Eyohana 16
16
1Eyesu a lu mi le, Ame e lu e da gimi okyku o da gimi e tsu e gbu mbo. 2Moa á se gimi á sku eshki mo. Nga omba ó yi ó ba ba areyaŋ a mbo la a bga gimi, baŋ á ba a ka ma aŋa a kpo lo okyku Ahogbrẽ angyiŋ. 3Moa á kpo gimi edgu ayakplo he lo okyku ba moa a yi Ada o mbo le okyku ba moa a yi me mbo. 4Ame e lu he lo e da gimi okyku omba ba moa a kpo gimi edgu ayakplo he lo, o da gimi e tne aga e fu ma.
Otum ba Ogbgaodzi
Ame e lu odlo he lo e da gimi oriori mbo okyku ba ame e yi e wo ka la gimi. 5Ambo ohuhuhi ame é yi okro ba are la a hom me otum a wo ma, ambo arekyeŋ eshki bimi a zhĩ me okro ba ame e yi mbo. 6Ohuhuhi okyku ba ame e lu e da gimi e khwo nga, eso e tpi gimi ayi. 7Ame e lu adlidzi angyiŋ e da gimi, o raŋ o gre ba ame e yi, okyku eshi o wo ba ame e gre mbo le, agimi é hwiŋ Okpoghwo lo mbo. O wo ba ame e gre le, ame é daŋ a ba. 8Omba baŋ a ba bgu le, á tsa moarehwi obiŋ hi akpu mo eshri odlobi. Nga á da mo a ka odlodzi ta la ombgu ba Ahogbrẽ a bmye. 9Moa a ta akpu eshri odlobi okyku eshi moa a bmi ba adlidzi pa la me mbo. 10Moa á ka odlodzi lo á bmye okyku eshi ame é yi ibu ba Ada, nga moa á ka me nga mbo. 11Aŋa á da mo a ka ombgu ba Ahogbrẽ a bmye okyku eshi moa a sheŋ a sõ areŋ obiŋ hi ombgu bgu. 12Ayakplo a yi a ra nzenze ba ame e lu e da gimi, ambo o wo ewu o gre eshri bimi e ka lo e bmye. 13Ambo omba ba Ogbgaodzi ba adlidzi o ba le, ó tsa gimi adlidzi ba ekplo-yaŋ a mbo. Á lu odlo eshrishri eŋa angyiŋ mbo, ambo á lu ekplo baŋ a gno angyiŋ á ba a da gimi. Á lu odlo eshri ayakplo la á ba a kpo. 14Aŋa á da moare a ka me la ekekʼpo, okyku eshi aŋa á lu otum ba ame e hom ŋa angyiŋ á ba a da gimi. 15Ekployaŋ a mbo ba Adugu a wo la alo ma e wo e me angyiŋ. Okyku eka he ame e lu mi ma Ogbgaodzi lo á lu otum ba ame e hom ŋa angyiŋ ó ba o da gimi.
Esõ-etpiayi ta la ovye
16Ambla fi nga agimi é ka me nga mbo, ambla fi nga agimi é sa é ka me. 17Moakyeŋ eshki moanwyeotum baŋ a zhĩ moahwõ a lu mi le, Ekplo baŋ a lu hi e wo eshi? A nyuŋ gi a lu mi le, Ambla fi ma agi é ka ŋa mbo, ma ambla fi nga ma agi é ka ŋa. Nga aŋa a sa a lu mi le, O wo eka he okyku eshi ame é yi okro ba Ada a wo ma. 18Moa a zhĩ a lu mi le, Eshi angyiŋ e wo ambla fi he lo? Agi e yi ekplo baŋ a lu odlo eshri lo mbo! 19Eyesu a yi ba moa a klo o zhĩ ŋa odlo eshri lo, okyku eka he a nyuŋ mo a lu mi le, Ame e lu mi ma ambla fi ma agimi é ka me mbo, nga ma ambla fi ma agimi é ka me. Agimi e la e zhĩ he lo angyiŋ ta la egimi? 20Ame e lu adlidzi angyiŋ e da gimi, agimi é wu okũ ambo obiŋ hi ó gno oraŋ. Agimi é wo la esõ-etpiayi, ambo é zhiŋ é dzu ognoraŋ. 21Omba ba ashe a mbre le, a la a gno oraŋ mbo okyku eshi omba ewu baŋ angyiŋ o wo he lo. Ambo ambla baŋ a mbre anwye a khwo bgu, aŋa a la a gre eso ewu baŋ a kpo a ghre, okyku eshi aŋa a gno oraŋ ba moa a mbre anwye a ba edzi. 22O wo eka he angyiŋ ka la gimi. Ohuhuhi agimi e gno oraŋ mbo, ambo ame é ka gimi nganga, omba he lo ovye ó bli eso bimi. Edgu ovye he lo, arekyeŋ a kpo a gbu baŋ a ngʼba lo a sku gimi a gbu mbo.
23Omba mi lo o ba bgu le, agimi é vẽ me ekplokyeŋ mbo. Ame e lu adlidzi angyiŋ e da gimi, okyku eshi agimi e wo moanwyeotum me angyiŋ, Ada á shri ekployaŋ a mbo ba agimi e vẽ ŋa á da gimi. 24Ma-me o ta ohuhuhi, agimi e vẽ ekplokyeŋ eshko me mbo. Agimi e vẽ, agimi é hwiŋ, okyku o da gimi e bli la ovye.
Okpogre obiŋ hi
25Ame e lu odlo he lo e da gimi la egŋe nzenze. Ambo omba ó yi ó ba ba ame é ba e kpo otum la egŋe nga mbo. Ambo ame é lu odlo pendeŋ angyiŋ eshri Ada ka la gimi a mo. 26Omba mi lo o ba bgu le, agimi é vẽ ŋa eshko me, ambo ame e lu ba ame angyiŋ é ba e vẽ ŋa okyku gimi mbo, 27okyku eshi Ada a klo gimi. A la a klo gimi okyku eshi agimi e la e klo me, nga agimi e bmi ba adlidzi ba ame e zgi okro ba Ahogbrẽ angyiŋ e ba. 28Ame e zgi okro Ahogbrẽ angyiŋ e ba obiŋ hi, nga ohuhuhi ame é dzu obiŋ hi é zga nga é bla é yi okro ba Ada.
29Moanwyeotum baŋ nga a nyuŋ ŋa a lu mi le, O ka a mo, o bli boŋ o yi o lu odlo pendeŋ nga la egŋe mbo ayga hi. 30Agi e yi ohuhuhi boŋ o yi ekployaŋ a mbo, aŋo o klo ba arekyeŋ a zhĩ ŋo ekplokyeŋ eshri ba odlo lo mbo. Ohe lo o tsa gi o da gi e bmi ba adlidzi boŋ o zgi okro Ahogbrẽ angyiŋ o ba. 31Eyesu a zhĩ a lu mi le, Ohuhuhi agimi e bmi ba adlidzi? 32Omba o yi ó ba, o sheŋ o ba bgu, agimi mvye moa á sla gimi ayi, areyaŋ a mbo á yi eŋa odne baŋ, nga agimi é dzu me é zga ambambga. Ambo ame e wo ambambga angyiŋ mbo okyku eshi Ada a wo pa la me. 33Ame e lu ohe lo e da gimi okyku o da gimi e hwiŋ opyapyaŋ ba eso okro me. O ka, obiŋ hi ó kpo gimi ewu, ambo agimi e ghwo eso! Ame e sheŋ e kpo e gre obiŋ hi bgu!
انتخاب شده:
Eyohana 16: EGONT74
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Eggon New Testament © United Bible Societies, 1974. Bible Society of Nigeria
