Mbete Fe laɓna Tempuki 6
6
Ɓay ŋgerna Tempuki ké sakra nzuk-dih fal Ŋgermbayri ké Zurusalem
1Ke seh-aw ra, ziɓri ɓa ŋgi̧-u ti̧h ɓa nzuk-dih fal Zezu, mí tul woyri ro ma pol pol. Ziɓ a ɓah nzak gerekri kú-u gi Zurusalem sa̧w puh woyri, ku vuh mun woyri ɓay tul ziɓ a ɓah sa̧w nzak woyri ebere. Ku su̧h ɓay ɓahri, sa̧wseh-wal fe su̧na le, ku yȩkre tul wu̧y seh ziɓ a gi-uri yȩ-yȩkre kpatara. 2Wara mí gun nzak pihnari ké boh falu seɗe ra ɗi mbu̧hna ke nzuk-dih fal Ŋgermbayri, mí ku ɓahri : « Yi̧n wahri, náh poŋ nzak pihna Ŋgerzah ɓay náh wal fe su̧na le, gelu ya. 3Kaŋ dale su ɓay í lu wo̧rori toŋndɔk say ké sakra woiri ké nzukri lu lakna ɓay woyri. Sa̧w siŋ sina woyri ɓa Tempuki, ku ru̧-ru̧ pi le, nah ɓáŋ pihna-ay kan ndɔk woyri. 4A wah ba, nah ƴó tul goŋ Ŋgerzah, nah ka-kah ɓay ye hi̧ nzukri lah. »
5Ɓayay ra rih law nzuk-dih fal Ŋgermbayri riw. Bale ku lu Eten, a ye ké sa̧w siŋ sina ye ɓa Tempuki. Ɓay Ŋgermbay kara ɓar sa̧w ké ɓil law ye pi. Ku lu Filiɓ, Porokor, Nikanor, Timu, Parmenas ke Nikola nzuk Antiyos a hani ké sɔɓ mun ye ɓa ziɓ pi. 6Ku fa̧h niri si sɔk gun nzak pihnari. Gun nzak pihnari goŋ Ŋgerzah, mí ku ɓaŋ ndɔk ku̧ tul woyri ɓaŋ pihna-ay kan ndɔk woyri. 7Ɓay Ŋgerzah ya̧ gel ké Zurusalem, ɓayu mgba law nzukri hi̧ ku dih fal Ŋgermbay. Ŋgi̧na woyri seh ma pol pol. Nzuk fe puhna Ŋgerzahri ŋgi̧-ŋgi̧ mí ya̧ ɓay Ŋgermbay Zezu ké haŋsekle woyri pi.
8Eten ra, lawsuki Ŋgermbay ke ŋgerna Tempuki mbah law ye hi̧ ni ke laɓ fe saŋri ɓa ŋgi̧-u ké pol yi̧n ye ziɓri. 9Ziɓ a ɓah nzak gerekri ƴo ri. Ku si misoŋ ziɓri ké riŋu sɔk sa̧w woyri ɓa mgbalri ké ti̧h ke ɓil mgbal da. A woyri-aw, ku ur ke tusiɓa Siren ke puh a luki Aleksandere. A ɓoruri ur ke tusiɓa Silisi ke Azi mbu̧h ziŋ niri pi. Ku ur ke fahɓay ziŋ Eten. 10Mí ku ta̧h vana mba ni ke ɓay kpu̧y ɓay nun ru̧na ké Tempuki hi̧ ni ke ɓah keni ɓay. 11Wara mí ziɓri ké fahɓay ziŋ Eten ra, ku ɓaŋ ɓay ndoh ɓil law nzuk a haniri ɓay kú laɓ ɓay ziŋ Eten ɓahri : « Nah lah ɓay ɓahna ye gbur bolkusol Moyiz pi, ɓeɓ riŋ Ŋgerzah pi. » 12Sam ɓay ɓahna woyri kaŋaw mí, zaŋ law ziɓri ke law ŋgernzuk puh woyri ke law nzuk-sɔk mbete bolkusol Ŋgerzahri. Mí ku mgba Eten si keni gel-kuŋ salɓay. 13Bale ku gi ke nzukri kú-u ɓaŋ ɓay ndoh ɓil law woyri ra, mí kuŋ ɓay ku̧ nzak ye ɓahri : « Gunwo̧ro-ay, namri gbam, ke ƴo ɓeɓ vul ké su ɓay ƴona Ŋgerzah, ke ƴo ɓeɓ bolkusol Moyiz pi. 14Nah lah ɓay ɓahna ye ɓahri se, Zezu nzuk Nasareɗ ɓay dir vul kani-aw wuruk wuruk pi, ke él sɔɓ sa̧w fe laɓna Ŋgerzah ké Moyiz sɔk zih wahri ra pi. »
15Bale nzuk-kuŋ salɓayri gbam ko gel yi̧m ma tul Eten. Nun ye ndu̧y kandɔk nun tem nzak pihna Ŋgerzah kaŋ.
انتخاب شده:
Mbete Fe laɓna Tempuki 6: SIAFNK
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© Wycliffe Bible Translators, Inc. All rights reserved.
