Mbete Luk 24
24
1Nam a sayu ɓil nam ti̧hmbih-i guy buma, namu ɓa nam a titilu ɓil dimasi, mí wu̧yri-aw ti̧h ke gel pele ɗeŋ ɗeŋ. Ku si ke sa̧wkpuh kú-u lek ra ka̧h keni tupal. 2Mí ku ko kasaw ké mbih nzak hoh ra na fál mbew poŋ nzaku na ŋgah. 3-4Ku rih si ɓil hoh kasaw-mbek hul ra, mí ku ziŋ hul Zezu a ye Gaŋ tul feri riw ya bale, gelɓay zi niri. Mí nzukri seɗe ti̧h nun woyri yelu ke mah gar a ndu̧yu kandɔk ndu̧yna gunwu̧y nunmbamri kaŋ. 5Hȩkme se niri mbamba, ku mu̧h nun woyri el ko kona ma siɓa, mí nzukri ra ɓah hi̧ wu̧yri-aw ɓahri : « Ɓay fe mí i ƴah nzuk ké sakra hulri le ? 6-7Ke ta gelay ya wara le, ke ti̧h ke puh záh ke pa̧ymun a foyu. Í ker ɓay fe ké-e ɓah hi̧ wuri ke sina woiri ma Galile ra, ke ɓahri, ɓa ra fe fe gaŋ kara, ku póŋ gun nzuk pirmatul ndoh ndɔk nzuk suyari, ku ɓár ni ké tul kpuh vbatay ɓay i-u. Nam a sayu le, ke tí̧h ke puh záh ke pa̧ymun a foyu. »
8Mí law woyri ɓá ker si tul ɓayri ké Zezu ɓah ra. 9Ku tɔr ke tupal el si ɓah hi̧ nzuk-dih fal ye a boh falu mbewri ke tɔr nzuk-dih fal ye a ɓoruri hi̧ ku lah. 10Wu̧yuri ra ɓa Mari ké Makdala, Zani, Mari ké ɓa mah Zak ba, wu̧y a ɓoruri ké ƴo ziŋ niri pi. Ku ƴo ɓah ɓayuri hi̧ gun nzak pihna Ŋgermbayri. 11Mí ɓayuri na nzuk-dih fal yeri ɓa kɔk ɓay. Ku ya̧ ɓay wu̧yuri ya. 12Piyer ba, kpa̧h ɗukna si ka̧h hoh kasaw-mbek hul ra. Ke ɗiŋ tul peŋ gel ma ɓil hoh ra. Ke ko ɓa ladara yaŋ. Mí ke el si puh. Gosoɓay zi ni zi-zi pi.
13Nzuk-dih fal Zezu a ɓoruri seɗe ba, mbi mahful si ma puh a hani ke namu-aw. Riŋ puh-u ɓa Emayus. Salful ur ke Zurusalem si ma Emayus ɗih mah salful boh falu mbew. 14Ku ƴo lu mberem tul feri gbam ké kal ɓil namri-aw, mí ku si keni sina. 15Ku ƴo fakla sa̧wɓayu bale, Zezu gi mbu̧h sina ziŋ niri. 16Mí nun woyri na nduŋ, ku tu ni ya. 17Mí ke ɓah hi̧ niri ɓahri : « Tul mberem fe mí i lu mí i fah keni ɓayay le ? »
Ku ta̧h ƴo ko kona ke law sa̧hna. 18Mí Kelewpas, nzuk a mbewu-aw, yih nzak ye ɓahri : « A wo mbew yaŋ ké Zurusalemay mí mu tu fe ké kal ɓil namri-ay ya ley ? »
19Mí Zezu ɓahri : « A fe mí kal le ? »
Ku ɓahri : « Fe ké kal tul Zezu ké Nasareɗ munu. A ye mí nzukri ké puh gun Izarayelri gbam tu ni ɓa gun nzak pihna Ŋgerzah. Ŋgerzah pih ni ke huhrumun ɓil fe laɓna pi ɓil ɓay ɓahna pi. 20Mí ŋgernzuk fe puhna Ŋgerzahri ke ŋgernzuk wahri mgba ni el ndoh ni ndɔk nzuk Rɔmri hi̧ ku kuŋ salɓay hul kan tul ye mí el ɓar ni ké tul kpuh vbatay. 21A wah ba, nah ɓaŋ law te tul ye ɓahri se, ɓa a ye mí ke ɓay ten gun Izarayelri ké ɓil mgbal Rɔmri. Ɓayu ɔh ya pi. Wara le ɓay a ɓoru gi ziŋ na ɓáy. Guri-ay mí ɓa nam a sayu. 22Mí wu̧y a hani-uri ké sakra wah gi zukru kerɓay wah ke ɓay a foyu-ay. Ké gel pele ɗeŋ ɗeŋ mí ku si tupal. 23Hulu ba, ta-a, mí ku gi ɓahri se, ku ko tem nzak pihnari seɗe ti̧h nun woyri mí sɔk niri ɓahri, Zezu ra ƴo ɔ-ɔkna ke pa̧ymun a foyu da. 24Nzuk a ɓoruri ké sakra wah ba, si tupal, mí ku ko gelu na kandɔk ké wu̧yri ɓah ra. Hulu ma, mí ku ziŋ ya. »
25Mí Zezu ɓah hi̧ niri ɓahri : « Uwa, kerɓay woiri na kpo̧k, law woiri kpu-kpuh. Yá̧ ɓay ké gun nzak pihna Ŋgerzah a lewsa̧ri vbeh se wuri se. 26Fe vbehna-awri ɓahri, ɓa ra fe fe gaŋ kara Ŋgermbay ɓay ko seh dara mí ke káɓ ɓil riŋ ɗina mbay ye ɓáy, kaŋ ya le wo ? »
27Kandɔkaw mí ke ndazi ɓayuri ɓil mbete Ŋgerzah ur ke tul mbete vbehna Moyiz si ka̧h mbete vbehna gun nzak pihna Ŋgerzah a lewsa̧ri. Ke ndazi ɓayri ké si tul Ŋgermbay ɓil fe vbehna-awri gbam hi̧ niri ku lah.
28Ku gi ka̧h ɗih ya ke ka̧w puh Emayus. A ye ke laɓ mun ye kandɔk ke ɓay kal ma pol. 29Mí ku gboh ni ɓahri, ké kaɓ ziŋ niri ɓay fe le, bɔklew ka̧h da. Zah le suŋ ɓay sih wara.
Kandɔkaw mí ke si kaɓ ziŋ niri.
30Ku kaɓ nzak fe su̧na bale, ke mbi peŋ, ke el ke tumbɔl hi̧ Ŋgerzah. Ke gɔh mí ke wal niri. 31Bale nun woyri mgbur, mí ku tu ni ɓa a ye. A ye ba, ke zi rik rik. 32Mí ku ɓah hi̧ hani ɓahri : « Fe vbehnari ké ɓil mbete Ŋgerzah ké-e ndazi ɓayu hi̧ na ké mahful gina wah-aw laŋ law wah laŋ gaŋ ya le ? »
33-34Ké seh-u-aw gaŋ, mí nzukri ké seɗe ra el ke fal woyri nzek si Zurusalem. Ku ziŋ nzuk-dih fal Zezu a boh falu mbewri ke tɔr nzuk-dih fal ye a ɓoruri ké gel kú-u mbu̧h hani. Nzuk-dih fal yeri ƴo ɓah ɓay tul ye Gaŋ tul feri riw ɓahri, ke ti̧h ke puh záh ke pa̧ymun a foyu ti̧h gaŋ. Ku ɓahri, Simu kara ko ni pi. 35Nzuk a seɗe-uri kara ki̧ fal feri ké kal ké mahful sina woyri ma Emayus dara mí ɓay peŋ ké-e gɔh wal niri, mí ku el tu ni.
36Ku ƴo ɓah ɓay kɔɓ ɓáy bale, Zezu ti̧h tul woyri mbu̧y. Mí ke ɓahri : « Mi vah wuri ke ɗeŋ. »
37Tem mun woyri ti̧h kereŋ, tul woyri fa̧h zikiki zikiki. Ku ɓahri se, záh mí ti̧h nun woyri. 38Mí ke el ɓahri : « Ani mí law woiri lu gba̧y gba̧y le ? Ɓay fe mí law woiri nzah ɓay ma gini ma sa̧ le ? 39Í ko wuri ndɔk bi ke bɔk bi-ay. A bi munu. Í gi za, í ko ɓay fe le, záh ta ke mun hay ke huhru kandɔk ké i ko mi-ay ya. »
40Kaŋ mí ke sɔk niri ndɔk ye ke bɔk ye. 41Law woyri rih niri mbamba hi̧ niri ku ya̧ ɓay ye ya. Gosoɓay zi niri pi, mí Zezu el ɓahri : « Fe su̧na ta-a le ? » 42Mí ku hi̧ ni nzuy a tɔku. 43Ke ya̧ su̧ ké nun woyri. 44Ke el ɓahri : « Sew ké mi ƴo ha̧rma ziŋ wuri, mi sɔk wuri ɓayri ké ɓil mbete vbehna Moyiz ke mbete vbehna gun nzak pihna Ŋgerzahri ke Mbete Siŋ ɓahri, ɓayuri sɔk ɓay tul bi sɔ-sɔk. Mi ɓahri se, ɓa ra fe fe gaŋ kara ɓayuri ɓay laɓ ɔh ke gelu gbam. »
45Wara mí ke mgbur nun woyri hi̧ ɓayuri-aw guh law woyri. 46Ke ɓahri se : « Fe vbehna mbete Ŋgerzahri kú-u vbeh lewsa̧ si tul ɓay koseh ké ɓay laɓ Ŋgermbay, ɓay ti̧hna ye ke puh záh ke pa̧ymun a foyu ké nam a sayu. 47Ku vbeh ɓay si tul ka-kah ɓay kú-u ɓay kah-u ur ke Zurusalem si ka̧h tusiɓa sa̧wnzuk a ɓoruri gbam ɓahri, kú mbi law woyri ké tul suya ma fal el kan law tul ye Ŋgermbay hi̧ ké lu salɓay hul ké tul woyri. 48A woiri mí i ɓa nzuk-te-teh ɓay feri ké i ko ra. 49A bi le mi pih Tempuki ké Bah bi wahɓay hi̧ wuri#24.49 Ɓay Tempuki si ma pol ɓil Mbete Fe laɓna Tempuki 2.33.. Mí í kaɓ sa Zurusalemay#24.49 Í ki̧ gun ɓay ké si ke gel ki̧na Mbete Matiye 26.18 ɓay tu ɓay Zurusalem. geŋ nam ké ŋgerna Tem ye ké deɓ ye ta-a gi ku̧ tul woiri. »
50Zezu maŋ niri si Beɗtani. Ke ɔr ndɔk kan tul woyri, mí ke lu mgbɔkɔ ku̧ tul woyri. 51Ke ƴo lu mgbɔkɔ ku̧ tul woyri bale, ke loh mun ye ké ta̧w woyri, mí ke tɔr ma nunmbam. 52Nzuk-dih fal yeri huk siɓa dim ni mí ku el si Zurusalem ke law rihna a luki. 53Ku si ɓil ila vul kani Ŋgerzah le, el si ra ɓáy ƴo dim ni kpatara.
اکنون انتخاب شده:
Mbete Luk 24: SIAFNK
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© Wycliffe Bible Translators, Inc. All rights reserved.
