Mbete Matiye 4
4
1Wara mí Tempuki maŋ Zezu si ɓil lawkɔr. Ke poŋ diyabolo a ye mbay záh tukala ndoh law Zezu ke ɓay. 2Zezu su̧ fe ya nam bon niŋ ke suŋ bon niŋ dale, ɗaka i ni i-i. 3Mí mbay záh tukala nzuk-ndoh law nzukri ke ɓay gi ta̧w ye. Ke ɓahri : « Ké mu ɓa gun Ŋgerzah ra#4.3 Í mgba Mbete Matiye 3.17 tuh ke gel ki̧na-ay. , mú ɓah hi̧ kasawayri#4.3 Í mgba Mbete Matiye 3.9 tuh ke gel ki̧na-ay. ɓá ti̧h ɓa fe su̧na hi̧ mu, mú su̧. »
4Bale Zezu el ke ɓay ɓahri : « Mbete Ŋgerzah ɓahri, ɔkna nzuk na ɓay fe su̧na kaŋto ya. Wara le ɔkna na ɓay ɓayri gbam ké Ŋgerzah#4.4 Í mgba Mbete Sa̧w fe 1 tuh ke gel ki̧na-ay.ɓah#4.4 Ɓayay na ɓil Mbete Deutéronome 8.3.. »
5Wara mí diyabolo ra mbi ni si Zurusalem puh a luki ké law Ŋgerzah te sa sari. Ke hi̧ ni ke ƴo ti̧w gel a gaŋu zeŋleŋleŋ ké tul vul kani Ŋgerzah. 6Mí ke ɓahri : « Ké mu ɓa gun Ŋgerzah ra, mú zo vbu siɓa. Mbete ye ɓahri se, ke ɓay pih tem nzak pihna yeri ɓay tul wo. Ku héh mu rɔkɔ bɔk wo ɓá ɓe kasaw#4.6 Ɓayay na ɓil Mbete Siŋ 91.11-12. . »
7Zezu fer nzak ye ɓahri : « Mbete Ŋgerzah ɓah ra ɓáy ɓahri, Miƴori mí ɓa Ŋgerzah wo, mu fáh ni ya#4.7 Ɓayay na ɓil Mbete Deutéronome 6.16. . »
8Diyabolo el mbi ni si ƴo tul kasaw a gaŋu zeŋleŋleŋ, mí ke hi̧ ni ko tul puh laknari mbew mbew gbam ke fe riŋ ɗina woyri-aw pi. 9Mí ke el ɓah hi̧ ni ɓahri : « Mú huk siɓa, mú dim mi le, gbamaw, mi kú̧ ké ndɔk wo. »
10Wara mí Zezu ɓahri : « Nzukbaa, mú tɔr ma sa̧. Mbete Ŋgerzah ɓahri, Miƴori mí ɓa Ŋgerzah wo, a ye mbew yaŋ mú-u húk siɓa ké pol ye, mu dím ni mbew yaŋ#4.10 Ɓayay na ɓil Mbete Deutéronome 6.13.. »
11Kandɔkaw mí diyabolo poŋ Zezu. Ke tɔr bale, í ko, tem nzak pihna Ŋgerzahri gi ta̧w Zezu mí so ni.
12Zezu lah ɓahri, ku mgba Za̧h batisi mbih vul mgbal dale, ke poŋ tusiɓa Zude el si tusiɓa Galile. 13Ke loh ke Nasareɗ si kaɓ Kapernayum. Kapernayum ra na ɓel mahmbih Galile. Puh-u na fál kɔr a a̧y ké gun Izarayelri ɗi ɓa tusiɓa Zabuloŋ ke tusiɓa Naɓtali. 14Fe laɓna-u hi̧ ɓay ké Ezay gun nzak pihna Ŋgerzah a lewsa̧ ɓah ra laɓ ƴo gelu. 15-16Ɓayu ɓahri, tusiɓa Zabuloŋ, tusiɓa Naɓtali, tusiɓari ké ful-si ma mahmbih Medeterani sak ti̧h ri, ké na kala mahmbih Zurdeŋ, ké na tusiɓa Galile, tusiɓa a a̧y ké sa̧wnzuk a ɓoruri na ri, gun Izarayelri kaɓ ri ɓil tirima. Mí aŋay gel tehna ti̧h tul woyri. A woyri gun tusiɓa Zabuloŋri ke Naɓtalri kú-u kaɓ huh tem hul nduŋ, mí aŋay gel tehna teh tul woyri gberere#4.15-16 Ɓayay na ɓil Mbete Esaïe 9.1..
17Ur ke sew ké Zezu titil ka-kah ɓay lák mbay Ŋgerzah, ke ɓahri : « Í mbi law woiri ké tul suya ma fal, í el kan law tul Ŋgerzah ɓayu ké lák mbay a nunmbam gi ka̧h da. »
18Zezu ƴo ha̧rma ɓel mahmbih Galile dale, ke ko nzukri seɗe ɓa gun ɓil mahri, Simu kú-u ɗi ni ɓa Piyer ke yi̧n ye Andere. Ku ƴo vbu kȩke woyri ɓayu kú-u ɓa nzuk-mgba nzuyri. 19Mí Zezu ɓah hi̧ niri ɓahri : « Í gi fal bi. Mi ɓay sɔɓ wuri ti̧h ɓa nzuk-mgba nzukri hi̧ mi. »
20Sa gelu-aw mí ku poŋ kȩke woyri, mí ku dih fal ye. 21Ke kal ma pol, mí ke el ko gun ɓil mah a ɓoruri seɗe, Zak ke yi̧n ye Za̧h. Bah woyri ɓa Zebede. Ku kaɓ ɓil kumbon ke bah woyri ƴo lek nun kȩke. Mí ke ɗi niri. 22Sa gelu-aw mí ku poŋ kumbon, ku poŋ bah woyri, mí ku dih fal ye.
23Ke ha̧rma tusiɓa Galile gbam, ke ƴo firma gun Izarayelri ɓil vul misoŋ woyri ziɓri, ke ƴo ka-kah ɓaysuki lák mbay Ŋgerzah hi̧ niri, mí ke gah sam senari ɓoɗ ɓoɗ gbam. 24Riŋ ye ya̧ gelri hi̧ mberemu si ka̧h tusiɓa Siri gbam pi, mí ku fa̧h daɓa senari ɓoɗ ɓoɗ gbam gi keni ta̧w ye. Nzukri ké mun woyri hu yɔh, nzukri ké záh ƴo tul woyri, nzukri ké tul woyri la-laŋ, kpereri pi, mí ke gah niri. 25Daɓa nzukri ɓa ŋgi̧-u dih fal ye. Nzukuri-aw ur ke tusiɓa Galile ke tusiɓa Dekapol. Ku ur ke Zurusalem ke puh a ɓoruri ké tusiɓa Zude. Ku ur ke kala mbih Zurdeŋ pi.
اکنون انتخاب شده:
Mbete Matiye 4: SIAFNK
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© Wycliffe Bible Translators, Inc. All rights reserved.
