Dzɔ̌n 1
1
Shwaʼ wəla u ki mughù zò
1To mbī e kaʼ Shwaʼ wən fə̀ lo nû, Shwaʼ u te u fə̀ lo ghèe Zə̀ kò, Shwaʼ u te wə n lo Kəzə̀. 2Shwaʼ u te u fə̀ lo ghèe Zə̀ kò to mbī e tsoō zîi tsughu. 3À fə̀ fʉgha wo u dzə̀m gbən wo Wə̄n an daʼa kə Kəzə̀, buw â Wə̄n to fəgha kə̀ li kə mô yò. 4Ù fə̀ ki emughù, mo mughù e te e lo tsə̀ â mbī e dzə̀m. 5Tsə̀ è te tughuu alo kələ̄m, ləm chia kə yo alenyəma maʼà Wə̄n.
6 #
Mat 3:1; Mâk 1:4; Lûk 3:1, 2 Zə̀ kə n tum sə̀ wò ghùw ù lì, mo zən e wə̄n e fə̀ lo Dzɔ̌n. 7U fə̀ sə wo aletesō dzâa wô fwaʼ kə tsə̂ è te a ghì ghò enyəa ghe zuw, to ghe boo. 8Ghuūghùe u wə̄n u fə̀ yo dzə tsə̀ è te, u fə̀ fɛ bugho ko aleteso dzâa wô fwàʼ kə tsə̂ è te.
9Tsə̀ è sə̀ŋo è te lo zə̄lā è nyəā wo am mbī aletughū a zəŋò ghì ghò a dzə̀m.
10A fə̀ mbī mgbaŋ gbən wo ko Wə̄n, a m bùghò Ù nyə wo am mbī, mbī ŋ kè kôom koʼòkɛlɛ wə̄n. 11Ù ŋ kwə̄n nyə̀ wo an naʼ e wə̄n, ghî a wə̄n ghə n tàʼkè kpeē nî Wə̄n. 12A m bùghò ghì ghəla ghe kpe nī Wə̄n, boo fùghù tsùghù sùghò â wə̄n, ù m fughu ghee â daʼa ko aledòʼò wɛ a Kəzə̀. 13Ghe ka fə doʼò dzə̀ wɛ a Kəzə̀ ghò mò Zə̀ kə̀ dzə tsughu ghee tò aŋghəa ghùw lò aletsə̀mà tsughu aledzə̄ wɛ a te, à fə̀ ləgha tsughu Kəzə̀ enyəa ghe doʼò wɛ a ghee.
14Shwaʼ u te wə n ndùw bùghò ghùw, tsùuŋ mùghùu tsughu sɛ̀ à ghee, Ù n dêe mɛ̀ʼn wò èsəŋò e dzə̀m aŋ ghəa a Kəzə̀, ŋgee dèe sùghò ghàʼ â ləgha zo. Ghàʼ a dzə̀m ŋ kòʼ daʼa kə wə̄n ko, daʼa kəla ù ki tǒ sɔ̀ʼ kə Wɛ kəla kə nughù wo a vʉ̀a Tsele.
15(À fə̀ lo Wə̄n wəla Dzɔ̌n fə̀ teso dzâa wò â ghì ghò an dzə̂ è tughu enyəa, “Wən lǒ ghùw wəla mùghò mò dzâa wò enyəa, ‘Ù bughòo â bâa mùghò mò Ù tsə̀ghàsə̀ mugho, bòʼ ù fə ki lo tsəgha nû to ghee e bughò dzə mugho.’ ”) 16Ù bùghùso sɛ̀ bughuso kwènlò bòʼ ləgha è ne zəla ù ki a zəŋò sɛ̀. 17Zə̀ kə fə̀ lâŋ kò am mbī fughu wo â Musî, Kə ŋ kuuwn dè wò ləgha e wə̄n àsùghò fəgha kə̀là ù lǒ ghè kò â Yɛso Kə̀lestò. 18Ghùw ù lì kaām kôʼ kòʼ Zə̀ kò; alo ko sɔ̀ kə wɛ kəla kə lo am bughu e Tsele, kə nì dè wò wə̄n â sɛ̀.
Tūm è Dzɔ̌n wəla ù fughuu mùghù ŋ Kə̀zə̀ mò
19Dzûu təla tə fə̀ lo an Yɛ̀lusalɛ̀m n tum sə wò tə fɔ̀e ghèe ghê ghî a Lɛvì ghò, enyəa ghe bùghò bvʉ â Dzɔ̌n enyəa, “Ghù lò ndugho a?” 20Ghe n ndùw bvʉ̀ ndùw sùghò ghəa ghən â Dzɔ̌n, ù ŋ kè tue alebɛ̀lɛ̀ ghee, ù ŋ dzɛ̀ ndùw ezɔŋɔ an ndzughu e tughō zo enyəa, “À yò dzə̂ mughò Kə̀lestò ù te.” 21#Mal 4:5; Lwa 18:15, 18 Ghe ŋ kòom bvʉ̀ â wə̄n enyəa, “Ghù kuuwn lò ndughoo a? À lò ghùwshʉ̀ghà Èlaedzà à? Ŋkāa ghù lo ghùwshʉ̀gha ù Kə̀zə̀ wəla ghàʼ ləə̄m tsəgha a?” Dzɔ̌n mo è tue. ù m bɛ̀lɛ̀ tsughu ghee enyəa, “Ɛ̂ŋgaŋ dzə̂.” 22Ghe m bvʉ â wə̄n enyəa, “Ghù sò yia kuuwn biso lò tsughu ndughoo? Ghù aŋ ghùe wʉ̂a, ghù dzɛ̂ èndughō? Fughu wò ghaʼ â fwə̀n kə edzughu ko, tò ghàʼ ndûw dzâa ndûw â ghì ghəla ghe tum sə wô ghaʼ.” 23#Èzy 40:3 Dzɔ̌n n dzɛ̀ enyəa, “Ǹ lo ko ghùw u kə̀bɔ̀ŋ, Ǹ naʼn kwəla wô â ŋgwəla gho enyəa, ‘Nə̀ghaso nlǒ dzì â Mughu ù tē!’ [Kùu ndùw shwaʼ wəla ghùwshʉ̀ghà ù Kə̀zə̀, tɔɔŋ Èzayà fə̀ tɔm naŋā.]”
24À n lo êzə̀ mò à ghee tum sə̀ wò ghì a Falàsîi. 25Ghe m bvʉ â wə̄n enyəa, “Ghù sò ghì ghò â mùghù ŋ Kə̀zə̀ ŋ kuuwn fughu tò ndugho a, ghù sô yô Kə̀lèstò, yò sugho Èlaedzà, ŋkāa ghùwshʉ̀ghà ù Kə̀zə̀ a?” 26Dzɔ̌n n bɛ̀lɛ̀ ndùw ghee enyəa, “Ŋ̀ ghî à fughu â mùghù ŋ Kə̀zə̀ mò, zə̀ e kuūwn lo enyəa ghùw lo fì an tsə̀tèʼè fɛʼɛ mò ghɛ̀ kwo yo wə̄n. 27Ù bùghò a bàâ mùghò, ù kǔuwn tsə̀ghàsə̀ mugho, Ŋ̀ kâ tsò kɔ̀ʼ kpē aledòʼò ghùw ù kə̀fwàʼ ù wə̄n aletsughū zê gbaʼ u tə gùw u wə̄n.”
28Ghəa ghən fə̀ bəla kə ni an nàʼà fə Bɛtānì an tsə kə zuw è səa zo, am bà kə dzughuu Dzodàn kə̀là Dzɔ̌n fə̀ fughuu ghî ghò â mùghù ŋ Kə̀zə̀ mò a te.
29Tsʉtsʉ vʉ̀, Dzɔ̌n mo e koʼò mo Yɛso sò sə̌a kəəŋ wò a vʉ̀a wə̄n. Dzɔ̌n n dzɛ̀ enyəa, “Kòʼ nlò Tsʉa u ndzì u Kə̀zə̀ wəla u ghəŋlo enyəa Zə̀ kə̀ ghuūw maʼà bòo tə ghì a mbī. 30Wən lǒ ghùw wəla mùghò mò dzɛ̂ enyəa, ‘Ghùw wəla ù bùghò a bâa mùghò mò ù tsə̀ghàsə̀ mugho.’ Tɔŋlo enyəa ù fə̀ lo ziī nû to ghe e dzə mugho. 31Ghuūghùe waŋā, mùgho mò kwo sugho yo Wə̄n. E lo enyəa Ŋ̀ ghî à fɛ fughuu â mùghù ŋ Kə̀zə̀ mò aletsʉā naŋā kɔʼ sə ghɛʼɛ̄, ghɛ̀ ghî ghə Ezə̀lɛ̂, enyəa ghɛ̀ e lo alekòʼòkɛlɛ̄ Wə̄n.” 32Dzɔ̌n n teso dzɛ̀ ndùw tsə̌a zəla ù mò kôʼ enyəa, “Mùghò ŋ kò mdùwʼ Zuʼ tə̀ Zɔlɔ to tə sə tsughu wo alo kəwālā aŋ ghùe wə ebuŋū, bùghò tsughu maa tsughu a zəŋò wə̄n. 33Ghuūghùe waŋā, mùgho fə̀ kwo sugho yo wə̄n, à sô fɛ lo enyəa, ghùw wəla u tum wô mugho enyəa M̀ bughò, mùghò è fughuu ghî ghò â mùghù ŋ Kə̀zə̀ mò, fə dzɛ â mùghò enyəa, ‘Ghùw wəla ghù kè koʼo Zuʼ tə̀ Zɔlɔ tə sə tsughu wô alo kəwālā, bùghò tsùghù maa dòʼò tsùghù a zəŋò wə̄n, kele tsughu enyəa à fi lo wə̄n wəla ù lo fughuu ghɛ â Zuʼ tə̀ Zɔlɔ#1:33 mwàʼsò ù loʼ u dzɛ̂ enyəa, alefughu mùghù ŋ kə̀zə̀ an Zuʼ tə̀ Zɔlɔ to. to aleghəŋlo enyəa ghɛ̀ doʼo ghî à fughu gho.’ 34Mughò ŋ kùm kòʼ, M̀ fɛ êzə̄ŋ dzâa wò nù enyəa wən lǒ Wɛ ù Kə̀zə̀.”
Yɛso shìaa tsə̀təndə̄ghā tə wə̄n tə sʉèsʉ to
35A m bùghò tsʉtsʉ vʉ, Dzɔ̌n n ti ghèe ghê tsə̀təndə̄ghā tə wə̄n to tə bə̀ghà. 36Ù ŋ kôʼ aŋghəa Yɛso səā kəə̄ŋ wo a te, ù n nùghù dzɛ̀ tsùghù enyəa, “Kòʼ nlô Tsʉa ù Ndzì è Kəzə̀ à.” 37A m bùghò tsə̀təndə̄ghā tì tə̀ bə̀ghà zuw tsughu ghəa yi gho êzə̀, tə n nùghù ndùw a bâa Yɛso. 38Â Yɛso alebàŋà lɛɛ̄n tsughu, ù ŋ kòʼ ghee, mo ghe yia ghe bugho â bâa wə̄n, ù m bvʉ â ghee enyəa, “Ghɛ̀ kəŋo kə̀ kwò?”
Ghe m bvʉ â wə̄n enyəa, “Wàdè, ghù mùghù ghɛ?” 39Ù n dzɛ̀ â ghee enyəa, “Bùgho kòʼ nlò.” Ghe m bùghò kòʼ tsughu luʼū kəla ù mùghù a te; zee mɛ̀ʼɛ̀ ndùw tsûʼ fə te fo ghèe ghê Yɛso, bòʼ à fə̀ lo an tàm tə ezuw tə chìakò an nə̀gha è guŋso zo. 40Ghùw ù mɔ̀ʼ aŋ ghî ghəla ghe fə̀ zuw shwaʼ u Dzɔ̀n wo n nùghù ndùw a bǎa Yɛso fə̀ lo Andèle, wàazə̀ Sǎemòn Pità. 41A m bùghò Andèle zəghà tsughu Yɛso, ù ndùw kòʼ ndùw wàazə̀ tɔɔŋ Sàemòn, dzɛ̀ â wə̄n enyəa, “Ghàʼ ŋ Kə̀lestò u te kôʼ.” 42Ù n nì ndùw wə̄n a vʉ̀a Yɛso. Yɛso n lɛɛn ko wə̄n enyəə, dzɛ̀ a wə̄n enyəa, “Ghù fɛ lo Sàemò Pità tɔɔŋ wɛ ù Dzɔ̌n. A lô ghù êzəŋ tɔŋlo enyəa à lò Sefàs; mo e moʼn tsùghu enyəa, ‘À lò Pità (ŋkāa Kənɛ.’ ”)
Yɛso tɔ̀ŋɔ Felêb ghèe Nàtanìɛl tǒ tsə̀təndə̄ghā tə wə̄n
43Tsuʼu tsʉtsʉ vʉ̀, Yɛso m moʼn tsughu enyəa to e mô nughu ndûw aŋ Galèlîi. A m bùghò ù nùghùun nduw, ù ŋ kòʼ tsùghu Felêb, dzɛ̀ â wə̄n enyəa, “Nùghu wò a bâa mùghò.” 44An lo êzə̀ mo Felêb sə sùghò am Bɛ̀dsǎedà tò Pità ghèe Andèle. 45Felêp n ndùw kòʼ ndùw Natanìɛl, dzɛ̀ â wə̄n enyəa, “Ghàʼ ŋ kə̀ŋ kôʼ ghùw wəla Musî fə̀ tɔm naŋā kùʼù ndùw wə̄n am mwàʼsò kə kəlàŋ asùgho aŋghəa ghiīshʉ̀ghà a Kəzə̀ a fə̀ tɔm naŋā. À lò Yɛso, wɛ ù Dzùghùsî, tɔɔŋ ghùw Nazalɛ̀t.” 46Natanìɛl m bvʉ a wə̄n enyəa, “Ghəa è dzûŋ è li e mboʼo lò ko nû e lô alesəā wô an Nazalɛ̀t à?”
Felêp mô â wə̄n enyəa, “Bùgho kòʼò tsugho an sə ghə̂a.”
47A m bùghò Yɛso kôʼ Natanɛɛ̀l ù səā kəə̄ŋ wo a vʉ̀a wə̄n, Ù n dzɛ̀ tsùghù enyəa, “Kôʼ kùum kə ghuw kə Ezə̀lɛ̂ kò mo ù bə̌ən ghəəŋ yo ghəa gho a.” 48Natanìɛl m bvʉ a wə̄n enyəa, “Ghù mùghò kele ênzə̂n?”
Yɛso m bɛ̀lɛ̀ ndùw wə̄n enyəa, “To Felêb e tɔŋɔ ghù, à lǒ mò M̀ mâa ghù kòʼ zìi fî a ghù mò lô a tsəla kâʼ fə fîʼ.” 49Natanìɛl fi dzɛ̂ ndùw nù â wə̄n enyəa, “Wàdè ghù lǒ Wɛ ù Kə̀zə̀. Ghù lǒ Də̀ŋ kə Ezə̀lɛ̂.” 50Yɛso n dzɛ̀ â wə̄n enyəa, “To ghù êzəŋ fi boo tsughu bòʼ Ǹ dzɛ̂ wô enyəa M̀ mô kòʼ ghù a tsəla kâʼ fə fîʼ a? Ghù lo naam kòʼò àghəa mo ghə n tsə̀ghàsə̀ ghən.” 51#Dzs 28:12 Yɛso ŋ kòom dzɛ̀ ndùw â wə̄n enyəa, “Kùmkùm, Ǹ dzâa wô â ghɛ̀ enyəa, ghɛ̀ lo kòʼò kəwālā kə tsʉ dòʼo, àsùghò tsə̀təndə̄ghā tə Kəzə̀ tò tə tsughuu kɔʼɔ̄ an làŋ kə Wɛ ù Ghùw.”
انتخاب شده:
Dzɔ̌n 1: agq
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
