SENESI 4
4
Kaino mo Apele
1Nee iloi leva e Atama ia Eva, tona ohoana: pea nee faitama leva ia Eva, pea nee ina fanaui leva ia Kaino, pea nee ina ui leva: Kua au mau he tagata mai te Eteleno. 2Nee ina toe fanaui foki te tehina o Kaino ko Apele. Nee tauhi manu ia Apele, pea nee gaue kele ia Kaino.
3I he aho, nee fai leva e Kaino ki te Eteleno hana failaulau aki ni fua o te kele. 4Pea nee fai foki e Apele, i tona potu, hana failaulau ki te u uluaki tupu o tana faga manu, pea mo onatou gako. Nee tali leva e te Eteleno ia Apele mo tana failaulau. 5Kae nee mole ina tali leva ia Kaino mo tana failaulau. Nee ita leva ia Kaino, pea nee mata mamahi leva ia ia. 6Nee ui leva e te Eteleno kia Kaino: Kotea ae e ke ita ai, kotea ae e ke mata mamahi ai? 7Kapau e ke fai te mea ae e totonu, pea e toe tuu ou mata ki oluga; kae kapau e ke fai te mea ae e kovi, pea e moe anai te agahala i tou mua matapa. E loto ia ia ke pule kia koe, kae ko koe ke ke pulei ia ia. 8Kae nee ui leva e Kaino ki tona tehina ko Apele ke na olo ki fafo. I tana kaku ki te u gaueaga, nee oho leva ia Kaino ki tona tehina ko Apele, o tamatei ia ia.
9Nee ui leva e te Eteleno kia Kaino: Kofea tou tehina ko Apele? Nee ina tali leva: E mole au iloi; Pe ko te tagata taupau au o toku tehina? 10Pea nee ui leva e te Atua: Kotea te mea ae kua ke fai? E tagi mai kia au te leo o te toto o tou tehina mai te kele. 11Koia i te aho nei, e ke malaia ai anai i te kele aena, ae nee ina avahi tona gutu o tali mai tou nima te toto o tou tehina. 12Ka ke gaue anai ki te kele, e mole toe foaki atu anai e te kele kia koe tona koloa. E ke hehe anai, pea e ke foli noa anai i oluga o te kele. 13Nee ui leva e Kaino ki te Eteleno: E ua mamafa fau taku tua, e mole feala ke au amo ia ia. 14Koeni e ke kapu au i te aho nei i te kele aeni; pea e tonu leva ke au nono o mamao mo koe; e au liliu anai ko he mea hehe mo foli noa i te fuga o te kele, pea ka mau anai au e he tahi, pea e ina tamatei anai au. 15Nee ui leva e te Eteleno kia ia: Kapau e tamatei Kaino e he tahi, e totogi anai ia Kaino o tua fitu. Pea nee tuku leva e te Eteleno kia Kaino he fakailoga, o tupu ke aua naa tamatei ia ia e he tahi ae e ina mau anai ia ia.
Hakoga o Kaino
16Pea nee fakamamao leva ia Kaino maia mata o te Eteleno, pea nee nofo leva ia ia i te fenua o Noti, i te potu esite o Eteni.
17Nee alu leva ia Kaino ki tona ohoana; pea nee faitama leva tona ohoana, pea nee ina fanaui leva ia Enoke. Nee ina fakatuu leva he kolo, pea nee ina tuku leva ki te kolo aia te higoa o tona foha ko Enoke.
18Nee tupu leva maia Enoke ia Ilate, pea nee tupu maia Ilate ia Mehusaele, pea nee tupu maia Mehusaele ia Metusaele, pea nee tupu maia Metusaele ia Lemeke.
19Nee ohoana leva ia Lemeke mo ni fafine e toko lua: ko te higoa o te tahi ko Ata, pea ko te higoa o te tahi ko Tesila. 20Nee fanaui leva e Ata ia Sapale: ko te tamai aia o natou ae e nonofo falela ia tafa o anatou faga manu. 21Ko te higoa o tona tehina ko Supale: ko te tamai aia o natou fuli ae e faimusika ki te alepe mo te salumo. 22Nee fanaui leva e Tesila ia Tupale-Kaino, ae nee ina fau te u mea gaue fuli ae e fai aki te kapa mo te ukamea. Ko te tuagaane o Tupale-Kaino ko Naama.
23Nee ui leva e Lemeke ki ona ohoana:
Ata mo Tesila, ke kolua fakalogo mai ki toku leo!
Ohoana o Lemeke, ke kolua fakalogo mai ki taku palalau!
Nee au tamatei he tagata ke totogi ai toku lavea,
Mo he tama tupulaga ke totogi ai toku kafo.
24E totogi anai ia Kaino aki ni tagata e toko fitu,
Pea mo Lemeke aki ni tagata e fitugofulu ma fitu.
Seti kia Noe
25Nee toe iloi leva e Atama tona ohoana; pea nee fanaui leva e tona ohoana he tama, pea nee ina fakahigoa leva ia ia ko Seti, koteuhi nee ina ui: Kua toe foaki mai e te Atua kia au he tahi foha ke fetogi ai ia Apele ae nee tamatei e Kaino. 26Nee toe mau foki e Seti hona foha, pea nee ina fakahigoa ia ia ko Enosi. Nee kamata leva i ai te toe palalau ki te huafa o te Eteleno.
اکنون انتخاب شده:
SENESI 4: WB2011
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© 2011, Eglise évangélique, chez Lotoato Logote Hihifo, Vaitupu, Wallis
- Les droits sont administrés par Midi Bible, une branche de la Société Biblique de Genève
- Rights are administrated by Midi Bible, a branch of Société Biblique de Genève, 1032 Romanel-Sur-Lausanne, Switzerland