SENESI 12
12
Mauli o Apalamo: tona paui
1Nee ui leva e te Eteleno kia Apalamo: Alu ia koe i tou fenua, mo tou puleaga, mo te fale o tau tamai, ki te fenua ae e au fakaha atu anai kia koe. 2E au fakatupu anai ia koe ia he puleaga lahi, pea e au tapuaki anai kia koe; e au fakaliliu anai tou higoa o lahi, pea e ke liliu anai ko he matapuna o te tapuakina. 3E au tapuaki anai kia natou ae e tapuaki anai kia koe, pea e au fakamalaia anai natou ae e laukovi anai kia koe; pea e tapuakina anai te u famili fuli o te kele ia koe.
4Nee alu leva ia Apalamo, o mulimuli ki te palalau a te Eteleno kia ia, pea nee alu leva ia Lote mo ia. Nee tau fitugofulu ma nima ia Apalamo, i tana mavae mai Salani. 5Nee ave leva e Apalamo tona ohoana ko Salai, mo Lote, te foha o tona tehina, pea mo te u mea fuli ae nee natou mau, pea mo te u tagata faifekau ae nee natou mau i Salani. Nee natou mavae leva o olo ki te fenua o Kanaane. Pea nee natou tau leva ki te fenua o Kanaane.
6Nee alu leva ia Apalamo i te fenua o kaku ki te kogamea ae nee higoa ko Siseme, o kaku ki te ulu sene o Mole. Nee nonofo te kau Kanaane i te temi aia i te fenua. 7Nee ha leva te Eteleno kia Apalamo, o ui: E au foaki anai te fenua aeni ki tou hakoga. Pea nee fakatuu leva e Apalamo i te kogamea aia he aletale ki te Eteleno, ae nee ha kia ia. 8Pea nee hiki leva ia ia i ai o alu ki te mouga, i te potu esite o Petele, pea nee ina fakatuu leva ona falela i te vaha o Petele i te potu esite mo Ai i te potu uesite. Nee ina toe fakatuu foki i ai ia he tahi aletale ki te Eteleno, pea nee faikole leva ia ia i te huafa o te Eteleno. 9Nee toe hoko atu leva e Apalamo tona fagona o alu ki te potu saute.
Apalamo i Esipito
10Nee to leva he hoge i te fenua. Pea nee hifo leva ia Apalamo ki Esipito ke nofo i ai, koteuhi nee lahi osi te hoge i te fenua. 11I tana fakaovi ke ulu ki Esipito, nee ina ui leva ki tona ohoana ko Salai: Koeni, e au iloi ko he fafine matalelei ia koe. 12Ka sisio anai te kau Esipito kia koe, e natou ui anai: Ko tona ohoana! Pea e natou tamatei anai au, kae e natou fakamauli anai ia koe. 13E au kole atu kia koe ke ke ui, ko toku tuagaane ia koe, o tupu ke natou agalelei kia au o tupu ko koe, pea ke natou fakamauli au o tupu ko koe. 14I te kaku a Apalamo ki Esipito, nee sisio leva te kau Esipito ki te taulekaleka o te fafine. 15Pea nee sisio foki te kau aliki a Falaone ki te fafine pea nee natou viki leva ia ia kia Falaone; pea nee ave leva te fafine ki te fale o Falaone. 16Nee agalelei leva ia Falaone kia Apalamo o tupu ko te fafine; pea nee foaki leva e Falaone kia Apalamo ni ovi, mo ni pipi, mo ni asino, mo ni tagata faifekau, mo te u fafine faifekau, mo ni asino fafine, pea mo ni kamelo. 17Kae nee tauteai leva e te Eteleno ia Falaone mo tona fale aki ni malaia lalahi, o tupu ko Salai ko te ohoana o Apalamo. 18Koia nee fakatotonu ai leva e Falaone ke avage ia Apalamo kia ia, pea nee ina ui leva: Kotea ae nee ke fai ai te mea aeni kia au? Kotea nee mole ke fakaha mai ai kia au ko tou ohoana? 19Kotea nee ke ui ai: Ko toku tuagaane? Koia nee au too ai ia ia ke liliu ko toku ohoana. I te lakaga nei, koena tou ohoana, ke ke too ia ia, pea ke alu! 20Pea nee tuku leva e Falaone te fakatotonu ki ana tagata ke fekau ia ia ke alu, ia ia mo tona ohoana, pea mo te u mea fuli ae nee ina mau.
اکنون انتخاب شده:
SENESI 12: WB2011
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© 2011, Eglise évangélique, chez Lotoato Logote Hihifo, Vaitupu, Wallis
- Les droits sont administrés par Midi Bible, une branche de la Société Biblique de Genève
- Rights are administrated by Midi Bible, a branch of Société Biblique de Genève, 1032 Romanel-Sur-Lausanne, Switzerland