Dalaana 2
2
1Sagi sun a feey, a yii hom na ɓéeɓ lúsëꞌté ɗah. 2Lúsɗëꞌ Koo légéyí rë, bisi paana fa, ɗi hílsëhté. Bisi paana fa, Koope hílsëꞌ légéyée ké rí sakaꞌ ri ɓéeɓ rë në. 3Koope barkelte bisi paana fa, habaꞌte ri bisi, di biti ɗi hílsëꞌ légéyée ké rí sakaꞌ ri ɓéeɓ rë në. 4Baa daa naaɓii sagi sun a feey.
Naaɓii dalaani pesa
Húmú sakaꞌ Koo-Yahwee sun a feey bín fë rë, 5ɗeef tal kilik yínë sah húmúy luufa, te gaawa paalay na, di biti Koo-Yahwee húmú dalay toɓ, te ow húmú lahay níi líné feey fa. 6Ndaa lahte culi mulii ɗofohte, na hilsiɗ feey fa ɓéeɓ.
7Tígí daaha, Koo-Yahwee ɓeɓ na feey fa, yugusaꞌte ow, fúlílté nuŋŋi ñíinë, ɓekke ri coonaa, ɗi hente ɓëyí në pes.
8Koo-Yahwee saampe meey Eden di púlëen naꞌ, yíppé në kilik, tíkké në ɓëeꞌ ɗi yugus ri ra. 9Koo-Yahwee paaliɗte sun fi feey fa heetti kilikki wunte yeel, te koyya neɓpe ñam. Ɗi yíppé leelii meeya, kilka na onaꞌ pes, a bee na teeɓaꞌ yin wun a yin ɓos ra.
10Eden lahte laahi gaani hútëꞌ hútëe, daa ri na hilsiɗ meeya. Daaha, laaha salte iniil. 11Sali yínëe hínú Pison. Daa ri wër gini Hawilaa ɓéeɓ, bee feey fa lahaꞌ úrís rë. 12Gini baa lahaꞌ úrís kah-kah, lahte kilikki na yugusuu yin heeñlaa ɓal a laꞌa kofeel ot, na wonuu ëníksë rë. 13Sali ana fa wër gini Kús rë, hínú Gihon. 14Sali éeyë fë hínú Tíigër ; daa ri bee na hút, paaꞌ Asuur púlëen naꞌ ra. Sali iniil fa hínú Efarat.
15Koo-Yahwee húmú tík ɓëeꞌ meeya Eden, nda ri mín ríi lín ndín, yugus ri. 16Ɗi antee won ɓëeꞌ unni ƴeh : « Fu mín nëe ñam koyyi kilikka meeya ɓéeɓ di neɓaꞌ ro, 17níi tasse koy kilka na teeɓaꞌ yin wun a yin ɓos ra ; yiin ñaman fu na ra, lah yúhé biti fay húl. »
18Koo-Yahwee won nufi tih : « Ɗaay wuneh ow na, kon may sak ɓëyí madaꞌ a ri ndín, habraꞌ ri. »
19Koo-Yahwee ɓeɓ feey, yugusaꞌte raɓɓa feey fa a ƴakka sun, antee waa kúɗ fíi ɓëeꞌ, nda ɓëeꞌ saamiɗ wa tii ndín, bina-bina ɓéeɓ ɓeɓ tiya nay rii yere ɓëeꞌ rë. 20Kon ɓëeꞌ saamiɗte raɓɓa faamma, ƴee luufa a ƴakka sun ɓéeɓ tii ; ndaa ri olay ɓëyí madaꞌ a ri ndín, habraꞌ ri.
21Tígí daaha, Koo-Yahwee ɓekke ɓëeꞌ neeꞌi misikke ; filiɓ neeꞌa, Koope níssé laf yínë araal ɓëeꞌ, wëegísíɗté tígë nísëꞌ rí lafa ra ɗee húmú man ri ra nen. 22Koo-Yahwee antee ɓeɓ lafi baaha yugusaꞌte ɓeleɓ, kompe ri ɓëeꞌ. 23Olaꞌ ɓëeꞌ ɓelaa, ɗi won tih :
« Waali yíníi beh,
bee ƴuhi faan soꞌ kan a ñif mi soꞌ !
Ɗi ay wonuu ow ɓeleɓ,
ndah biti ɗi ɓeyuu ɓëeꞌ në#2.23 ndah biti ɗi ɓeyuu ɓëeꞌ në : Di ébrë, di na wonuu ow ƴaal (ís) a di na wonuu ow ɓeleɓ (ísë), na samuu man.. »
24Yii baa daa tah ow ƴaal ay ɓísëh a boffi a yaafi, pokoh ɓeleɓi na, wa hen yínë. 25Ɓëeꞌ a ɓeleɓi húmú faan holoŋ, ndaa sopantaꞌ húmú lahay hanndal ki wa.
انتخاب شده:
Dalaana 2: NDV
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© Wycliffe Bible Translators, Inc. All rights reserved.