ekopo neni a erwosit ŋuna kebu iŋes kiruja, tema neni a Yosepu, “Anakiruja kaŋ abu ayoŋ eŋolik ekitoe ŋolo a epiini, ayai kiŋaren kaŋ, 10ayakar ekitoe ŋol ŋaten ŋauni. Ani apaki ŋinapei epuriteunio ekitoe, tolomunete ŋatur kiŋa ka tokoni enene a ŋaraito, toruwor epiini. 11Atiŋit ayoŋ ekopo a Parao apaki ŋin, ido abu olemu ŋaraito a epiini ocuki lokopo a Parao, oinak Parao.” 12Tema Yosepu neni a ŋol, “Apolou a ŋakiro a ŋun iŋes na: Erae ŋaten ŋunauni ŋun ŋirwa ŋiuni; 13alotooma ŋirwa ŋiuni, ikilemuni iyoŋ Parao alojera, ido ikinyakak iyoŋ lotic kon. Iwuakini iyoŋ ekopo a Parao nakan keŋ lopite ŋolopei sek iwuanakinia apaki ŋina iraakar iyoŋ ŋolo ipolokinit ŋulu ayaununeete ekopo neni a Parao. 14Nai ani ŋina ejokyarotor ŋakiro aneni kon, totamunitetei ayoŋ daŋ, kitoodiu arimao kon neni kaŋ; tolimoroe ayoŋ daŋ neni a Parao, itolemu ayoŋ alokai a na. 15Kire! Aponi okokokoun ayoŋ anakwap a Ŋiburaniyae; tokona daŋ a ne, mam ŋakiro ŋuna etiyat ayoŋ, ŋuna ekewuakinitotor ikes ayoŋ lojera.”
16Ani eanyuni ŋolo sek apolokinit ŋulu ipoete ŋamugati a Parao atemar ejokak ŋakiro ŋuna esileereun anakiruja a erukitos keŋ, tema neni a Yosepu, “Erujat ayoŋ daŋ nu: Abu eŋolik ewokit ŋibukito ŋiuni ŋulu aya ŋamugati ŋuna akwaŋak. 17Tooma ebukit ŋolo ayai kidiama ŋuluce, aya ŋamuja a Parao ŋuna epotoi ŋuna agelegelya; nai akopete ŋikeny akimuj ŋin alobukit anakou kaŋ.” 18Toboŋok Yosepu iŋes tema, “Apolou a ŋakiro a ŋuna irujat iyoŋ iŋes na: Erae ŋibukito ŋuluuni ŋul ŋirwa ŋiuni; 19alotooma ŋirwa ŋiuni, elemari Parao akou kon anakuwan kon, ido kinenek akuwan kon lopir, potu ŋikeny toruto akiriŋ a akuwan kon.”
20Ani edolete ŋirwa ŋiuni, akoloŋit ŋina enumunumere ŋasuban ŋuna a akidouno a Parao, kitemok Parao ŋasuban aŋuna a ŋiketiyak keŋ. Tolemu alokidiŋ ŋiketiyak keŋ ŋulu aya lojera lu: Ŋolo sek apolokinit ŋulu ayaununeete ekopo neni keŋ ka ŋolo sek apolokinit akipore ŋamugati keŋ. 21Kinyakak lotic keŋ ŋolo ka ayaunun ekopo eketiyan ŋolo sek apolokinit ŋulu ayaununeete ekopo, yau iŋes ekopo inak Parao. 22Nai ŋolo sek apolokinit akipore ŋamugati, abu Parao tomyed, kinenek lokitoe ikwapei sek esileereunitor Yosepu. 23Nai abu ekapolokiniton ŋulu ayaununeete ekopo neni a Parao nyetamu Yosepu, kimuryakis ŋakiro a Yosepu.
انتخاب شده:
Akisy. 40: NIB2008
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Ngakarimojong Interconfessional Bible © Bible Society of Uganda, 2008.