Mphattuwelo 28
28
1Vano Isaki ahomwiihana Yakopi, ahonreriha n'unhimerya eeraka: Uhaathele athiyana o Nkanani mu. 2Ukhume ni urwee uPatan-Aramu, wa Petuweli, athumwanaya anumwana ni wanthele mwana a Lapanu, mwanrokoraya anumwana. 3Ni Nluku o'kuru cothene oorerihe, oopanke mayoyara ni uncereryannye ucuulu aa wiira nkhale atthu enci, 4ni oovahe iparakha ca Aparahamu, we ni ucuulu aa uyo, wiira uhalane ilapo iryaa nletto, Nluku invahilyawe Aparahamu.
5Phimaana Isaki ahonveleeliha Yakopi ilapo yo'Patan-Aramu, wa Lapanu, mwana a Petuweli o'Aramu, mwanrokorawe Repeka, anumwane Yakopi ni Isawu.
Isawu nanthela Nsumayili
6Vano Isawu woonyawe wiira Isaki honreriha Yakopi ni honveleeliha uPatan-Aramu wiira anthele nthiyana wonwo ni waanrerihawe va ahomwiirela: Uhaathele athiyana o Nkanani mu. 7Yakopi aheewelela athumwane na anumwane ni ahorwaa uPatan-Aramu. 8Isawu woonyawe athumwane wiira khayatteeliye nrima na athiyana o nkanani, 9ule ahorwaa wa Sumayili ni ahonthela nthiyana, eehaninya Malati, mwana a Sumayili, mwana a Aparahamu, mwanrokorawe Nepayote, woohaalikelela athiyana akina yaarinawe.
Nluku nankhumelela Yakopi uPeteli
10Yooyo ukati uyo Yakopi ahokhuma uPeresepa arwaaka uHarani. 11Ahophiya nipuro ni ahorupa, kontha waheela. Nenno nipuro nno ahokusa nluku nimoca, aheesa wiimuru ni aheecatalela. 12Vano aholoha nttora woonnyawe makwantta aneemesiye vathi mpaka ukwanya irimu ni phoonawe ancelo a Nluku awelaka ni akhuruwelaka makwantta ayo.
13Mwanene Nluku phaari ucuulu waya makwantta ni aheera: Mi ki Mwanene Nluku, Nluku a Aparahamu, athumwana, ni Nluku a Isaki. Yeela ilapo irupilyaa ila kinawuvaha we ni ucuulu aa. 14Ucuulu aa unhala ukhala toko ntthupi no vathi, ni unhala umwaryeela urwaaka unkhuma ncuwa mpaka unkela ncuwa, urwaaka uculu mpaka uhitto, ni mwa nlattu wawaa we ni ucuulu aa, unkophwanya iparakha unethi wothene wo mwiilaponi.
15Phi mi kiri ni we. Kinawusunka mapuro othene ankelaa uvira, kinawuturusela tho ila ilapo ela, kontha akinhala wuuhiya mpaka kipankeke itthu yukhuluvelihilyaka.
16Vano Yakopi wunwa wawe nkhoveni aheera: Khweli Mwanene Nluku ri nna nipuro nna. Mi akaacuwela. 17Ahoova ni aheera: Woopihilyaya nna nipuro nna! Nna khaninakhala nipuro nikina. Iri inupa ya Nluku, ula nkhora wo wirimu.
18Paahi, Yakopi ahonwa wicisuru, ahokusa nluku neesilyawe wiimuru nne, aheemesa, ni ahomiinela makhura waculu waya va. 19Phimaana ahovaha ncina nenno nipuro nno Peteli, nanso yeeyo iparasa eyo ncina naya nokhalayi neehaninya Lusi.
20Ni Yakopi ahomoopa natiri eeraka: Nluku akhalaka ni mi ni akisunkaka ila ikwaha ila, akivahaka iyolya, ni ikuwo coowara, 21ni kituruwelaka wo'salama uwani wa apaapa, Mwanene Nluku naahala ukhala Nluku aka. 22Ni nenna nluku neemesilyaka nna ninwa ukhala inupa ya Nluku ni cothene cinhalaa ukivaha, khweli kinawuvaha mphantte wonakhumi.
انتخاب شده:
Mphattuwelo 28: NNI
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© 2021, Wycliffe Bible Translators, Inc. All rights reserved.