Yoa 1

Ndeto ya Thayũ

1Mwambĩlĩĩlyonĩ wa nthĩ Ndeto aĩ kw'o, na Ndeto ũsu aĩ vamwe na Ngai na ũ Ndeto aĩ Ngai. 2Ndeto ũsu aĩ kw'o kuma mwambĩlĩĩlyonĩ vamwe na Ngai. 3Kwĩsĩla kwake syĩndũ syonthe nĩsyoombiwe, na ate vo vai kĩndũ kyaaũmbwa. 4Ndeto ũsu nĩwe kĩtina kya thayũ, na thayũ ũsu nĩw'o waetie kyeni kwa andũ onthe. 5Kyeni kĩu nĩkĩkenaa kĩvindunĩ na kĩvindu kĩyaakĩkĩlya vinya.

6 # Mat 3.1; Mk 1.4; Lk 3.1-2 Ngai nĩwatũmie mũndũ ũmwe weetawa Yoana, 7ũla wookie ta ngũsĩ akũsĩĩe kyeni kĩu, nĩ kana kwĩsĩla kwake andũ onthe matonye kũĩkĩĩa. 8We ti we waĩ kyeni kĩu; ookie kũneena ĩũlũ wakyo. 9Kĩĩ nĩkyo kyaĩ kyeni kya w'o, nakyo nĩ kĩla kyũkaa kũũ nthĩ kĩkamulĩkĩlaa andũ onthe.

10Ndeto aĩ kũũ nthĩ, na o na kau Ngai oombie nthĩ kwĩsĩla kwake, nthĩ ndyaamũmanya. 11Ookie nthĩ ĩla yake mwene, ĩndĩ andũ ala make mayaamũthokya. 12Ĩndĩ onthe ala mamũthokisye, ala mamũĩkĩĩie, nĩwamanengie ũkũmũ wa kũtw'ĩka syana sya Ngai. 13Mayaatw'ĩka syana sya Ngai kwa nzĩa ya kũsyawa, kana kwa ũtonyi wa mwĩĩ, kana kwendanĩ kwa mũndũ, ĩndĩ matw'ĩkĩthiw'e nĩ Ngai mwene.

14Nake Ndeto nĩwatw'ĩkie mũndũ na atũa naitũ, ausũĩtwe nĩ mumo na ũla w'o. Ithyĩ nĩtwoonie ũkumyo wake, ũkumyo ũla wakwatie ta we Mwana wa Asa e ũmwe.

15Yoana nĩwakũsĩĩie ĩũlũ wake na wasya mũnene asya atĩĩ, “Ũũ nĩwe naneenaa ĩũlũ wake yĩla naisye, ‘Ũla wũkĩte ĩtina wakwa nĩ mũnene kwĩ inyie, nũndũ aĩ kw'o o na nde mũsyae.’ ”

16Kuma wusũunĩ wa mumo wake, ithyonthe nĩtũkwatĩte mumo mwingĩ. 17Nũndũ Mĩao yanenganiwe kwĩsĩla kwa Mwose, ĩndĩ mumo na ũla ũw'o syatũvikĩie kwĩsĩla kwa Yesũ Klĩsto. 18Vai mũndũ waamwona Ngai, ĩndĩ Mwana wake e ũmwe ũla wĩkalaa vakuvĩ na Asa, nũtwonetye ũndũ Asa ũilyĩ.

Yoana Mũvatisi Akĩelesya Wĩa Wake

(Mat 3.1-12; Mk 1.1-8; Lk 3.1-18)

19Ũũ nĩw'o ũkũsĩ ũla Yoana Mũvatisi waumisye, yĩla atongoi ma Ayuti matũmie athembi na Alivai kuma Yelũsalemu mathi makamũkũlye atĩĩ, “We nue ũũ?”

20Yoana Nĩwamatavisye ateũmavitha amea atĩĩ, “Nyie ti inyie Klĩsto.#1.20 Klĩsto: Nĩ ĩsyĩtwa ya ũla wanyuvĩtwe ethĩwe Mũtangĩĩi wa andũ. Kwa Kĩevelania nĩ Masia”

21 # Kũt 18.15,18; Mal 4.5 Namo mamũkũlya atĩĩ, “Na yu nue ũũ? Nue Eliya?”

Nake amea, “Aiee, ti inyie Eliya.”

Namo mamũkũlya atĩĩ, “Na nue ũla Mwathani?”

Nake amea, “Aiee.”

22Nĩvo ĩndĩ mamũkũlilye atĩĩ, “Kwoou nue ũũ? No nginya ũtũnenge ũsũngĩo tũtũngĩe ala matũtũmie. Wĩasya ata ĩũlũ waku?”

23 # Ĩsa 40.3 Yoana nĩwamasũngĩie na ndeto sya mwathani Ĩsaia amea:

“Nyie nĩ o mũndũ ũkũneena na wasya mũnene e weũnĩ ayasya,

‘Lũngalyai nzĩa ĩla Mwĩai wĩĩsĩla.’ ”

24Namo andũ asu matũmĩtwe nĩ Avalisi 25mamũkũlya Yoana atĩĩ, “Wĩvatisa nĩkĩ ĩndĩ, ethĩwa tuue Klĩsto kana Eliya kana ũla Mwathani?”

26Yoana amasũngĩa amea atĩĩ, “Nyie nĩvatisaa na kĩw'ũ, ĩndĩ ve mũndũ ũũngyĩ katĩ wenyu mũtamwĩsĩ. 27Ũsu nĩwe wũkĩte ĩtina wakwa, ũla o na mĩkwa ya iatũ syake nyie ndaĩlĩtwe nĩ kũmĩthasya.”

28Maũndũ asu onthe meekĩkie Mbethani, ĩla yĩ ngalĩko ya wumĩlonĩ wa syũa wa Ũsĩ wa Yolotani vala Yoana wavatisĩaa andũ.

Yesũ nĩwe Kalondu ka Ngai

29Ũnĩ ũsu Yoana nĩwamwonie Yesũ okĩte vala ũĩ na asya atĩĩ, “Kwa sisyai, ũya nĩwe Kalondu ka Ngai, ũla ũvetaa naĩ sya nthĩ. 30Ũũ nĩwe ũla naneenaa ĩũlũ wake yĩla naasya, ‘Ũla wũkĩte ĩtina wakwa nĩ mũnene kwĩ inyie, nũndũ aĩ kw'o o na nde mũsyae.’ 31Nyie mwene ndyamwĩsĩ, ĩndĩ kĩtumi kyakwa kya kũka kũvatisa na kĩw'ũ, kyaĩ nĩ kana atonye kũmanyĩka nĩ andũ ma Ĩsilaeli.”

32Yoana nĩwakũsĩĩie asya atĩĩ, “Nyie nĩnoonie Veva atheea ta ĩvũĩ kuma ĩtunĩ amũvũĩla. 33Nyie ndyeesĩ nĩwe ũũ, ĩndĩ ũla wandũmĩte nũke kũvatisa na kĩw'ũ ambĩĩte: ‘Mũndũ ũla wĩona Veva amũtheea amũvũĩle, ũsu nĩwe ũvatisaa na Veva Mũtheu.’ 34Nyie nĩnoonie ũndũ ũsu ũyĩkĩka, na nĩngũkũsĩĩa ki kana ũũ nĩwe Mwana wa Ngai.”

Amanyĩw'a ma Mbee ma Yesũ

35Mũthenya ũla waatĩĩe, Yoana nĩwaũngeme vala vandũ e na elĩ ma amanyĩw'a make. 36Nĩwoonie Yesũ avĩtĩte na amea atĩĩ, “Kwa sisyai, ũya nĩwe Kalondu ka Ngai!”

37Amanyĩw'a asu elĩ nĩmeewie kĩla Yoana waweta na mamũatĩĩa Yesũ. 38Yesũ nĩwavĩndũkie amona mamumĩte ĩtina na amakũlya atĩĩ, “Mwĩmantha kyaũ?”

Namo mamwĩa, “Lavai,” (Ũalyũlo wayo nĩ Mũmanyĩsya) “We wĩkalaa va?”

39Yesũ amea atĩĩ, “Ũkai mũkavone.” Nĩmaendanisye nake moona vala wekalaa, na mekala nake mũthenya ũsu; syaĩ ta saa kũmi sya mũthenya.

40Endelea mwana-a-inyia wa Simioni Vetelo, aĩ ũmwe wa amanyĩw'a asu elĩ ala meew'ĩte kĩla Yoana wawetie na mamũatĩĩa Yesũ. 41Ũndũ wa mbee ũla Endelea weekie waĩ kũmantha mwana-a-inyia Simioni na kũmwĩa atĩĩ, “Nĩtũmwonie Masia, ũla nĩ Klĩsto.” 42Nĩvo ĩndĩ watwaie Simioni vala ve Yesũ.

Yesũ nĩwamũsyaisye na amwĩa atĩĩ, “We wĩtawa Simioni mwana wa Yoana ĩndĩ ũkeetawa Keva” (Kwa Kĩkiliki nĩ Vetelo, na ũalyũlo wayo nĩ ĩvia).

Yesũ ayĩta Vilivũ na Nathanieli Mamũatĩĩe

43Mũthenya ũsu ũngĩ waatĩĩe Yesũ nĩwavangie kũthi Kalilii. Kũu nĩweethĩie Vilivũ na amwĩa atĩĩ, “Ngatĩĩa.” 44Vilivũ aĩ wa kuma Mbethisaita, nayo nĩ ndũa ĩla Endelea na Vetelo matwĩe. 45Vilivũ nĩwoonie Nathanieli na amwĩa atĩĩ, “Nĩtũmwonie ũla Mwose waandĩkie ĩũlũ wake ĩvukunĩ ya Mĩao, na ũla athani o ta ũu maandĩkie ĩũlũ wake, nake nĩ Yesũ mwana wa Yosevu kuma Nasaleti.”

46Nake Nathanieli amũkũlya atĩĩ, “Ve kĩndũ kĩseo kĩtonya kuma Nasaleti?” Vilivũ amũsũngĩa amwĩa atĩĩ, “Ũka ũkeyonee.”

47Yesũ nĩwoonie Nathanieli okĩte vala ũĩ na aneena ĩũlũ wake asya atĩĩ, “Kwa sisyai Mũĩsilaeli wa w'o, na ũtaweteka ũthũku.”

48Nathanieli amũkũlya atĩĩ, “Ũmbĩsĩ ata?”

Yesũ amwĩa, “Ngwonie yĩla wĩĩ ungu wa mũkũyũ Vilivũ atanamba kũkwĩta.”

49Nathanieli amwĩa, “Mũmanyĩsya we wĩ Mwana wa Ngai! Nue Mũsumbĩ wa Ĩsilaeli!”

50Yesũ amũkũlya atĩĩ, “Waĩkĩĩa nũndũ nakwĩa ngwonie wĩ ungu wa mũkũyũ? Ũkoona maũndũ manene kwĩ asu.” 51#Mwa 28.12 Nĩvo ĩndĩ Yesũ waisye atĩĩ, “Nĩmũtavya w'o, mũkoona ĩtu yĩ ĩvingũe na alaĩka ma Ngai mayambata na makĩmũtheea Mwana wa Mũndũ.”

اکنون انتخاب شده:

Yoa 1: KAMBA

های‌لایت

به اشتراک گذاشتن

کپی