Amatiyu 20
20
Moare la a kpo otum agbi
1Oreŋ Ongyeŋ o wo eka ba areagbi la a zgi endigigiŋ a gre okyku o klo moare la á ba a kpo ŋa otum. 2Areagbi a hwim ba o hre moare eka ekplo moa a la a hre. Egbre mo e wo eyiamgbaŋ angyiŋ olum. Aŋa a da moare a gre o yi o kpo ŋa otum agbi baŋ. 3La amgbaŋ atronyi nga, a gre ekyku a hwiŋ moarekyeŋ la a tspi ototno, moa a wo la otum ma mbo. 4Nga a nyuŋ mo a lu mi le, Agimi a mbo e yi e kpo otum agbi me. Ame é hre gimi ekplo la e raŋ e gre. 5Ambla he nga moa a gre agbi lo. Omba amgbaŋ otsko, ta la amgbaŋ atra aŋa a kpo ekakahelo. 6Omba baŋ a gre ekyku osusku la amgbaŋ atno nga, a sa a ka moarekyeŋ a la a tspi ahe lo, a zhĩ mo a lu mi le, Okyku eshi agimi e tpi omba ayi eka he? 7Moa a tno ma a lu mi le, Agi e tpi omba ayi okyku ba arekyeŋ a shri otum a da gi mbo. Areagbi a nyuŋ mo a lu mi le, O wo eka he bgu le, agimi a mbo e yi e kpo otum agbi me.
8La olum-ore nga, areagbi a nyuŋ andakʼpo eshki moare la a kpo ŋa otum lo, a lu mi le, Aŋo o pla moare la a kpo otum o shki nga, o hre mo amgbaŋ mo. Aŋo o zga esĩ o hre moa la a ba amom-abgo ori, nga o sa o hre moa la a ba ori amom-abgo. 9Moare la a ba la amgbaŋ atno a mbo, moa a hre mo eyiamgbaŋ. 10Omba ba moare la a ba otum oriori a ba a yga amgbaŋ mo nga, moa a ka ma o dzu mbo le, ma moa á hre mo a gre moahwõ, ambo moa a hre mo a mbo eyiamgbaŋ ekakahelo. 11Moa a yga amgbaŋ mo nga, moa a yi a nyi agla egi ayi areagbi. 12Moa a nyuŋ ŋa a lu mi le, Moa la a ba amom-abgo hi, moa a kpo otum okyku awa akyeŋ sha, agi nga e wa olum okyku olum okyeŋ, ambo ekakahelo, aŋo o hre gi otsotsotse! 13Areagbi a tno mo ma a lu mi le, Agimi anáŋ, ame e pyi gimi tsi a mbo mbo, okyku eshi agimi e bmi ba ame é ba e hre gimi eyiamgbaŋ angyiŋ okyku olum okyeŋ. 14Okyku eka he agimi e yga amgbaŋ bimi nga e yi odne ohuhuhi. O wo ba ame é klo le, ame e kpo e gbu ba ame e hre moa la a ba amom-abgo otsotsotse ka la gimi. 15Ame e wo la ekʼpo ma eshri amgbaŋ me mbo? Agimi e ta efpu okyku ba ame e wo areodlodzi? 16Okyku eka he nga, moare ba ori, moa á dzu moa ba ambla, nga moa ba ambla moa á dzu moa ba ori.
Eyesu a lu odlo eshri eku baŋ odga otra
17Omba ba Eyesu a bre a yi Orushalima nga, a da moanwyeotum baŋ otsko a gbga a gre agba ka la ŋa. A lu odlo shu pa la mo omba ba moa a la a dzi. 18A nyuŋ mo a lu mi le, Agimi e ngli e gno, agi é yi Orushalima. Ahe lo nga, moa á vu Anwye Arehwĩ á shri ŋa á da moandakʼpo olu ba Ahogbrẽ, pa la moa la a nye odaŋ. Nga moa á sõ ŋa omgbu ba eku. 19Nga moa á shri ŋa á da moa la a wo moaEyahuda mbo, nga moare hi lo á lu ega á ygi ŋa, nga moa á taŋ ŋa andzu, nga moa á kũ ŋa okusa egŋe aki. Ahogbrẽ nga á kso ŋa ongybi olum ba otra.
Ovevẽ ba animo
20Ambla he nga ashe Azabadi a ba okro Eyesu pa la moanwye baŋ aha. A kʼpu obiŋ egi ayi Eyesu nga a vẽ ŋa okyku o daŋ a kpo a ghwo la ŋa. 21Eyesu a zhĩ ŋa a lu mi le, Aŋo o klo eshi? A tno ma a lu mi le, Ame e klo boŋ o hwim boŋ ó da moanwye aha me hi, ba akyeŋ a dzu obgori boŋ, nga ba ahwõ a dzu obgoehre boŋ omba boŋ ó dzu Anyuŋ-areŋ.
22Eyesu a tno mo ma a lu mi le, Agimi e yi ekplo bimi e vẽ okyku lo mbo. Ewu ba moa á ba a kpo me, agimi é kpo lo é gbu? Moa a tno ŋa ma a lu mi le, Agi é kpo lo é gbu. 23Eyesu a tno mo ma a lu mi le, Adlidzi angyiŋ, edgu ewu ba ame é ba e kpo lo, agimi a mbo é kpo lo. Ambo ame e wo ekʼpo ma ba o sla are la á ba a dzu obgori me, o mbo le ogboehre me mbo. Ekro he lo e wo okyku moarehwĩ ba Adugu a kpo lo okyku mo angyiŋ.
24Omba ba moanwyeotum ahwõ a gno eka he nga, esõ e tpi mo ayi pa la moanáŋ aha he lo. 25Okyku eka he Eyesu a bzi mo pyeŋ nga a nyuŋ mo a lu mi le, Moare la a ri ekʼpo, a wo la ekʼpo eshri moare la a wo abgo mo, moandakʼpo mo nga a la a ri ekʼpo eshri mo. 26Ambo edgu hi angyiŋ é ba e kpo ka la gimi mbo. O wo ba akyeŋ eshki bimi a klo o dzu andakʼpo le, aŋa á dzu awaghrẽ moahwõ pyeŋ. 27Nga o wo ba akyeŋ eshki bimi a klo o dzu a ba ori le, aŋa á dzu awaghrẽ bimi. 28Anwye Arehwĩ a ba okyku o da mo a hlu ŋa eshko angyiŋ mbo, ambo okyku o kpo ewu okyku moahwõ, nga okyku o shri esõ baŋ o shri o di okyku o shla moare nzenze.
Eyesu a shaŋ moavgayi aha
29Omba ba moa a zgi Ejeriko a yi nga, moare nzenze a lu Eyesu ma. 30Moavgayi aha akyeŋ moa a dzu obiŋ akaŋ ozhẽ. Moa a gno omba ba Eyesu a ba a yi nga, moa a ta enzi angyangyeŋ a lu mi le, Aŋo Anwye Adawuda! O ka gi ayiekŋe! 31Moare a shrom mo nga a nyuŋ mo ma moa a dzu tki. Ambo moa a ta enzi a ta ma-ma o ta angyiŋ. Moa a lu mi le, Anwye Adawuda! O ka gi ayiekŋe! 32Eyesu a tspi nga a bzi mo a lu mi le, Agimi e klo ba ame e kpo gimi eshi? 33Moa a tno ma a lu mi le, Andakʼpo, agi e klo boŋ o hwile gi ayi! 34Eyesu a ka mo ayiekŋe nga a tka ayi mo. Omba he lo nga ayi mo a hwile, nga moa a lu Eyesu ma.
انتخاب شده:
Amatiyu 20: EGONT74
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Eggon New Testament © United Bible Societies, 1974. Bible Society of Nigeria
