SENESI 17
17
Hai a te Atua mo Apalamo
1I te tau hivagofulu ma hiva o Apalamo, nee ha leva te Eteleno kia Apalamo, o ui kia ia: Ko au ko te Atua Mafimafi. Ke ke haele i oku mua, pea ke agatonu! 2E au fakatuu anai taku hai ia koe mo au, pea e au liuliuga anai ia koe o lahi.
3Nee fakamapee leva ia Apalamo o fakatuu ona mata ki te kele; pea nee palalau leva te Atua kia ia, o ui: 4Koeni taku hai ae e au fai kia koe. E ke liliu anai ko te tamai o ni puleaga kaugamalie. 5E mole toe higoa anai ia koe ko Apalamo; kae e ke higoa anai ko Apalahamo, koteuhi e au fakaliliu anai ia koe ko te tamai a ni puleaga kaugamalie. 6E au liuliuga anai ia koe o lahi, e au fakatupu anai maia koe ni puleaga; pea e tupu anai ni hau maia koe. 7E au fakatuu anai taku hai ia koe mo au, pea mo ou hakoga i muli mai, o mulimuli ki onatou taitupu. E heegata anai te hai aeni, pea e ina fakaha: ko Au ko tou Atua, pea ko te Atua o tou hakoga i muli. 8E au foaki anai kia koe mo tou hakoga i muli, te fenua ae e ke nofo matapule ai, te fenua katoa o Kanaane, ko tou tofiga heegata, pea e au liliu anai ko tonatou Atua.
Te silikosisio, fakailoga o te hai
9Nee ui leva e te Atua kia Apalahamo: Ko koe, e ke tauhi anai taku hai, e koe mo tou hakoga i muli, o hoholo i onatou taitupu. 10Koeni taku hai ae e tonu ke koutou tauhi i toku vahaa mo koutou, e koe mo tou hakoga i muli: E silikosisioi anai te tagata fuli ia koutou. 11E tuu anai tokotou silikosisio ko he fakailoga o te hai ia au mo koutou. 12I te valu aho, e silikosisioi anai te u fanau tagata fuli ia koutou, o hoholo i okotou taitupu, tatau aipe ae nee tupu i te loto fale mo ae nee totogi paaga mai he tagata matapule, kae nee mole kau ki tou lanu. 13E silikosisioi anai te tagata faifekau ae nee tupu i tou loto fale, pea mo te tagata faifekau ae nee ke totogi paaga; pea e fai anai taku hai i tokotou kakano o hage ko he hai heegata. 14Ko te fanau tagata ae e mole silikosisioi anai i tona sino, e fakamavae anai ia ia mai tana hahai, koteuhi kua ina siaki taku hai.
15Nee ui leva e te Atua kia Apalahamo: Aua naa ke toe foaki anai kia Salai tou ohoana, te higoa ko Salai; kae e higoai anai ia ia ko Sala. 16E au tapuaki anai kia ia, pea e au foaki anai kia koe he foha ia ia. E au tapuaki anai kia ia, pea e liliu anai ia ia ko te fae a ni puleaga; e tupu anai maia ia ni hau o ni hahai. 17Nee fakatomapee leva ia Apalahamo o fakatuu ona mata ki te kele; pea nee kata leva ia ia, o ui i tona loto: E tupu feafeai anai he foha ki he tagata kua tau teau? Pea e faitama feafeai anai ia Sala, ae kua tau hivagofulu? 18Pea nee ui leva e Apalahamo ki te Atua: Ofa ke mauli ia Isemaele i ou mua! 19Nee ui leva e te Atua: E mooni e fanaui anai e tou ohoana ko Sala he foha kia koe; pea e ke foaki anai ki ai te higoa ko Isaake. E au fakatuu anai taku hai mo ia pea mo tona hakoga i ona muli. E tuu anai ia ia ko he hai o heegata. 20Kia Isemaele, kua au tali tau kole. Koeni, e au tapuaki anai kia ia, e au liuliuga anai ia ia, e au liuliuga anai ia ia o lahi; e tupu anai maia ia ni hau e hogofulu ma lua, pea e au fakaliliu anai ia ia ko he puleaga lahi. 21Kae ko taku hai, e au fai anai ia mo Isaake, ae e fanaui anai e Sala kia koe i te temi totonu aeni o te tau ka hau. 22I te osi o tana palalau kia ia, nee malaga leva te Atua i oluga o Apalahamo.
23Nee too leva e Apalahamo ia Isemaele, tona foha, mo natou fuli ae nee tupu i tona fale, pea mo natou fuli ae nee ina totogi paaga, te u tagata fuli o tona fale. Pea nee ina silikosisioi leva natou i te aho aia, o mulimuli ki te fakatotonu ae nee tuku e te Atua kia ia. 24Nee tau hivagofulu ma hiva ia Apalahamo i te aho ae nee silikosisioi ai ia ia. 25Nee tau hogofulu ma tolu ia Isemaele tona foha, i te aho ae nee silikosisioi ai ia ia. 26Nee silikosisio leva ia Apalahamo mo tona foha ko Isemaele i te aho e tahi. 27Pea nee silikosisio leva mo ia te hahai fuli o tona fale, natou ae nee tupu i tona fale pea mo natou ae nee totogi paaga mai ni matapule.
اکنون انتخاب شده:
SENESI 17: WB2011
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© 2011, Eglise évangélique, chez Lotoato Logote Hihifo, Vaitupu, Wallis
- Les droits sont administrés par Midi Bible, une branche de la Société Biblique de Genève
- Rights are administrated by Midi Bible, a branch of Société Biblique de Genève, 1032 Romanel-Sur-Lausanne, Switzerland