Mbete Marki 16
16
1Nam ɔkna a bawu ɓil nam ti̧hmbih-i guy buma kal. Nam ti̧hmbih a sayu ka̧h da. Namu ɓa nam a titilu ɓil dimasi. Mari ké Makdala ke Salome ke Mari mah Zak, ku yeh sa̧wkpuh ɓay si nu̧h hul Zezu. 2Gel pele, ku ti̧h, ku mbi ful si ma tupal. Tipele teh niri. 3Ku toŋ vbi haniri ɓay ɓahri : « A geri mí ɓay kikri kasaw ké mbih nzak hoh kasaw-mbek hul ra hi̧ na le ? » Ku ɓah kaŋ ɓayu ké kasaw ra yih mbamba.
4Ku toŋ ɗih ya ke tupal, ku ɔr nun woyri mí ku ko kasaw ké mbih nzak hoh kasaw ra na fál mbew poŋ nzaku na ŋgah. Mí ku ka̧h ri. 5Ku rih si ɓil hoh kasaw-mbek hul le, ku ko seke mí kaɓ gel kan hul ra ké fál ndɔk lakna. Gar ye pu kpa̧h kpa̧h. Mí law wu̧yri ra lu niri gba̧y gba̧y. 6Bale seke ra ɓah hi̧ niri ɓahri : « Law woiri ɓá lu ya. I ƴo ƴah hul Zezu, nzuk Nasareɗ kú-u ɓar ni ké tul kpuh vbatay. Ke ti̧h ke puh záh ke pa̧ymun a foyu. Hul ye ta gelay ya. Í gi wuri ko gel-mbek hul ra ké na-ay. 7Wara le í si ɓah ɓayu hi̧ nzuk-dih fal yeri. Í ɓah hi̧ Piyer pi ɓahri, Zezu tɔr pol hi̧ niri ma Galile. Ku zíŋ ni ké ri kandɔk ké-e ɓah ɓayu hi̧ niri lewsa̧. »
8Mí ku el ti̧h ke ɓil hoh kasaw-mbek hul ra ke ɗukna ɓayu ké fe-u tɔkrɔ tem mun woyri tɔ-tɔkrɔ hi̧ mun woyri el to kpak kpak. Ku ɓah ɓay mbew hi̧ nzuk ya ɓayu ké hȩkme se niri.
Mbete ɓaysuki hul Zezu ké Marki vbeh gbu̧h ke gunu 8. Nzuk a ɓoruri mí vbeh ɓayri ɓoɗ ɓoɗ ɗa̧m Mbete Marki ɓay hi̧ gunu 8 ɓá gba kaŋ ya.
Ɓay a mbewu ké peh ya mí na-ay (gunu 9 kaŋto) :
9 Mí ku si ɓa gah-u ɓah nzak pihna ye hi̧ Piyer ke nzuk-dih fal a ɓoruri. Fá-falu-aw dale, ɓay Zezu ké suya ta ri ya, ké ka-kalna ya mí ɓa ɔkna ké na ɓa ŋgɔh ra, ke hi̧ ɓayu ti̧h ke nzak nzuk-dih fal yeri hi̧ nzukri gbam lah, ur ke fál tí̧h seh kpu̧ru ka̧h fál ríŋ seh.
Ɓay a seɗe-u ké pe-peh mí na-ay (gunu 9 a ɓoru si ka̧h 20) :
9 Nam a titilu ɓil dimasi ke tipele za̧y, Zezu ti̧h ke puh záh ke pa̧ymun a foyu, mí ke ti̧h tul Mari ké Makdala a ye ké Zezu ni̧h záhri toŋndɔk say ké tul ye lewsa̧. 10Mari ra tɔr si ɓah hi̧ nzuk-dih fal Zezuri lah. Ku ƴo vuh rew, ku laɓ mun woyri ɓa seh. 11Ku lah ke nzak wu̧y ra ɓahri, a ye ke ko Zezu ke nun ye, Zezu ƴo ri gaŋ bale, ku ya̧ ɓay wu̧y ra ya.
12 Fá-falu Zezu ti̧h tul nzuk-dih fal yeri seɗe. Ku ƴo si ma gun puh a hani. Mun ye na ɓoɗ. 13Mí ku el si ɓah ɓayu hi̧ tɔr nzuk-dih fal ye a ɓoruri lah, mí ku sa ya̧ ɓay woyri ya pi. 14Bol falu, nzuk-dih fal ye a boh falu mbewri kaɓ nzak fe su̧na, mí Zezu ti̧h tul woyri. Ke zɔm niri ɓay tul law kpuhna woyri kú-u to suyɓay nzuk a ɓoruri-aw ma kpah ɓay fe le, ku sa ya̧ ɓay nzukri ké ko ni ke nun woyri ya. 15Mí ke ɓah hi̧ niri ɓahri : « Í si wuri ké tusiɓa gbam. Sina woiri, í ka-kah ɓaysuki hul bi hi̧ nzukri riw ɓá lah. 16Nzuk ké kan law ye tulu, mí ke el ti̧h ɓil batem le, mi yá̧ ni ke ndɔk hul. Nzuk ké kan law ye tul bi ya le, salɓay hul ɓay ƴo tul ye.
17 Nzuk ké law ye ƴo mbew ziŋ mi le, fe saŋri ké-e ɓay laɓu mí na-ay : Ke riŋ ɗina bi, ke ɓay ni̧h záhri. Ke ɓay ɓah nzak ɓay a ɓoru ké-e tu pol ya. 18Ke ɓay mgba soy vbeɓ ke ndɔk ye. Ke ɓay nzo sa̧wkpuh hul kara ɓay ta i ni ya. Ke ɓay ɓaŋ ndɔk ye kan tul nzuk senari mí ku ɓay ziŋ mun gahna pi. »
19 Zezu Gaŋ tul feri riw ɓah ɓayaw hi̧ niri bale, ke tɔr ma nunmbam. Ke kaɓ ɓa ndɔk lakna Ŋgerzah. 20A woyri ba, ku ti̧h si ka-kah ɓaysuki hul Gaŋ tul feri riw a ye Ŋgermbay Zezu ké gelri gbam ké tusiɓa hi̧ nzukri lah. Gaŋ tul feri riw ƴo ziŋ niri mí ke ŋger niri hi̧ ketina ye kú-u ɓah laɓ pihna. Ke hi̧ ku laɓ fe saŋri sɔk keni munɓayu.
انتخاب شده:
Mbete Marki 16: SIAFNK
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© Wycliffe Bible Translators, Inc. All rights reserved.
