Dw 11
11
Lazalɛse ewule
1 #
Luk 10.38-39
Nrenya bie anwo dole ye wɔ Bɛtani. Bɛfɛlɛ ye Lazalɛse. Mɛle nee ɔ diema raalɛ Maata bɛ sua zo a le Bɛtani. 2#Dw 12.3 (Mɛle ɛhye a wolale nwole evuanlɛ ne guale Awulae agyakɛ anwo na ɔvale ɔ ti enrinli ɔkyikyile la, yɛɛ ɔ diema nrenya a le Lazalɛse ɛhye mɔɔ ɛnde kpɔkɛ la.) 3Mediema mraalɛ ne mɔ zoanle manle bɛhɔzele Gyisɛse kɛ, “Awulae, ɛ gɔnwo kpalɛ ne ɛnde kpɔkɛ.”
4Mɔɔ Gyisɛse asa hanle nrɛlaleɛ ne la ɔhanle kɛ, “Anwondolɛ ɛhye ɛnrɛmaa Lazalɛse ɛnrɛwu. Nyamenle anyunlunyia ti yɛɛ ɛhye ɛzi a, na ɔbayɛ debie mɔɔ ɔlua zolɛ Nyamenle Ara ne ɔdaye ɔbanyia anyunlunyia a.”
5Gyisɛse kulo Maata nee ɔ diema Mɛle nee Lazalɛse edwɛkɛ kpole. 6Noko mɔɔ ɔdele Lazalɛse anwondolɛ nrɛlaleɛ ne la, ɔzile aze kenle nwiɔ wɔ ɛleka mɔɔ ɔwɔ la. 7Na akee ɔhanle ɔhilele ye ɛdoavolɛma ne kɛ, “Bɛmaa yɛzia yɛ nzi yɛhɔ Dwudiya.”
8Ɛdoavolɛma ne zele ye kɛ, “Kilehilevolɛ, ɔtɛkyɛle biala yɛɛ Dwuuma ne yɛle kɛ bɛsi wɔ awolɛ a; na eza wɔyɛ wɔ adwenle kɛ ɛkɔ lɔ bieko ɔ?”
9Gyisɛse buale bɛ kɛ, “Dɔnehwele bulu nee nwiɔ a wɔ alehyenlɛ ko anu a. Yemɔti saa sonla tudu agyakɛ wɔ alehyenlɛ nu a ɔmkpula, ɔboalekɛ maanle nu le wienyi. 10Na saa ɔtudu agyakɛ wɔ aledwolɛ nu a ɔkpulokpula, ɔboalekɛ awozinli ne ɛmmaa ɔnnwu aze.” 11Gyisɛse hanle ɛhye na ɔvale ɔzɔle zolɛ kɛ, “Yɛ gɔnwo Lazalɛse ɛlafe, na mekɔ meahɔdunwue ye.”
12Ɛdoavolɛma ne buale kɛ, “Awulae, saa yelafe a, ɛnee ɔbadunwue!”
13Gyisɛse ɛnee kpondɛ aze kɛ Lazalɛse ɛwu, na bɛmɛ bɛdwenlenle nafelɛ kpalɛ nwo. 14Yemɔti Gyisɛse hanle ye wienyi hilele bɛ kɛ, “Lazalɛse ɛwu, 15na bɛmɛ ti, ɔyɛ me fɛ kɛ menle lɔ a, amaa bɛalie bɛali. Bɛmaa yɛhɔ ɛleka mɔɔ ɔwɔ la.”
16Tɔmase (mɔɔ eza bɛfɛlɛ ye Nda la) zele ɔ gɔnwo mɔ ɛdoavolɛma ne mɔ kɛ, “Bɛmaa yɛ nee Kilehilevolɛ ne ɛhɔ na saa ewule bɔbɔ a yɛ nee ye ɛhɔwu.”
Gyisɛse a le ewudwazo ne nee ngoane ne a
17Mɔɔ Gyisɛse radwule la, ɔnwunle kɛ Lazalɛse ɛwu, bɛzie ye na yeli kenle nna. 18Bɛtani mɔɔ kɔ Gyɛlusalɛm la le “kilomita” kɛyɛ nsa, 19yemɔti Dwuuma dɔɔnwo ɛra kɛ bɛbakyekye Maata nee ɔ diema Mɛle arɛle wɔ bɛ diema nrenya ne ewule ne anwo.
20Maata dele kɛ Gyisɛse ɛlɛba la, ɔhɔle ɔhɔyiale ye adenle. Mɛle angɔ bie. 21Maata hanle hilele Gyisɛse kɛ, “Awulae, saa ɛwɔ ɛke a, anrɛɛ me diema nrenya ne anwu! 22Na eza meze kɛ, kɛkala bɔbɔ, debie biala mɔɔ ɛkɛbiza Nyamenle la, ɔkɛyɛ ɔkɛmaa wɔ.”
23Gyisɛse zele ye kɛ, “Ɛ diema nrenya ne badwazo ara ngoane nu.”
24Maata buale kɛ, “Meze kɛ ɔbadwazo yeara ngoane nu wɔ mekɛ ne mɔɔ li awieleɛ la anu.”
25Gyisɛse zele ye kɛ, “Mame a mele ewudwazo ne nee ngoane ne a. Mɔɔ kɛlie me kɛli la, saa ɔwu bɔbɔ a ɔkɛnyia ngoane; 26yɛɛ mɔɔ de aze na ɔdie me ɔdi la ɛnrɛwu ɛlɛ. Ɛdie ɛhye ɛdi ɔ?”
27Maata buale kɛ, “Ɛhɛe, Awulae! Medie medi kɛ wɔmɔ a ɛle Mɛzaya ne, Nyamenle Ara ne mɔɔ ɔwɔ kɛ ba ewiade la.”
Gyisɛse zunle
28Maata hanle ɛhye la, ɔziale ɔhɔle na ɔhɔdule ɔ diema Mɛle azukue kɛ, “Kilehilevolɛ ne ɛra na yebiza wɔ.” 29Mɛle dele la, ɔdwazole na ɔnriandile ɔhɔyiale Gyisɛse. 30(Ɛnee Gyisɛse ɛtɛdwule sua ne azo, na ɔtɛbɔ ɛleka mɔɔ Maata hɔyiale ye la.) 31Dwuuma mɔɔ ɛnee wɔ sua nu ɛkɛ ne ɛlɛkyekye Mɛle arɛle la nwunle kɛ yezi yemaa ɔ nwo zo na ɔlɛnriandi yeahɔ la, bɛdwenlenle kɛ ɔlɛkɔ ɔ diema ne sɛka zo lɔ yeahɔzu. Yemɔti bɛdoale ye.
32Mɛle dwule ɛleka mɔɔ Gyisɛse wɔ na ɔnwunle ye la, ɔdule ɔdɔle ɔ gyakɛ anu na ɔzele kɛ, “Awulae, saa ɛwɔ ɛke a, anrɛɛ me diema nrenya ne anwu.”
33Gyisɛse nwunle kɛ Mɛle ɛlɛsi azu, na Dwuuma mɔɔ nee ye ɛra la ɛlɛsu la, nyane kpole hanle ye manle alɔbɔlɛ hunle ye. 34Ɔbizale bɛ kɛ, “Nienwu a bɛdole ye a?”
Bɛzele ye kɛ, “Awulae, bɛla banlea.”
35Gyisɛse zunle. 36Yemɔti menli mɔɔ wɔ ɛkɛ ne la hanle kɛ, “Nea, amgba ɔkulo ye edwɛkɛ kpalɛ!”
37Na bie mɔ hanle kɛ, “Se anrɛɛ ɔtukuedukue anyenzinliravolɛma anye o! Duzu ati a yeanlie Lazalɛse yeanvi ewule nu a?”
Gyisɛse dwazo Lazalɛse ara ngoane nu
38Gyisɛse lile nyane kpole bieko na ɔhɔle nla ne anwo. Nla ne le bolɛ bɔne yɛɛ bɛvale bolɛ bɛnyinle ɔ nloa. 39Gyisɛse zele bɛ kɛ, “Bɛye bolɛ ne!”
Maata, mɔɔ le nrenya ne mɔɔ ɛwu la adiema raalɛ ne zele kɛ, “Awulae, yebɔ! Bɛziele ye la ɛnɛ le kenle nna!”
40Gyisɛse zele ye kɛ, “Metɛkanle metɛkilele wɔ kɛ saa ɛdie ɛdi a ɛkɛnwu kɛ Nyamenle anyunlunyia ne si de la ɔ?” 41Bɛhundole bolɛ ne bɛyele ye ɛkɛ. Gyisɛse nleanle anwuma na ɔhanle kɛ, “Egya, meyɛ wɔ mo somaa kɛ wɔdie me a. 42Meze kɛ dahuu ɛtie me edwɛkɛ, na melɛka ɛhye wɔ menli mɔɔ kɛkala wɔ ɛke la ati, amaa bɛalie bɛali kɛ ɛdawɔ a ɛzoanle me a.” 43Ɔhanle ɛhye la, ɔdeanle nu kpole ɔzele kɛ, “Lazalɛse, dwazo bɛla!” 44Nrenya ne mɔɔ ɛwu la vindele rale, na ndanlɛ mɔɔ bɛvale bɛkyekyele ye funli ne la kyekye ɔ sa, ɔ gyakɛ nee ɔ da. Gyisɛse zele bɛ kɛ, “Bɛzianyizianyi ye na bɛmaa ɔhɔ.”
Gyisɛse ati akpamohɔlɛ
(Mat 26.1-5; Mak 14.1-2; Luk 22.1-2)
45Dwuuma dɔɔnwo mɔɔ rale Mɛle ɛkpɔlalɛ la nwunle mɔɔ Gyisɛse ɛyɛ la, na bɛliele ye bɛlile. 46Na bie mɔ ziale hɔle Falasiima ɛkɛ ne na bɛhɔhanle mɔɔ Gyisɛse ɛyɛ la bɛhilele bɛ. 47Yemɔti Falasiima ne nee sɛlɛvolɛ mgbanyima ne mɔ yiale Ayiama ne na bɛhanle kɛ, “Duzu bɔbɔ yɛɛ akee yɛyɛ a? Nea nwanwane gyima mɔɔ akee nrenya ne ɛlɛyɛ la! 48Saa yɛmaa ɔkɔ zolɛ ɔyɛ a, awie biala balie ye ali, na Wulomu arane ne bava ɛya na yearazɛkye yɛ Ɛzonlenlɛ Sua ye nee yɛ maanle ye amuala.”
49Ɛvolɛ ne anu Sɛlɛvolɛ Kpanyinli ne, mɔɔ bɛfɛlɛ ye Kayafase la zele bɛ kɛ, “Bɛdabɛ, bɛnze ɛhwee! 50Yemɔti bɛnze kɛ ɔle kpalɛ kɛ sonla ko kɛwu kɛmaa maanle ne tɛla kɛ yɛ maanle ne amuala kɛbɔ ɔ?” 51Nɔhalɛ, ɔ nye ɛnla nwo yɛɛ ɔhanle ɛhye a, na kɛmɔ yemɔ a ɛvolɛ ne anu ɔle Sɛlɛvolɛ Kpanyinli la, ɛnee ɔlɛka mɔɔ Nyamenle ɛye ɛhile ye la kɛ ɔwɔ kɛ Gyisɛse wu maa Dwuuma amuala, 52yɛɛ tɛ Dwuuma angome bɔbɔ, na kɛ ɔkɛva Nyamenle amra mɔɔ ɛde ɛkponde ewiade amuala la kɔsɔɔti ɔkarabɔ nu ɔkɛyɛ bɛ menli ko.
53Ɔvi kenle ko zɔhane, Dwuu mgbanyima ne mɔ yɛle ngyehyɛlɛ kɛ ɔwɔ kɛ bɛku Gyisɛse. 54Yemɔti Gyisɛse anye ɔ nwo anlua Dwudiya maanzinli ne anu, na ɔvile ɛkɛ ne ɔhɔle ɛleka bie mɔɔ bikye ɛsɛlɛ ne azo la, wɔ sua bie mɔɔ bɛfɛlɛ ye Yifelaem la azo; ɛkɛ ne yɛɛ ɔ nee ye ɛdoavolɛma ne dɛnlanle a.
55Dwuuma Akpabɛnwo Ɛvoyia ne ɛbikye, na menli dɔɔnwo vi namunamu ne mɔ azo ɛra Gyɛlusalɛm kɛ bɛbanlua bɛ nwo kolaa na ɛvoyia ne adwu. 56Mekɛ ne anu ɛnee bɛlɛkpondɛ Gyisɛse, yemɔti mɔɔ bɛyiale Ɛzonlenlɛ Sua ne anu la, bɛbizebizale bɛ nwo kɛ, “Kɛ ɔde ɛ? Asoo ɔkɛhola ɛvoyia ye bie ba ɔ?” 57Sɛlɛvolɛ mgbanyima ne nee Falasiima ɛva ɛdo gua kɛ saa awie biala ze ɛleka mɔɔ Gyisɛse vea la a, ɔraha, amaa bɛahɔhye ye.
اکنون انتخاب شده:
Dw 11: NB
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Bible in Nzema © Bible Society of Ghana, 1998.
