Dzɔ̌n 2
2
Yɛso ndùw kə̀male aŋ Kanàn
1A m bùghò tsuʼu m kpe tsughu n təgha, ghe ŋ ghəəŋ kə̀male aŋ Kanàn, zə̂ Yɛso n lo fughu an naʼ e Galèlîi. 2À n lo mo ghe n Yɛso à tsə̀təndə̄ghā tə wə̄n to fughu naʼà sùghò. 3A m bùghò lʉ̀ n sɛlɛ̄ tsughu fughu. Zə̂ Yɛso ndzɛ̀ â Yɛso enyəa, “Lʉ̀ ŋ kôom yo fɛ.” 4Yɛso n dzɛ̀ â wə̄n enyəa, “Ǒo nughò, ghù lə̀ghaa enyəa to M̀ mô ghɛ kə kwò? Nəgha zaŋa e kaām kpe dzə̀.” 5Zə̀ Yɛso n ndùw dzɛ̀ ndùw a kɔ̀ɔ mìa m mò fwaʼā fughu enyəa, “Abugho ù dzɛ̀ ko enyəa ghɛ ko kwò kò, ghɛ̀ ghəəŋ nduw nlò ghəa e te zo.” 6À n lo êzə̀ mò tɔ̀e tə mmùghu tə̀ li tə ti fughu tǔu mo ghe bɔm sə kɔʼ alo atia; ghe fə̀ bughò sûuw səā ghue zo a te alezɔlɔ an sə kə Kəzə̀, aŋghəa bughōo kə Tə̀dzûu kə̀ deē, mò tɔ̀e e mɔ̀ʼ lo alenì twom wə̄n m̀mughū ghuū ghûw, ŋkāa ŋghəm n təgha. 7Yɛso n dzɛ̀ â kɔ̀ɔ n te mò enyəa, “Dzə̀la lueso kaaŋ wò nlǒ mùghù mò an tɔ̀e ti to.” Ghe n nyoʼn dzə̀n lùeso kaaŋ wò è sugho. 8Ù n dzɛ â ghee enyəa, “Tuuw sə kɔʼ sə̀ nlò êzə̄ŋ, ghɛ ni nduw a vʉ̀a ghùw wəla ù lɛɛ̄n ghəa ghən gho.” Ghe n tuuw sə̀ è kɔʼ, nì ndùw sùghò a vʉ̀a wə̄n. 9A m bùghò ghùw wəla ù lɛnlo â ghəa a te gho mɔ̂m zuw kɔʼ, à n lo mò mùghù n te mə̀ m fə̂n lʉ̀ mò. Ghue u wə̄n wə ŋ kwo yo luʼū kəla n te mò nlʉ̂ nùghù wô a te (kɔ̀ɔ mi mə̀ ŋ kuuwn kwo). Ghùw vʉ̀a lɛɛn ghəa a te gho n tɔŋɔ tsughuu num ù wìzən, 10dzɛ̀ â wə̄n enyəa, “A bughoo a n nì wò dzə̀ lʉ̀ n dzùŋ mò esə̄, a mò è bùghò ghî ndôʼ mʉ kuw tsughu, an daŋso nì wò làŋà kə nlʉ̀ kən an nə̀gha zə̀ èzə̀. Ghù vʉ̀a ghù kuūwn naŋā ndùw m dzùŋ mən enyəa ghù so nduw ni wo êzə̄ŋ a.” 11Zən fə̀ lo tsə̌a è Yɛso è sûesʉ u fə̀ dê tsughu aŋ Kanàn an naʼ e Galèlîi, dè kɔ̀ʼ sùghò dwaʼa u wə̄n; tsə̀təndə̄ghā tə wə̄n tə m boo fughu tsughu â wə̄n.
12 #
Mat 4:13
A m bùghò ghə̀a ghə̀n tsəghà tsughu, Yɛso ghèe ghê zə̀ à waazə̂ ghò àsùghò ŋgaŋ tə wə̄n to n nùghù tsùghù ndùw aŋ Kàpɛnòm, dòʼò kə̀ŋo ndùw fughu an tsuʼu n lǐ mò.
Yɛso bù dzùm sə̀ aghî an Ndùghù è Kə̀zə̀ è nē an Yɛ̀lusalɛ̀m
(Mat 21:12-13; Mâk 11:15-17; Lûk 19:45-46)
13 #
Ksm 12:1-27
Zə kə̀ zəŋso naaŋ kə Tə̀dzûu kə̀ n suu wò. Yɛso n nùghù kɔ̀ʼ ndùw an Yɛ̀lusalɛ̀m. 14A m bùghò ù lǒ an ndùghù è Kə̀zə̀ è ne an Yɛ̀lusalɛ̀m, ù ŋ kòʼ ghì ghəla ghe fêen mbɔ̀ŋ tò, à ndzì tò, àsùghò ghəla ghe feēn mbuŋū to, a li ghə n lo ghəla ghe kuūwn fughuu kə̀a mò, mo ghe doʼ kaaŋ ko am bəla tə ghee. 15Yɛso n nyəm kɔʼ ekwûu fùghù èzə̀ am gbaʼ, bù dzùm sə ghee a dzə̀m a beē ghèe ghê nyòm tə ghee to; tə̀mbɔ̀ŋ àsùghò ndzì tò. Ù ŋ kwèlè sàaŋ màʼà kǎaŋ tsə̀ghà kua u ghî ghəla ghe mò fêen səa kua wo â ghì ghò, təghaan màʼà kǎaŋ sùghò ndàŋ tə ghee. 16Aŋ kuuwn bùghò â ghî ghəla ghe mò fêen mbuŋū to, ù mo â ghee enyəa, “Nîi nùghù sə nlǒ fə̀ghà mən mò fɛ, e kwo ghɛ̀ è fə̂nsò naŋā kɔʼ ndùghù è Bə̀ghà enyəa à lò bekewə̄n.” 17#Sms 69:9 Tsə̀təndə̄ghā tə wə̄n tə fi tɛ̂ mòʼn wò nù shwaʼ wəla u lô am Mwàʼsò kə Kəzə̀, u dzɛ̂ enyəa, “Ghɛ̂ zəla Ŋ̀ ki an ndughu è bə̀ghà lo nìi nùghùun nù mugho.” 18Dzuu tə n daŋso bvʉ â wə̄n enyəa, “Ghu ki tsə̌a è ghɛ zò aledèe wô â ghàʼ a, tǒ ghùw wəla ù ki daʼa ko alefwàʼ ŋgòʼ è ghə̀a ghəla ghù ghəə̄ŋ fɛ a?” 19#Mat 26:61; 27:40; Mâk 14:58; 15:29 Yɛso m bɛ̀lɛ̀ ndùw ghee enyəa, “Sàʼa màʼa tsughu nlô ndùghù è Kə̀zə̀ è ne zən an Yɛ̀lusalɛ̀m, Ǹ lo kôom bəghā naŋā kɔʼ ebàm, alo ntsuʼ n təgha.” 20Tuw u Tə̀dzûu wə̀ n daŋso bvʉ â wə̄n enyəa, “A fə̀ ndùghù è Kə̀zə̀ è ne zən an Yɛ̀lusalɛ̀m bəgha aŋ ghəm n tə̀ nùu n chìakò à nùu tǒ tǔu, ghù vʉ̀a ghù so enyəa to ghù bəgha naŋa kɔʼ an sə ghə n tsuʼ a təgha kɔʼkɔʼ a?” 21À n lo êzə̀ mo ù ndùghù è Kə̀zə̀ è te fi ŋgɔ̂ɔ ghue u wə̄n. 22A m bùghò aŋghəa ù bùghò kpuw kɔʼ sə kɔʼ alo evʉ̄, tsə̀təndə̄ghā tə wə̄n tə n tɛ̀ moʼn wò fəgha kə̀là ù fə̀ dzâa ghè kò. Ghî a fi kôom fə̀ghaan m boo tsughu nû shwaʼ u Kə̀zə̀ wò àsùghò ghəa ghəla Yɛso fə̀ dzâa tsəgha â ghee.
23A m bùghò ù sò lô an zə kə̀ Zəŋso Naaŋ ko an Yɛ̀lusalɛ̀m, ndə̀m tə aghî tə m boo fughu ndùw â wə̄n, bòʼ sə̀ghà mə̀lā ù fə̀ deē ghè mò. 24Yɛso ŋ kè sô kuūwn zə̂ ghue u wə̄n ghèe ghee, 25bòʼ ù màʼâ fə̀ kwo ghî ghò a dzə̀m, ù ŋ kôom kə̀ŋo sùghò yǒ ghùw wəla u lo aletesô mwam u ghuw wə̀ nsɔ̌ɔŋnchùw â wə̄n, u maʼa fə kwo zîi fəgha kəla ghùw nsɔ̌ɔŋnchùw lǒ ghè kò.
انتخاب شده:
Dzɔ̌n 2: agq
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
