Ts'etta 12
12
Allahın İbram qort'uliy
1Rəbbee İbramık'le eyhen:
– Yiğın cigabı, xınıbı, dekkın xav g'aleççe, Zı vak'le hagvasde cigeeqa hoora.
2Vas xayir-düə hevles,
vake xədın millet g'ales,
do axtı qa'as,
yiğne doyuka xayir-düə hevles.
3Zı vas xayir-düə huvuynbışis xayir-düə,
bed-düə hav'uynbışis bed-düə g'axuvles.
Ç'iyeyne aq'valyne gırgıne milletbışe valek'ena xayir-düə alyapt'as.
4İbram, Rəbbee eyhəxür, yəqqı'l gexha. Lutur mang'uka sacigee ayk'an. Xaraneençe qığeç'uyng'a, İbramıqa yights'ale xholle (75) senniy vod. 5İbramee Xaranee hı'iyn gırgın kar, xhunaşşe Saray, çocuna dix Lut, cun nukarar alyapt'ı Kana'anne ölkeeqa yəqqı'l gexha. Manbı Kana'anne ölkeeqa hiviyxharanbı. 6İbram maa'ar, Şekem eyhene cigeene, More eyhene mı'qəsqa hiyxhar. Manke maa'ad Kana'anaaşin milletniy eyxhen. 7Rəbb İbramıs gyagu, uvhuyn:
– Zı ina ölka yiğne nasılıs hevles.
İbramee cus gyaguyne Rəbbis, maa'ad q'urbanbı allya'an ciga alya'a. 8Mançer Bet-Eline şargılyne suvabınane cigeeqa ayk'an. Maa'ab mang'vee çadır giviyxə. Çadırne garbıl Bet-El, şargılib Ğay eyhena şahar vooxhe. İbramee maa'ad Rəbbis q'urbanbı gyaat'an ciga ali'ı, ı'bəədat ha'a. 9İbram k'ırra-k'ırra mançer canubulqa, Negevne sahrayne suralqa ayk'an.
İbram Misiree
10İne ölkee it'umun mısvalybı xət qeetxhava, İbram sık'ınne gahıs Misirqa ayk'an. 11Misireeqa hiviyxharang'a, mang'vee cune xhunaşşeyk'le Sarayk'le eyhen:
– Ğu geer uftanra yixhay, zak'le ats'an. 12Misirbışe ğu g'aycu, eyhesın: «İng'una xhunaşşevur». Manke manbışe zı gik'u, ğu üç'ürra g'alerçes. 13Hucoone ixhes, ğu manbışik'le eyhe, ğu yizda yiçu vor, yiğnemee zak sidyoot'a, üç'ürra g'alyaraççe.
14İbram Misirqa hirxhılymee, misiribışik'le mang'una xhunaşşe geer uftanra yixhay g'ecen. 15Zəiyfa g'aycuyne fironne, Misirne paççahne, insanaaşe məng'ı'ne micagiyvalina gaf fironus haa'a. Manar qiykekkana fironne sareeqa. 16Firon məng'ı'nimee İbramıkar yugra ıxha. Mang'uqa çavra-vəq'ə, əməler, devabı, nukar adamer, nukar yedar vooxhe.
17İbramne xhunaşşe Saraynimee Rəbbee fironneyiy fironne xaabınbışilqa xətta ık'arbı allya'a. 18Fironee İbram qort'ul, eyhen:
– İn hucoon ğu zak hı'iyn?! Nya'a Saray yiğna xhunaşşe yixhay ittevhu? 19Nişil-allane «yizda yiçuva» uvhu, məng'ı'ka davatbı ha'as hassır? Alert'e yiğna xhunaşşer, hoora!
20Fironee İbramiy cuna xhunaşşe, coqa vonnemeene karaka sacigee ölkeençe yəqqı'l hee'eva əmr haa'a.
اکنون انتخاب شده:
Ts'etta 12: YIQSUM
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید