मत्ती 12

यहूदियां रा यीशु कने तिसरयां चेलयां री अलोचना करना

(मरकुस 2:23-28; लूका 6:1-5)

1तिस बगत विस्राम रे दिन यीशु कने तिसरे चेले खेतां बिच्चियें जाई कराँ थे, कने तिसरयां चेलयां जो भुख लगी तां सै कणका रे सिल्लुआं जो तोड़ीने खाणे लगे। 2फरीसिये येढ़ा देखीने तिसने गलाया, “देख, तेरे चेले येढ़ा काम्म करी रायें, सै जे विस्राम रे दिन करना ठीक निआं।” 3यीशुये तिन्हांते पुच्छया, क्या तुहें नीं पढ़या भई दाऊद कने तिसरे साथियें, ताहली जे तिन्हांजो भुख लगी क्या कित्या था? 4सै कियां परमेशरा रे घरा च गया कने चढ़ाईरी रोटियां लेईने खाद्दि। इन्हौं खाणे रा अधिकार न तिस्सो न तिसरे साथियां जो था, पर सिर्फ याजकां जोई था। 5या मूसा री व्यवस्था च तुहें ये नीं पढ़या भई विस्राम रे दिन मन्दरा रे याजक इ हकीकत च बिस्रामां रे दिना रिया विधिया जो तोड़ां ये, कने फेरी बी तिन्हांजो कोई किछ नीं बोलदा? 6पर हऊँ तुहांजो बोलां भई येत्थी कोई हाया सै जे मन्दरा ते बी बड़ा खास आ। 7जे तुहें शास्त्राँ च लिखिरे रा मतलब जाणदे हुन्दे भई हऊँ लोकां च दया चाँह, बलिदान नीं, तां तुहें मेरे चेलयां जो दोषी नीं बणांदे सै जे निर्दोष ये। 8“माहणुये रा पुत्र त विस्राम रे दिना रा बी प्रभु आ।”

यीशुये रा सुक्के हत्था जो चंगा करना

(मरकुस 3:1-6; लूका 6:6-11)

9फेरी यीशु ऊत्थी ते चलीप्या कने यहूदियां रे सभा घरा च पुज्जया। 10ऊथी तिने इक येढ़ा माहणु देख्या, तिसरा जे सज्जा हात्थ सुकीगरा था। कने तिन्हें यीशुये पर दोष लगाणे रे खातर तिसते पुच्छया, भई क्या विस्राम रे दिन चंगा करना ठीक आ? 11पर यीशुये तिन्हांजो जबाब दित्या, “तुहां च येढ़ा कुण आ, तिसरी जे इक भेड ओ, कने सै विस्राम रे दिन किसी खड्डे च पैईजो, तां सै तिसाजो पकड़ीने नीं कड्डो? 12भला, माहणुये रा मुल भेड्डा ते कितना बधी नेआ! इस खातर विस्राम रे दिन लोकां जो ठीक करना सही आ।” 13फेरी यीशुये तिस सुक्कीरे हत्था औल़े माहणुये ने गलाया, “अपणा हात्थ अग्गे कर।” कने तिने अपणा हात्थ अग्गे करित्या, फेरी तिसरा सुक्कीरा हात्थ तिसरे दुज्जे हत्था साई बिल्कुल ठीक हुईग्या। 14फेरी फरीसी तित्थी ते बाहर चलीगे कने तिस्सो मारने रे खातर इक दुज्जे ने मिलीने मारने री तरकीब सोचणे लगे।

परमेशरा रा चुणीरा सेबक

15ये जाणीने यीशु ऊत्थीते चलिग्या। काफी लोक तिसरे पिच्छे चली पे, कने तिने सब्बीं जो चंगा कित्या, 16कने तिन्हौं खबरदार कित्या भई सै मेरे बारे च लोकां जो किछ नीं दस्सो। 17ये इस खातर हुया भई सै बचन जे परमेशरे यशायाह भविष्यवक्ते रे जरिये गलाया था, सै पूरा ओ : 18“देक्खा, ये मेरा सेबक आ, तिसजो जे मैं चुणीरा; ये मिन्जो प्यारा, हऊँ इसते बड़ा खुश आ: मांह अपणा ‘आत्मा’ इसरे बिच भेजणा, कने तिस सारयां देशां रे अन्यजातियां जो न्याय रा प्रचार करना। 19तिस कदीं नीं चिखणा नांई लड़ना, लोकां इसजो गल़ियां कुच्चयां च ऊच्चिया अवाज़ा च सखान्दे नीं सुणना। 20जिस किसी जो बी कोई समस्या इ सै इक बुझदे हुए दिऊए साई आ प्रभुये तिसरा नुक्शान नीं होणे देणा, पर आखिर च तिस न्याय करवाएगा। 21फेरी अन्यजातियां रे लोकां मसीह रे ऊपर आशां रखणियां।”

यीशुये च परमेशरा री शक्ति

(मरकुस 3:20-30; लूका 11:14-23)

22फेरी लोक यीशुये ले इक येढ़े माहणुये जो लयाये सै जे गूँगा कने अन्हा था, काँह्भई तिसच शैतान था; यीशुये तिसजो चंगा कित्या, कने सै गूँगा बोलणे कने देखणे लगया। 23इस पर सारे लोक हैरान हुईने बोलणे लगे, “क्या ये माहणु दाऊद रा वंशज हुई सक्कां?” 24ताहली जे फरीसियें ये सुणया तां तिन्हें गलाया, “ये शैतान्ना रा सेवक होणे रिया वजह ने बुरीआत्मा जो बाहर कड्डां।”

25यीशु तिन्हांरे मना री गल्लां जाणीने तिन्हांजो गलाणे लगया, “जे इक्की देशा रे लोक इक्की दूये ने लड़दे रौ, तां तिन्हांरा देश उजड़ी जां; कने तियां इ जे कोई नगर या परिवार तिसच जे लड़ाई पैईजो, सै टुकड़े-टुकड़े हुईने बिखरी जां। 26कने जे शैतान इ दुष्टात्मा जो बाहर कड्डो, तां सै अपणा इ दुश्मण हुईग्या; फेरी तिसरा राज भला कियां बणी रैहणा? 27कने फेरी जे ये सच्च आ भई हऊँ शैतान्ना रे सहारे बुरीआत्मां जो नकाल़ां, तां तुहांरे अपणे चेले किस रे सहारे तिन्हांजो नकाल़ां ये? इस खातर तुहांरे अपणे चेले इ तुहांरा न्याय करगे। 28हऊँ बुरीआत्मां जो परमेशरा रे आत्मे रिया शक्तिया ने नकाल़ां, इसते ये सिद्ध हुया भई परमेशरा रा राज तुहांरे नेड़े आई पुज्जीरा।”

29“या कियां कोई शैतान्ना साई किसी ताकतवर माहणुये रे घरा च घुसीने तिसरा समान नीं लुट्टी सकदा, तदुआं तकौ जो जे सै पैहले तिस ताकतवर माहणुये जो बन्ही नीं लओ, कने तांई सै तिसरे घरा जो लुट्टी सक्कां।”

30सै जे मेरे सौगी नींये, सै ये नीं मनदे भई पवित्र आत्मा मिन्जो दुष्टात्मां निकाल़णे रा सामर्थ देआं, सै मेरे बरोधी ये। 31इस खातर हऊँ तुहांजो बोलां भई परमेशर हरेक निंध्या कने पाप करने औल़े माहणुये जो माफ करी सक्कां, पर पवित्र आत्मा री निंध्या करने औल़े जो माफ नीं कित्या जाणा। 32कोई माहणुये रे पुत्रा रे बरोधा च जे किछ बोलां, तां तिसरा सै अपराध माफ कित्या जाणा, पर जे कोई पवित्र आत्मा रे बरोधा च बोलगा, तिसरा अपराध न त इस वगता च कने न औणे औल़े वगता च माफ कित्या जाणा।

माहणु अपणयां कर्मां ते जाणया जां

(लूका 6:43-45)

33“जे पेड़ा जो खरा बोल्लो, तां तिसरे फल़ा जो बी खरा बोल्ला। जे पेड़ा जो बुरा बोल्लो, तां तिसरे फल़ा जो बी बुरा बोल्ला; काँह्भई पेड़ फल़ा तेई पछयाणया जां। 34तुहें जहरीले सप्पा रे बच्चयां साई ये, तां जे तुहें बुरे तां खरियां गल्लां कियां बोल्ली सक्कां ये? काँह्भई सै जे मना च भरोईरा, सैई मुँआं ते निकल़ां। 35खरे माहणु खरियां गल्लां कराँ ये काँह्भई सै खरियां गल्लां कट्ठा करीने अपणे मना रे भण्डारा च रक्खां ये, कने बुरा माहणु बुरे भण्डारा ते बुरियां गल्लां कड्डां। 36कने हऊँ तुहां लोकां जो दस्सां भई न्याय रे दिन हरेक माहणुये जो अपणिया बोल्ली रिया गल़त गल्ला रा हिसाब-कताब देणे पौणा। 37काँह्भई तेरी गलाई रिया गल्लां रे अधारा पर इ परमेशरा तेरा न्याय करीने तिज्जो निर्दोष या दोषी समझणा।”

यीशुये ते चमत्कारी नशाणा री मंग

(मरकुस 8:11,12; लूका 11:29-32)

38इसा गल्ला पर किछ यहूदी शास्त्रियें कने फरीसियें तिसने गलाया, “गुरू जी, अहें तुहांते इक चमत्कारी नशाण देखणा चाँये, तिसते जे ये साबित हुई जाओ भई तिज्जो परमेशरे भेज्जिरा।” 39तिने तिन्हांजो जबाब देन्दे हुये गलाया, “तुहें दुष्ट लोक ये सै जे नशाण देखणा चाँये, पर योना भविष्यवक्ते रे नशाणा जो छड्डिने तिन्हांजो होर कोई नशाण नीं दित्या जाणा। 40कने तियां जे योना तिन्न दिन कने तिन्न रात तिस समुद्री जीबा रे पेट्टा च रैया था, तियां इ माहणुये रे पुत्रा यनि मांज बी तिन्न दिन तिन्न रात कब्रा़ रे अन्दर रैहणा। 41न्याय रे दिन नीनवे नगरा रे निवासी आज किया इसा पीढ़िया रे लोकां सौगी खड़िरयां हूणा कने सै दोषी बनाणे, काँह्भई नीनवे रे लोकें योना रा प्रचार सुणीने मन बदलया था; कने देक्खा, येत्थी सै आ सै जे योना ते बी बड्डा, पर तुहें मन बदलने जो त्यार नींये। 42न्याय रे दिन दखण रिया राणिया इसा पीढ़िया रे लोकां सौगी खढ़ना कने तिसा सै दोषी बनाणे, काँह्भई सै बड़े दूर प्रदेशा ते सुलैमान रा प्रचार सुणने जो आई थी; कने देक्खा, येत्थी सै आ सै जे सुलैमान ते बी बड्डा, पर तुहें मन बदलने जो त्यार नींये।

लोकां च शैतान

(लूका 11:24-26)

43“ताहली जे कोई बुरीआत्मा किसी माहणुये जो छड्डां इ, तां सै आराम पाणे रिया खोज्जा च सुनसान जगह टोल़दी फिराँ इ, पर सै तिसाजो नीं मिली पान्दी। 44फेरी सै अपणे मना च बोलां इ, भई हऊँ तिस इ माहणुये ले जाईं तिसच जे पैहले वास कराँ थी, कने ताहली जे गई तां पाया भई तिस माहणुये री जिन्दगी तिस घरा साई सै जे साफ सुथरा कने सजा-सजाईरा कने खाली ओ। 45फेरी बुरीआत्मा जाईने अप्पूँ ते होर सात्त बुरीआत्मां जो अप्पूँ सौगी ली औईं सै जे तिसाते बी बुरियां हुआं इयां, फेरी सै सब आईने तिस माहणुये च रैहणे लगां इयां, कने तिस माहणुये री हालत पैहले ते बी जादा खस्ती हुई जाईं। इस जुगा रे लोकां री हालत बी येढ़ि हूणी।”

यीशुये री मौ कने भाई

(मरकुस 3:31-35; लूका 8:19-21)

46सै हल्तियें लोकां ने गल्ल बात करया इ कराँ था, भई तिसरी माता कने भाई-बन्धु तित्थी आई ने बाहर खड़ीगे; सै तिसने गल्ल करना चाँह थे। 47किन्हिये आई ने यीशुये जो गलाया, “सुण तेरी माता कने तेरे भाई-बन्धु बाहर खढ़िरे कने तूहने गल्ल करना चाँये।” 48जबाबा च यीशुये गल्ल करने औल़े ने गलाया, “कुण इ मेरी माता? कने कुण ये मेरे भाई-बन्धु?” 49फेरी तिने हत्था ने अपणयां चेलयां खौ ईशारा करदे हुये गलाया, “येई हाये तिन्हांने जे हऊँ अपणी माता कने अपणे भाईयां रे बराबर प्यार कराँ। 50हाँ, सै जे कोई स्वर्गा च बिराजमान मेरे पिता रिया इच्छा पर चलां, सैई मेरी माता, मेरी बैहण, कने मेरे भाईये रे बराबर मिन्जो प्यारे।”

اکنون انتخاب شده:

मत्ती 12: KFSNT

های‌لایت

به اشتراک گذاشتن

کپی