Eyohana 15
15
Eyesu a wo Esi Awandzi ba adlidzi
1Eyesu a lu mi le, Ame angyiŋ e wo Esi Awandzi ba adlidzi nga Adugu a wo areagbi lo. 2Aŋa a la a kplu ombguyaŋ a mbo la o wo o me o wo ba alo o fu agbro mbo, nga a la a hli ombguyaŋ a mbo la o la o fu agbro, okyku o da lo o fu agbro o ta ma-ma. 3Agimi e sheŋ e wo shasha bgu okyku odlo ba ame e sheŋ e lu lo e da gimi. 4E dzu eso me le, ame a mbo é dzu eso bimi. O wo bimi e dzu eso me mbo le, agimi é kpo é gbu bimi é fu agbro mbo. Okyku eshi ombgu awandzi o kpo o gbu ba alo o fu agbro mbo o wo le alo o dzu ésĩ andzi lo dne.
5Ame angyiŋ e wo Esi Awandzi, nga agimi angyiŋ e wo embgu. Areyaŋ a mbo la a dzu eso me le, ame a mbo e dzu eso baŋ, á fu agbro nzenze. Adlidzi angyiŋ, agimi e kpo e gbu bimi e kpo ekplokyeŋ mbo o wo le ame e wo ka la gimi ayga dne. 6Areyaŋ a mbo la a dzu eso me mbo le, moa a se ŋa a ta a bi eka moa a kplu ombgu aki, nga ó mom o khwo nga le moa a la a pla lo á shki nga moa á ta lo ovo. 7O wo bimi é dzu eso me le, odlo me a mbo ó dzu eso bimi nga, ekployaŋ a mbo ba agimi é vẽ, agimi é hwiŋ lo. 8Moa a la a hlu Adugu eshko ozhẽ agbro ba agimi e la e fu nzenze. Ozhẽ he lo sha angyiŋ agimi é dzu moanwyeotum me. 9Ame e klo gimi eka ba Ada a klo me. Agimi e dzu oklo me. 10O wo ba agimi e bmi ta la odlo me le, agimi é dzu oklo me, eka ba ame e bmi ta la odlo ba Ahogbrẽ, nga ba ame e dzu oklo baŋ.
11Ame e lu ohe lo e da gimi okyku o da gimi e hwiŋ ovye ba ame e shri e di, okyku o da gimi e hwiŋ lo nzenze. 12Ame e shĩ gimi, agimi e klo egimi eka ba ame e klo gimi. 13Are a wo la oklokyeŋ la o gre oklo baŋ a bmi nga a kpu okyku moa-kyeŋazba mbo. 14O wo ba agimi e kpo ekplo ba ame e klo le, agimi e wo moakyemeazba. 15Ame é bzi gimi awaghrẽ nga mbo, okyku eshi awaghrẽ a yi ekplo ba adaŋ-odne a kpo mbo. Ambo ame e bzi gimi moakyemeazba okyku eshi ame e sheŋ e lu ekployaŋ a mbo ba ame e gno okro Adugu e da gimi. 16Agimi angyiŋ e sla me mbo, ame angyiŋ e sla gimi. Ame e hom gimi otum okyku o da gimi e yi e fu agbro nzenze. Agbro edgu he lo, á tpi ayi mbo. Ada á shri ekployaŋ a mbo bimi e vẽ eshko me á shri á da gimi. 17Ame e shĩ gimi, agimi e klo egimi.
Efpu moarehwi ba obiŋ hi
18O wo ba obiŋ hi o tla gimi, agimi e tne aga e ka, o sheŋ o tla me bgu. 19O wo bimi e wo moarehwi ba obiŋ hi le, obiŋ hi ó klo gimi eka ba alo o klo moarehwi ba obiŋ hi. Ambo ame e sla gimi esla angyiŋ nga agimi e wo moarehwi ba obiŋ hi angyiŋ mbo. Okyku eka he lo angyiŋ, obiŋ hi o la o tla gimi. 20Agimi e tne e ka, eka ba ame e lu ka la gimi ba awaghrẽ a wo anyuanyuŋ a gre adaŋ-odne mbo. O wo ba moa a kpo me ewu le, moa á kpo gimi a mbo ewu. O wo ba moa a bmi ta la odlo me le, moa á bmi ta la odlo bimi a mbo ko-ko. 21Moa á kpo edgu he lo ka la gimi, okyku ba agimi e wo moarehwi me angyiŋ, okyku eshi moa a yi are la a hom me otum mbo. 22Ame e ba e lu odlo e ygi mo mbo e mbi, ombgu odlobikyeŋ ó wo eshri mo mbo. Ambo ohuhuhi, moa a wo la elomekyeŋ ma okyku odlobi mo mbo ku-ku. 23Areyaŋ a mbo la a tla me, a tla Adugu. 24Ame e kpo otum ba egbregbre ba moahwõ a kpo mbo egi ayi mo mbo e mbi, ombgu odlobikyeŋ o dzu eshri mo mbo. Ambo, moa a ka ayakplo ba ame e kpo, ambo moa a tla me ta la Adugu. 25Ohe lo o kpo okyku o bli ekplo ba odlo odaŋ mo o lu mi le, Moa a tla me okyku ekplokyeŋ angyiŋ mbo.
26Are Okpoghwo á ba, aŋa angyiŋ a wo Ogbgaodzi ba adlidzi la o zgi okro Ada. Ame é da lo o zgi okro ba Ada ó ba, alo angyiŋ ó zgi egŋe me. 27Agimi a mbo é zgi egŋe me, okyku eshi a zga okũ oriori agimi e la e wo pa la me.
انتخاب شده:
Eyohana 15: EGONT74
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Eggon New Testament © United Bible Societies, 1974. Bible Society of Nigeria
