Mbete Za̧h 5
5
1Bol falu ti̧hmbih ziɓri laɓ ké Zurusalem, mí Zezu hil si ri. 2Ké Zurusalem ra, nzakful a hani-u ƴo ri. Riŋ nzakful ra ku ɗi ɓa Fulsamiri. Mbih na ɓelu. Riŋ mbih-u ke nzak ebere ɓa Beɗzata. Ké nzak mbih-aw ku pɔr ri tem ɓa gel ndiɓi. 3Nzuk senari ɓa ŋgi̧-u na ri. Ra̧wri, kpereri, nzuk a a̧yri ké mun woyri hu yɔh kara na ri pi. 4Ku geŋ ɓay hi̧ nam a hani-u, tem nzak pihna Ŋgerzah ɓá gi laŋ mbih ra gbuksu gbuksu. Dale nzuk sena a suŋ suŋ ké ɗer si ɓil mbih ké laŋ ra pol le, sena ye poŋ ni, ké gah kew kew#5.4 Mbete sa̧w nzak gerek a haniri ta ke gel ki̧na-ay ya..
5Nzuk sena a hani mbew na ri. Ke na ɓa sena mbihmbam bon say falu toŋndɔk seɗe. 6Zezu ko nzukaw gel nam ye, mí ke tu ɓahri, nzukaw na sena mbihmbam ro-ro bale, ke ɓah : « Mu yih ɓay hi̧ mun wo ɓá gah le ? »
7Nzuk sena ra yih nzak ye ɓahri : « Ŋgernzuk, gelke mbih laŋ le, nzuk ké ɓay mbi mi ɓu ɓil mbih-u ta-a. Mi ƴo ɗer ma mari dale, nzuk a ɓoru kal ɗer poŋ mi. »
8Mí Zezu ɓah : « Mú ur síɓa. Mú mbi hih nam wo. Mú si sina. »
9Sa gelu-aw mí mun nzuk ra gah. Ke mbi hih nam ye, mí ke tɔr.
Namu-aw ɓa nam ɔkna. 10Kaŋ mí ziɓ Zuderi ɓah hi̧ nzuk ké mun ye gah ra ɓahri : « Guri-ay ɓa nam ɔkna. Bolkusol wah hah súk hih wo. »
11Nzuk ra yih nzak woyri ɓahri : « Nzuk ké gah mi ra ɓahri se, mí mbi hih bi, mí si. »
12Mí ku vbi ni ɓay ɓahri : « A ge mí ɓah hi̧ mu, mú mbi hih wo, mú si sina-aw le ? »
13Nzuk ké ziŋ mun gahna ra tu nzuk ké gah ni ya ɓayu ké Zezu lɔm mun rih haŋsekle daɓa nzukri.
14Bol falu bale, Zezu ziŋ ni ɓil ila vul kani Ŋgerzah, mí ke ɓah hi̧ nzuk ra ɓahri : « Mú lah, mun wo gah da. Mú poŋ laɓ suya rɔkɔ fe a mbamba-u ɓá laɓ mu ɓáy. »
15Nzuk ra el si sɔk ŋgernzuk ziɓri ɓahri se, Zezu mí gah ni. 16Sa̧wu mí ŋgernzuk ziɓri faŋ bol Zezu ƴo laɓ ni koseh ɓay fe le, ke gah nzuk sena ke nam ɔkna. 17Mí Zezu el ke ɓay hi̧ niri ɓahri : « Bah bi ƴo tul pihna ye ka̧h guri-ay, kaŋ pi mí a bi kara mi ƴo tul pihna-u. »
18Sa̧wu mí law ŋgernzuk ziɓri nzek ɓay i ni ɓay fe le, ke poŋ bolkusol nam ɔkna woyri kaŋto ya wara le, ke leh tul ye ke Ŋgerzah ɓahri, Ŋgerzah ɓa bah ye.
19Zezu el ɓah ra ɓáy ɓahri se : « Munu, ɓa ketina Ŋgerzah ɓa bah bi, mí-i ƴo sɔk wuri ɓayay, gun ta laɓ fe ke tul ye ya. Fe ké-e ko bah ye ƴo laɓu, mí ke laɓ, ɓayu ké fe laɓna bah ye mí gun ƴo ndɔlu. 20Ɓayu ké bah gun sa gun ye, mí ke ƴo sɔk gunu feri ké-e ƴo laɓu. Ke ɓay sɔk gun ye fe laɓna a mbamba-uri ɓáy. I káɓ yer. 21Kandɔk bah ye ké hi̧ záhri ti̧h ke puh záh, ku ɔ-ɔkna ke pa̧ymun a foyu#5.21 Í mgba Mbete Ézéchiel 37.3-14 ke Mbete Sa̧w fe 2.7 tuh ke gel ki̧na-ay., gun ye ƴo hi̧ nzuk a suŋ suŋ ké-e yih, ku ɔ-ɔkna kaŋ pi, 22ɓayu ké bah gun kuŋ salɓay hul kan tul nzuk ya. Le ke ndoh ŋgerna-kuŋ salɓay hul kan tul nzukri ké ndɔk gun ye, 23ɓay hi̧ nzukri gbam ɓá hȩk gunu kandɔk kú-u hȩk bah ye pi. Nzuk a a̧y ké hȩk gun ké bah-u pih ra ya le, hȩk bah ye ya pi. 24Munu, ɓa ketina. Mi ƴo ɓah hi̧ wuri ɓahri se, nzukay ké ƴo lah nzak bi, ké kan law tul nzuk ké pih mi le, nzuku ƴo ke ɔkna ɓa ŋgɔh. Salɓay hul ta tul ye ya. Ke ti̧h ke ndɔk hul gi ziŋ ɔkna da. 25Munu, nzuku ɔ-ɔkna ɓa ketina. Mi ƴo ɓah hi̧ wuri ɓahri se, namu ƴo gina wara le ka̧h da hulri ɓay lah kusol gun Ŋgerzah, ku ɔ́-ɔkna. 26Kandɔk bah gun ké ɓa sa̧w ɔkna, kandɔkaw pi mí ke hi̧ sa̧w ɔkna ra hi̧ gun ye. 27Ke ndoh ŋgerna-kuŋ salɓay hul kan tul nzukri ké ndɔk gun ye ɓay fe le, gunu ɓa gun nzuk pirmatul. 28Í hi̧ law woiri ɓá na wuri yer ya ɓay fe le, nam ƴo gina ké záhri ké puh záh ku láh kusol gun ra, mí ku él ti̧h ke tupal woyri riw. 29Nzuk-laɓ sukiri, ku tí̧h ke puh záh ke pa̧ymun a foyu ke ɔkna. Nzukri ké mbi mun woyri ndoh ɓil suya ba, ku ti̧h-u ke salɓay hul ké tul woyri#5.29 Í mgba Mbete Ten sa̧wɓay 20.13-15; 21.6-8 tuh ke gel ki̧na-ay.. 30Kandɔkaw mí a bi mi mah ɓay laɓ fe ke tul bi ya. Mi ƴo kuŋ salɓay kandɔk ké mi lah ke nzak baah. Mí salɓay ké mi kuŋ ra ƴo gelu ɓay fe le, mi taw tul bi ya wara le, kerɓay a ye ké-e pih mi gi.
31Mi lu ra lakna ɓay bi ke tul bi le, lakna bi ra ɓa kuŋɓay. 32Nzuk a ɓoru ƴo ri mí ƴo lu lakna ɓay bi. Mí-i tu ɓahri, tehɓay ye ké-e ten ké tul bi ɓa ketina. 33A woiri i pih nzukri si ta̧w Za̧h, mí ke te-teh ɓay bi hi̧ wuri. 34A bi ba, mi ta ke ɗaka ɓay hi̧ nzuk ɓá lu lakna ɓay bi ya. Le mi ƴo ɓah hi̧ wuri kaŋ ɓay í ti̧h ke ndɔk hul. 35Za̧h ra ɓa lampe ké teh gel, mí law woiri rih wuri ɓay i zay mun woiri ɓil gel tehna ye ke sa̧wseh ndi̧ kaŋto.
36Mí fe-teh ɓay bi a ɓoru ƴo ri. Tehɓayu ŋger kal tehɓay Za̧h ké-e teh tul bi. Pihna ké bah bi hi̧ mi ɓay mí ɔh laɓu ra te-teh ɓay bi sɔk ɓahri se, bah bi mí pih mi gi. 37Baah ké pih mi a ye ra ke te-teh ɓay bi teh. Kusol ye le, i lah bɔk mbew ya. Nun ye kara i ko ya pi. 38Ɓay ye na law woiri ya ɓay fe le, a ye ké-e pih ni gi ra i kan law tul ye ya. 39I ƴo faŋ ɓa ɗih-u ɓil mbete bolkusol Ŋgerzah ɓay fe le, i ɓahri se, i ƴó ke ɔkna ɓa ŋgɔh ɓilu. Mí fe vbehna-uri te-teh ɓay bi. 40Mí i sa gi ta̧w bi ɓay ƴo ke ɔkna ra ya. 41A bi mi ta ke ɗaka ɓay hi̧ nzukri ɓá loŋ riŋ bi ya. 42Mi tu ɓahri, law sana Ŋgerzah ta ta̧w woiri ya.
43Mi gi ke riŋ bah bi, mí i sa ya̧ mi ya. Gelke nzuk a ɓoru mí gi ke tul ye le, i ya̧ nzukaw. 44Kandɔk ké i yih ɓay hi̧ nzukri ɓá loŋ riŋ woiri, mí ɓay riŋ ɗina ké Ŋgerzah a mbew yaŋaw kan tul nzukri, i taw ya ra wa, i láɓ ani dara ɓay í kan law tul ye ɓáy le ? 45Í lu kerɓay ké ɓil law woiri ɓahri, a bi mí-i sék wuri hi̧ bah bi. Moyiz mí ɓa nzuk-sek wuri, a ye ké i ɓaŋ law kan tul ye. 46Moyiz vbeh ɓay tul bi ɓil mbete vbehna bolkusolaw. I lah ra nzak Moyiz dale, i kan law tul ɓay bi da. 47I sa lah ɓayri ké na ɓil mbete fe vbehna-u ya ra wa, i láɓ ani dara mí i láh ɓay biri ɓáy le wo ? »
اکنون انتخاب شده:
Mbete Za̧h 5: SIAFNK
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© Wycliffe Bible Translators, Inc. All rights reserved.
