Awos. 5
5
Moses ka Aron alokiŋaren Parao
1Ani ekaku, toloto Moses ka Aron neni a Parao temasi, “Ŋakiro ŋuna irworo Ekapolon Akuj a Isirael ikes nu ebe, ‘Kimyek ŋituŋa kaŋ toloto, ikotere kitiyata ŋasuban aŋuna kaŋ analoŋisat.’ ” 2Nai abu Parao kiŋit ikes tema, “Ŋae erae Ekapolon, ŋolo emaikina ayoŋ ewuap ŋakiro keŋ emyek Ŋisirael toloto? Nyayeni ayoŋ Ekapolon ŋol, ido nyemyekini ayoŋ Ŋisirael toloto.” 3Temasi ikes neni a Parao, “Adau Akuj a Ŋiburaniyae atakanun neni kosi. Kimyekinae isua tolotoi naloŋisat alosit kosi ŋina a ŋirwa a ŋiuni, ikotere einakinio ŋamuronisya neni a Ekapolon Akuj kosi; ani pa kikokis nen, epedori iŋes akiar isua a ŋidekesyo, kori a ekileŋ.” 4Nai kiŋit erwosit a Ijipit ikes tema, “Moses ka Aron, kaanukiro icamitotor iyes akiya ŋituŋa aloticisyo kec? Toboŋosi loticisyo kus!” 5Toropak Parao irworo tema, “Kiirasi iyes, alalata ŋituŋa kus nooi akilo ŋituŋa ŋulu ka akwap a Ijipit, ido icamito iyes akitojoŋore ikes etic.” 6Akoloŋit ŋinapei, abu Parao kicik ŋikapolok ŋulu esitiyaete ŋituŋa ka ŋulu apolokinito etic tema, 7“Nyiinakis nabo ŋituŋa ŋanya ŋuna kinyalet ecoto toramere ŋamatapali, lopite ŋolo sek iinanakiniata. Kimyekisi ŋinituŋanan kiwara ŋanya keŋ a ilope. 8Nai emaikina iyes taanyut atemar itiyaete ikes etyae a ŋamatapali ŋolopei ŋoon sek etiyaete; nyitiditeut ekimar a ŋamatapali, anerae ekalanyaka ŋituŋa ŋul. Akalanyo ŋin iŋes igworotor ikes ebasi, ‘Kimyekinae isua tolotoi, ikotere einakinio ŋamuronisya neni ka Akuj kosi.’ 9Inakisi ikes etic ŋolo alalan nooi, ikotere itumori ikes etic ŋol tojoŋoto akipup ŋakiro ŋuna ka amodiyo ŋun.”
10Aŋun, apotu ŋikapolok ŋulu esitiyaete ŋituŋa ka ŋulu apolokinito etic toloto neni a ŋituŋa temasi, “Ŋakiro ŋuna irworo Parao ikes nu ebe, ‘Nyakainakini ayoŋ iyes ŋanya. 11Apesi iyes ŋikulepek toŋerut ŋanya ŋuna isitiyaete aneni daadaŋ iryamuniata, nai nyitiditeunio etic kus jik.’ ” 12Aŋun, apotu ŋituŋa kielakin Ijipit daadaŋ aŋerun ŋanya. 13Kibunyakis ŋikapolok ŋulu esitiyaete ŋituŋa ikes temasi, “Kitiyata etic kus lotyae ŋolopei sek, lopite ŋolopei ŋoon sek itiyaata ikiinanakinio ŋanya.” 14Apotu ikes tolomakis akibuŋa Ŋisirael ŋulu alemunito ŋikapolok a Parao ŋulu esitiyaete ŋituŋa apolokin etic. Kiŋitae Ŋisirael ŋulu apolokinito etic ebe, “Kaanukiro nyitiyaunitotor iyes nakoloŋit na, kori bien ŋamatapali ŋuna etya ŋuna sek?”
15Tonyout nai Ŋisirael ŋulu apolokinito ŋiticisyo, toloto neni a Parao kigworokis iŋes kiŋita temasi, “Kaanukiro itiŋitor iyoŋ ŋiketiyak kon ikona? 16Mam ŋanya ikiinanakinio isua ŋiketiyak kon, nai ebasi ŋikapolok ŋulu isitiyaete ŋituŋa neni kosi ebe, ‘Kitiyautu ŋamatapali!’ Kiŋolik iyoŋ epite ŋolo ikibuŋaere isua ŋiketiyak kon! Nai ŋituŋa kon a elope edyakarito.” 17Tema Parao, “Ŋikalanyanotin! Kire irae ŋikalanyanotin; ŋakiro ŋun irubakinitotor iyes ibasi, ‘Kimyekinae tolotoi, ikotere einakinio amuronot neni a Ekapolon.’ 18Toboŋosi lotic. Mam ŋanya ikiinakinio iyes, nai emaikina iyes kitiyaut ŋamatapali ŋuna etya ŋunapei ŋoon sek.” 19Kiŋolikis Ŋisirael ŋulu ainakinitae apolokin etic atemar eyakasi ikes locan apaki ŋina alimokinere ebe, “Nyemaikina iyes kitiditeut ekimar a ŋamatapali alokimar a ŋolo ŋoon sek etiyaununuyo.” 20Ani erotokinete ikes aneni a Parao, kiryamun ka Moses ta Aron ŋulu edarito ikes. 21Temasi ikes neni ata Moses, “Ikimaimai isua Ekapolon pena ŋakiro nu nakyes kus ka ikitubok iŋes iyes! Ikisiman iyes isua Parao ka ŋiketiyak keŋ ka ikitaar iyes ikes isua.”
22Kirworik nai Moses nabo neni a Ekapolon kiŋit tema, “Okoe Ekapolon, kaanukiro isicania iyoŋ ŋituŋa lu? Kaanukiro ikiyakiyarya iyoŋ ayoŋ neni kec? 23Ŋinapei abunio ayoŋ neni a Parao erwor aŋuna kon, isicanit iŋes ŋituŋa lu, ido nyitiyakina iyoŋ ŋadi ŋuna ka alakun ŋituŋa kon.”
انتخاب شده:
Awos. 5: NIB2008
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Ngakarimojong Interconfessional Bible © Bible Society of Uganda, 2008.