Mbete Fe laɓna Tempuki 3
3
Tempuki hi̧ Piyer-ri ɔr gɔm hi̧ riŋ ɗina Ŋgermbay Zezu mgbe
1Sa̧wseh say bɔklew ɓa sa̧wseh-goŋ Ŋgerzah ziɓri#3.1 Lewsa̧, Ŋgerzah sɔk ziɓri ɓahri, nzuk fe puhnari ɓá puh fe ma vul kani ye ke tipele ke bɔklew pi. Ke sa̧wseh-uri, ziɓri goŋ Ŋgerzah ke haniri ké ri. Piyer-ri si ri kandɔk ké ɓa fe laɓna sa̧w woyri ziɓri. Í ki̧ Mbete Exode 29.39-42 ɓay tu ɓayu., mí Piyer ke Za̧h ƴo hil ma vul kani Ŋgerzah. 2Gɔm a hani mbew ƴo ri. Ku mbuŋ ni gbirkitik. Namri riw, ku suk ni si kan nzakful ila vul kani Ŋgerzah a hani ɓay goŋ fe ké ta̧w nzukri ké ƴo rih ma ɓil ila vul kani ra. Riŋ nzakful ra ɓa Ful Su Kona. 3Ke ko Piyer ke Za̧h ƴo rihna bale, ke rah ndɔk goŋ niri fe. 4Piyer ke Za̧h ko ni ɗekeh, mí Piyer ɓah hi̧ ni ɓahri : « Mú ko kona ma nun wah-ay. »
5Gɔm ra ko niri gbak gbak, ke ker ɓahri, ke zíŋ fe. 6Dale Piyer ɓah hi̧ ni ɓahri : « Mi ta ke fe hani ya, mí fe ké mi ƴo keni ba, mi hí̧ mu. Ur síɓa, mú si sina ke riŋ Ŋgermbay Zezu ké Nasareɗ. »
7Piyer mgba ndɔk ye, ke ɔr ni ƴo síɓa. Sa gelu-aw mí, bɔk ye kpuh kpaŋ kpaŋ. 8Ke zo, ke si sina. Ke rih ziŋ niri si ɓil ila vul kani Ŋgerzah pi. Ke si sina, ke zo zakra zakra, ke pir Ŋgerzah pi.
9Ziɓri gbam ko ni si sina, ku ko ni ké-e pir Ŋgerzah. 10Mí ku tu ni ɓa nzuk ké kaɓ nzakful kú-u ɗi ɓa Ful Su Kona ɓay goŋ fe munu. Bale ku kaɓ yer. Fe-u na niri ɓa saŋ.
11Ké-e poŋ fal Piyer ke Za̧h ya ra, ku ɗuk yir si ta̧w woyri ké huh tem#3.11 Temaw kú-u ɗi ɓa daŋki Salomoŋ mbay a luki ɓa tem a bawu ké peh mah hani ke pehna ila a fal mbew. Gelu a-ah pi. ké riŋu ɓa tem Salomoŋ mbay a luki#3.11 Salomoŋ ɓa gun ɓil Daviɗ mbay a luki a lewsa̧. Ɓay tu ɓay Salomoŋ mbay a luki, í ki̧ Mbete 1 Rois 1-11.. Fe saŋaw ti̧h tem mun woyri kereŋ. 12Piyer ko nzukri ké ɗuk yir gi, mí ke ɓah hi̧ niri ɓahri : « Yi̧n biri, gun Izarayelri, a fe mí na wuri ɓa saŋ le wo ? Ɓay fe mí i ko na yi̧m kaŋaw le ? I ker ɓahri, gɔmay si sina ke ŋgerna wah mini ɓay hȩkna ké nah ƴo hȩk Ŋgerzah le wo ? 13Ŋgerzah ké zih wah Abaraham, Isak, Zakoɓ dim ra, ke hi̧ riŋ ɗina gun-laɓ pihna ye#3.13 Gun-laɓ pihna Ŋgerzah ɓa riŋ ɗina ké Ŋgerzah tu nzuk-mbi bolkusol ye laɓ keni pihna. Í ki̧ Mbete Esaïe 42.1-4 ke gel ki̧na 52.13 si ka̧h 53.12 ke Mbete Luk 3.22 ɓay tu ɓay riŋ ɗina-ay. Zezu mgbe. A ye ké i saŋ wuri ni, i mgba ni ndoh ndɔk guvener Pilaɗ. Pilaɗ ba, yih ɓay poŋ ni, mí i sa-a. 14I poŋ nzuk ké Ŋgerzah lu ni ɓa nzuku a ye, nzuk ké ɓay mgba tul ye ya#3.14 Ziɓri tu ɓahri, mbete bolkusol Ŋgerzah a polri sɔk ɓahri, Ŋgerzah ɓay mbi nzuk mbew ɓa ŋgermbay. A ye, ɓay mgba tul ye ya. Kandɔkaw mí Piyer sɔk ziɓri ɓahri, ŋgermbay kú-u geŋ ra ɓa Zezu, mí ke ɓahri, a woyri ku i Zezu mbay ké Ŋgerzah pih hi̧ niri.. I goŋ Pilaɗ hi̧ sel Bar-Abba nzuk-i hul ma mí hi̧ wuri. 15Kaŋ mí i i nzuk sa̧w ɔkna, mí Ŋgerzah hi̧ ni ti̧h ke puh záh ke pa̧ymun a foyu. A wah, nah ɓa nzuk-ɓah tehɓay ti̧hna ye. 16Gɔmay ké i ko ni, i tu ni ra, ɓay tul riŋ Zezu ké nah kan law sa tulu mí riŋ ye gah bɔk gɔmay hi̧ ni ke si sina. Kandɔk ké nah kan law sa tul ye ra, mí ke gah keni gɔmay kew kew.
17Aŋay, yi̧n biri, fe ké i laɓ ziŋ Zezu-aw, mi tu ɓahri, fe-u i laɓ va̧h dan kerɓay, a woiri ke ŋgernzuk puh woiri pi. 18Mí Ŋgerzah laɓ kandɔk ké-e sɔk pol sa̧ hi̧ gun nzak pihna yeri gbam. Ke ɓahri, Ŋgermbay ké-e ɓay pih ni ra ɓay ko seh mbamba. Mí ɓay ɓahna ye laɓ ƴo gelu. 19Kaŋ dale í mbi law woiri ké tul fe laɓna suya woiri ra ma fal, í el gi ta̧w Ŋgerzah ɓay ké sel salɓay ké tul woiri ma fal, 20í mbi law woiri el gi ta̧w Ŋgerzah ɓay hi̧ Gaŋ wah ɓá ya̧ wuri ké ɓil koseh hi̧ law woiri ɓá voh, í mbi law woiri, í el gi ta̧w Ŋgerzah ɓay hi̧ ké pih Ŋgermbay Zezu, a ye ké Ŋgerzah mbi ni pol sa̧ ɓa mbay woiri, ké gi ƴo ziŋ wuri. 21A ye, Zezu ra, mah ɓay ké ƴo nunmbam ba, mí feri riw ké Ŋgerzah lek ke titilu da̧y kandɔk ké gun nzak pihna yeri ɓah ɓayu ra ɓay el lek ɔh gaŋ ba#3.21 Mahful-sɔɓ sa̧w nzak a ɓoru mí na-ay : A ye, Zezu ra, mah ɓay ké ƴo nunmbam kpu̧ru ka̧h nam ké feri riw ké Ŋgerzah lek ke titilu da̧y kandɔk ké gun nzak pihna yeri ɓah ɓayu ra ɓay el lek ɔh gaŋ ba..
22Moyiz, gun nzak pihna Ŋgerzah ɓah hi̧ na lewsa̧ ɓahri se, Gaŋ wah Ŋgerzah ɓay lu nzuk ké haŋsekle wah gun Izarayelri ɓa gun nzak pihna ye. Ŋgerzah ɓay pih ni kandɔk ké-e pih Moyiz#3.22 Í ki̧ Mbete Za̧h 6.14 ɓay tu ɓahri, Zezu hi̧ nzukri fe su̧na ɓil lawkɔr kandɔk Moyiz. Mbete Za̧h 4.19 sɔk ɓahri, kandɔk Moyiz ké hi̧ nzukri mbih nzona ɓil lawkɔr, Zezu ɓa mbih hi̧ nzukri ɔkna.. Náh te suk wah lah ɓayri riw ké-e ɓah hi̧ na. 23Nzuk a suŋ suŋ ké sa lah nzak gun nzak pihna-aw ya le, Ŋgerzah ɓay ten ni ké sakra sa̧wnzuk ye ma kala. Ke ɓay ziŋ ɓeɓna wu̧m#3.23 Ɓayay na ɓil Mbete Deutéronome 18.15-19. .
24Moyiz ke gun nzak pihna Ŋgerzah a lewsa̧ri riw ɓah ɓay gina Ŋgermbay. Ur ke Samuyel ka̧h tul gun nzak pihna Ŋgerzah a ɓoruri ké toŋ ni ɓah ɓay sew ké nah ƴo ri guri-ay. 25A woiri mí Ŋgerzah pih gun nzak pihna yeri pol sa̧ hi̧ zih woiri, nzak pihna-u na ɓay woiri, i ɓa gun zih gun nzak pihnari-aw. Ke wahɓay lewsa̧ ziŋ zih wah Abaraham ɓahri : Mi̧hri wo ɓay na ɓa sa̧w mgbɔkɔ-ku̧ tul sa̧wnzuk a ɓoruri riw pi#3.25 Ɓayay na ɓil Mbete Sa̧w fe 22.18.. Mí ke ŋga̧h tul ɓayu ziŋ zih wah. 26Ɓay woiri mí Ŋgerzah pih gun-laɓ pihna ye, mí ke hi̧ wuri ni ke titilu. Mgbɔkɔ ye ké na tul ye ku̧ tul woiri le, í sɔɓ law woiri ké tul fe laɓna a pipiri-u woiri-aw ma fal. »
انتخاب شده:
Mbete Fe laɓna Tempuki 3: SIAFNK
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© Wycliffe Bible Translators, Inc. All rights reserved.
