Gyenesise 16
16
Hagar ne Yismael
1Né Abram ne ɔye Sarae bɛwwole baa biala. Né Sarae le Misraimniɛ afaneɛ bie bɔ oli Hagar. 2Na Sarae sele Abram kyɛ, “Anwu ye kyɛ AWURADE mma menwo, yiti mesrɛ wɔ, ɛne m’afaneɛ ne bɛla; na ebiaa né ɔnate ye so manya mmaa.” Na Abram tiele bɔ Sarae hane ne. 3Yiti Abram lili afoɛ buru wɔ Kanaan aseɛ so nen, Abram aye Sarae fale ye afaneɛ Hagar bɔ ɔte Misraimniɛ ne mane ohu maa ɔyɛle ɔye. 4Ɔne Hagar bɛlale, na ɔnwonzɛle. Na mmerɛ bɔ Hagar nwuni kyɛ ɔnwonzɛ nen, afei né ommu ye mene aye ne. 5Na Sarae sele Abram kyɛ, “Edwirɛ tɛɛ bɔ ɔfa di me ne, ɔkɔbɔ wɔ ti so. Me yeɛ mvale m’afaneɛ mane wɔ kyɛ ɛne ye bɛla ɔ, nakoso onwuni kyɛ ɔnwonzɛ nen, afei de ommu me. Mesrɛ kyɛ AWURADE obua wɔ ne me y’afia ndɛen!” 6Yeɛ Abram buale Sarae kyɛ, “Tie, w’afaneɛ ɔ, na owura wɔ sa; ɛne ye beli ye kyɛbɔ ɛnea a ɔte paa ɔ.” Yiti Sarae tanene Hagar nye maa ɔnwatili fili ye nwo hɔle.
7AWURADE abɔfo nwuni Hagar wɔ ɛserɛ so nekaa bie bɔ nzue pu fi aseɛnwo ɔ. Sɔ nzue ne wɔ Sure atee so. 8Na obisale ye kyɛ, “Sarae afaneɛ Hagar, nisua yeɛ efi wale ɔ, na nisua yeɛ ɛkɔ ɔ?” Na obuale kyɛ, “Me mene aye Sarae sa nu yeɛ ménwati méfi ɔ.” 9#1 Pet 2.18 Na AWURADE abɔfo ne sele ye kyɛ, “Sá kɔ wɔ mene aye ne berɛ, na kɔbrɛ wɔ nwo ase ma ye.” 10Na AWURADE abɔfo ne sá sele ye kyɛ, “Ngɔma wɔ boso ama kɔta pee bɔ ebiala ngɔhora bɛ ka ɔ.” 11Na AWURADE abɔfo ne sele ye bieku kyɛ, “Nea, ɛnwonzɛ, ɛkɔwo baa bienzua, na ɛkɔto ye dumaa Yismael,#16.11: YISMAEL: Ye bo kyire: Nyameɛ tie. ofikyɛ w’aworabɔlɛ ne adwu AWURADE nyunu. 12#Gye 25.18 Ye suban kɔyɛ kyɛ eburo afunum; ɔkɔho kotia sona biala, ná sona biala koso aho atia ye, na ɛpɔen kɔla ye ne ye abusuafoɛ amukoraa b’afia.” 13Yiti Hagar frɛle AWURADE bɔ odwudwo hyirele ye ne kyɛ, “Ɛte Nyameɛ bɔ enwu nikye ɔ”, na Hagar hane kyɛ, “Aso manwu AWURADE yeɛ ndɛ te ase ye?” 14#Gye 24.62; 25.11 Ye sɔ ne ati, bɛfrɛ sɔ abura ne Beɛ Lahai Roi,#16.14: BEƐ LAHAI ROI: Ye bo kyire: Teasefoɛ bɔ onwu me n’abura. na ɔwɔ Kadese ne Berede b’afia.
15Hagar wole baa bienzua mane Abram; na Abram tole ɔwa bɔ Hagar wole ye ne dumaa Yismael. 16Abram lili afoɛ aburawɔtwɛ ne nzia yeɛ Hagar wole Yismael mane ye ɔ.
اکنون انتخاب شده:
Gyenesise 16: EBP
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Esahie Bible © Bible Society of Ghana, 2018.