Gyenesise 9
9
Nyameɛ ne Nowa yɛ apam
1Afei Nyameɛ yirale Nowa ne ye mma mɔ, na osele bɛ kyɛ, “Ɛ́mɔwo ná ɛ́mɔta pee, ná ɛ́mɔyi aseɛ so tɛkyɛ. 2Ɛmɔ nwo suronyi ne ɛmɔ nwo surolɛ piri kɔtɔ aseɛ so ngaka mukoraati so, ewienu nnomaa mukoraa so, abɔdeɛ mukoraa bɔ bɛtwe bɛ nwo ase so, ɔne ɛpo nu naen amukoraa so. Mafa bɛ mawura ɛmɔ sa. 3#Gye 1.29; Kol 2.16 Nikyee biala bɔ nwomeɛ wɔ ye nu ne, ɔkɔyɛ ɛmɔ aleɛ. Na kyɛbɔ mvale nyaanyaa monɛ mane ɛmɔ ne, sɔ ala yeɛ méfa nikyee biala méma ɛmɔ ɔ. 4#Lew 7.26, 27; 17.10-14; Deut 12.16, 23 Nakoso naen bɔ ye ngoa, bɔ ɔte ye mogya#9.4: MOGYA: Hebrifoɛ dedi kyɛ abɔdeɛ biala ngoa wɔ ye mogya nu. Yiti sɛ etwi ye mogya gua a, né ye ngoa ne afi ye nu. tɛ wɔ ye nu de, nnɛma ɛmɔdi. 5Wɔ bɔbɔ deinn wɔ mogya bɔ ɔte wɔ ngoa ne, ekobu ye nwo ngondaa. Kaka biala ne sona biala kobu ye mogya nwo ngondaa. Na sona biala bɔ ɔkɔha obiɛngo mogya kogua ne, ngobisa mogya ne ngofi ye berɛ. 6#Gye 1.27; Ɛks 21.12; Lew 24.17; Mat 26.52; Nye 13.10 Sona biala bɔ ɔkɔha obiɛngo mogya kogua ne, ye wora sona yeɛ ɔkɔha ye mogya kogua ɔ, ofikyɛ Nyameɛ sɛso yeɛ ɔyɔle sona ɔ. 7Nakoso ɛmɔ de, ɛ́mɔwo ná ɛ́mɔta, ná ɛ́mɔsone pee wɔ aseɛ so.”
8Afei Nyameɛ sele Nowa ne ye mma bɔ bɛboka ye so ne kyɛ, 9#Gye 6.18 “Nea, me ne ɛmɔ ne kyẽa bie ɛmɔ boso ama yɛ́yɛ m’apam; 10na me ne abɔdeɛ biala bɔ ngoa wɔ ye nu bɔ ɔboka ɛmɔ so: nnomaa, nyɛmmoa, aseɛ so ngaka mukoraa bɔ bɛboka ɛmɔ so, ɔne ngaka mukoraa bɔ bɛ ne ɛmɔ fili ɛlɛen alaka ne anu befitele yeɛ yɛ́yɛ ɔ, mekyire aseɛ so ngaka mukoraa. 11#Gye 8.21-22 M’apam he yeɛ me ne ɛmɔ yɛ́yɛ ɔ, kyɛ ofi ɛnɛ bɔ ɔkɔ ɔ, mengɔfa nzueyilɛ ngɔsɛkye abɔdeɛ mukoraa ko, na mengɔfa nzueyilɛ ngɔsɛkye aseɛ ko.” 12Na Nyameɛ sele kyɛ, “Apam bɔ méyɛ méto berɛ méma me ne ɛmɔ, ɔne abɔdeɛ teasefoɛ biala bɔ ɔboka ɛmɔ so ne, ɔte aworɛ ndoatoasoɛ apam afebɔɔ, na ye nwo sɛngyerɛnneɛ ɛhe: 13Mafa me nyangondoen mabea munungum nu, na ɔkɔyɛ apam bɔ me ne aseɛ yayɛ ne nwo sɛngyerɛnneɛ. 14Na sɛ esue muna wɔ aseɛ so na nyangondoen to wɔ munungum ne anu a, 15ngɔkaye m’apam bɔ me ne ɛmɔ ne abɔdeɛ teasefoɛ mukoraa yayɛ ne. Na nzue ne ngɔkakyi nzueyilɛ ngɔsɛkye abɔdeɛ mukoraa ko. 16Na sɛ nyangondoen ne to wɔ munungum ne anu a, ngɔnea na makaye apam afebɔɔ bɔ ɔwɔ Nyameɛ ne abɔdeɛ teasefoɛ mukoraa b’afia ne.” 17Na Nyameɛ sele Nowa kyɛ, “Apam bɔ mayɛ mato berɛ mama me ne abɔdeɛ mukoraa bɔ bɛwɔ aseɛ so ne, ye nwo sɛngyerɛnneɛ ɛne.”
Nowa boso ama
18 #
Gye 10.6
Nowa mma mmienzua bɔ befili ɛlɛen alaka ne anu bedwuli ase ne, bɛ ole Sem, Ham ne Yafɛte. Né Ham te Kanaan baba. 19Né sɔ mmenia nza hemɔ te Nowa mma, na bɛ yeɛ besuli aseɛ so mmenia mukoraati ɔ.
20Nowa yeɛ ɔbɔle kuayɔlɛ bo ɔ, na ɔyɛle bobe boo. 21Ɔnone bobe nzaa ne bie, ɔbole, na ɔlale ye ɛtena sua nu bɔ né ye nwo la so ɔ. 22Kanaan baba Ham nwuni kyɛ ɔse Nowa nwo la so, na ofitele ɔɔbɔle oliɛma nyɔ nemɔ amaneɛ. 23Na Sem ne Yafɛte fale ɛtena beguale bɛ bati so, na bele bɛ si bɛhɔle toonn bɛɛfa bɛkatale bɛ se anwo. Bɛyele bɛ nye bɛtole eburo, na bannwu bɛ se nwo bɔ né ɔla so ne. 24Nzaa ne tetele Nowa nye so, ná ɔtele bɔ ɔwa kãa paa ne afa ayɛ ye nen, 25ɔhane kyɛ,
“Musue to Kanaan!
Ɔkɔyɛ kanga nu kanga kɔma oliɛma mɔ.”
26Na osa hane kyɛ,
“AWURADE me Nyameɛ óyira Sem.
Kanaan kɔyɛ Sem kanganiɛ!
27Nyameɛ ɔ́ma Yafɛte boso ɔ́trɛ,
ɔ́ma ɔtena Sem ɛtena sua nu,
ná ɔma Kanaan ɔyɛ Yafɛte kanganiɛ.”
28Nzueyilɛ ne asi ne, Nowa tenane ase afoɛ ɛyaa nza ne aburannu. 29Nowa afoɛ mukoraa bɔ olili te ɛyaa ngona ne aburannu, na owuli.
اکنون انتخاب شده:
Gyenesise 9: EBP
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Esahie Bible © Bible Society of Ghana, 2018.