Matayo 8
8
Yesu umpija wa mbiji
(Mk. 1.40-45; Lk. 5.12-14)
1Aho wali wika kufuma mu lugulu, mabita matale gunondela.
2Hunaho akiza wa mbiji, unamya, uhaya giki, Seba, ulu utogilwe, wadula kuneja.
3Na Yesu utama nkono gwakwe, unkuumya, uhaya giki, Natogwa, elaga; na mbiji jakwe jali jejiwa haho na haho.
4Na Yesu ungʼwila giki, Ilanghanage, utizungʼwila munhu ose; aliyo jaga, ukiyoleche kuli ngabiji, ufunye kufunya uko Musa wali ulagila, ibize bukaniji kubo.
Nsese wa nshilikale upijiwa
(Lk. 7.1-10)
5Aho Yesu wali wingila mu Kapernaumu, ntale wa bashilikale igana ungʼwegela, ungʼwikumbilija,
6Uhaya giki, Seba, nyanda wane alalile mu numba, alemahalile uluhiwa no.
7Yesu ungʼwila giki, Nene nakwiza kumpija.
8U ntale wa bashilikale igana ushosha, uhaya giki, Seba, nene natigelile Bebe wingile hasilili ya kano yane; aliyo hayaga mhayo gwike, na nyanda wane akupijiwa.
9Iki na nene ndi munhu wa mu busugi, ndi na bashilikale nabasugile: na nene nungʼwila uyu giki, Jaga, nanghwe uja; na ungi giki, Nzugu, nanghwe wiza; na nsese wane giki, Itaga iyi, nanghwe wiyita.
10Aho Yesu wigwa iyo, ukumya, na ubawila abo bakunondelaga, Nghana namuwila giki, natali kubona kuzunya kutale giti uku nulu mu Israeli yaya.
11Namuwila giki, Bingi baliza kufuma kiya na ngʼweli, baligasha hamo na Abrahamu, na Isaaka, na Yakobo, mu butemi wa ngʼwigulu.
12Aliyo bana ba butemi balaponyiwa mu giiti cha hanze: uko kulabiza kulila shisoji na kushelanya mino.
13Na Yesu ungʼwila ntale wa bashilikale giki, Jaga lulu, gitumo wazunyaga ibize kuli bebe. Na nyanda upijiwa ngʼwikanza lyenilo duhu.
Yesu ubapija bingi mu Kapernaumu
(Mk. 1.21-39; Lk. 4.31-44)
14Aho Yesu wali wingila mu numba ya ngʼwa Petro, umona ninabuko alalile asatile nswiza.
15Na unkinda nkono gwakwe, na nswiza gungʼwinga; nanghwe ubuka, ubatumamila.
16Aho yubiza mhindi, bungʼwenhela bingi abali na masamva: nanghwe uyipeja mioyo iyo na kuhaya duhu, na ubapija bose abasatile.
17Gushikilijiwe uyo gwaahayiwa muli nghangi Isaya, giki, Wei ngʼwenekele wali utwala mabugokolo giswe na ubucha mabulwile giswe.
Kunondela Yesu
(Lk. 9.57-62)
18Aho Yesu wali ubona mabita matale gampindije, ulagila kuja ku nkilo.
19Na ngʼwandiki umo ungʼwegela, ungʼwila giki, Nangi, nakukulondela Bebe hose hose uko uje.
20Na Yesu ungʼwila giki, Nyamhawa jili na miobo, na noni ja hape jili na machanzo; aliyo Ngʼwana wa munhu ati na ha kulaja ntwe gwakwe.
21Umo ungi wa bahemba bakwe ungʼwila giki, Seba, unizunilije naje tame nakanjike baba.
22Aliyo Yesu ungʼwila giki, Nilondelage, balekage bafu babajike bafu babo.
Yesu ugalendya mahuli na nyaga
(Mk. 4.35-41; Lk. 8.22-25)
23Aho Yesu wingila mu lyato, bahemba bakwe bunondela.
24Kuhayumanila nyaga ntale gubuka mu nyanza, nose lyato lyukundikijiwa na mahuli; aliyo Wei walalalile tulo.
25Na bahemba bakwe bungʼwegela, bumisha, buhaya giki, Seba, tupijage; twayagala.
26Nanghwe ubawila giki, Ngʼogohaga nguno ki, a bingʼwe ba kuzunya kudo? Huna ubuka, uyihama miyaga na nyanza; na bubiza ho bulendu butale.
27Banhu bukumya, buhaya giki, Munhu uyu ni munhu ki, miyaga na nyanza nasho shungʼwigwa?
Basaji ba Gadara bapijiwa
(Mk. 5.1-20; Lk. 8.26-39)
28Aho wali ushika ku nkilo ku si ya Bagadara, bumanhya nanghwe banhu babili abali na masamva, bafumile mu mashigila, bakali kutinda; kushisha nose, munhu walatudula kubitila mu nzila yeniyo nulu umo yaya.
29Nabo buhamuka, buhaya giki, Bebe Yesu, Ngʼwana wa Mulungu, tuli na mihayo ki biswe na Bebe? Wizaga aha kutuluhya aho ngelo itinashika?
30Kule nabo lyali ho idale lya ngurube ningi jikudimaga.
31Masamva gungʼwikumbilija, guhaya giki, Ulu ulitupeja, utuzunilije kwingila mo ngʼwidale lya ngurube.
32Nanghwe ugawila giki, Jagi. Aho gubinga, gingila ngʼwidale lya ngurube: haho na haho idale lyose lya ngurube lyupela na nguzu, lyuholomoka ha ngegu shimu mu nyanza, lyucha mu minzi.
33Badimi bupela buja mu nzengo, busombola yose, na iyo yali yitwa ku benabo abali na masamva.
34Hunaho nzengo gose gubuka kunsumbila Yesu; na aho bumona, bungʼwikumbilija inge mu mimbi jabo.
اکنون انتخاب شده:
Matayo 8: SUK60
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
New Testament in Sukuma © United Bible Societies, 1960.
