SIONE 12
12
I Meri mo vurae na garu i Jisas lo gwatuivanua Betani
(Mat 26.6-13; Mak 14.3-9)
1Hikani a rani kaiono koro na Kanikani* na Tivekiana, i Jisas mo vanamai vaki Betani. Betani aia a gwatuivanua i Lasaros, aia hi i Jisas mo rakatia tina mateana. #Sione 11.1,43-44 2Aira takwa-hi rau vai a hinaka kai Jisas. I Mata mo toko beteki na hinaka, vae i Lasaros aia eia maira hi ramo hugu lo tevo na kanikani mai Jisas. #Luk 10.40 3Hikani i Meri u lavi na vurae boniboni, a hinaki a nat*, a mavana a gilo duviki, a manena u lakua haburu. Mo vanamai vaki mai Jisas mo vurae na garuna kinia. Vunu i Meri mo kwasu mamahaki na garu i Jisas kina vuluna. A vurae hi u boniboni doluaki na ingwa. #Luk 7.37-38 4I Sutas Iskariot aia takwa-hi, aia katukwale tina ngwalagelo noi Jisas, aia hini kwara vae ne tovo kai Jisas. #Sione 6.71 5Mo kwaha mo viti kwara, “A vurae boniboni hikani u taritarisa mana vatu tari vakavidolua vakaitolu. #12.5: A vatu tari vakavidolua vakaitolu aia a vatu 300,000. ?Kworoho a vavine hika he va hokakinia tea kwara ne lai mane* luna ne hile lakwa na tangaloi kakaravi?” #Mat 19.21; Mak 10.21; Luk 18.22 6I Sutas u viti kwehini, hete kwara u domi huri na tangaloi kakaravi. Vae u kwaha kwehi huri aia a tangaloi babalua, u kwali na tanga na mane, vae mo toko kwiri taveaki na noga mane duviki kwara ki nona.
7Vae i Jisas mo viti “!Tulu tirakinia! A natu vavine hika u kwiribibi na vurae boniboni vaki na hika vae mo vuraeau kinia terekaki huri kwara vae rana tau na tarabehigu tilolo gwaru-malanga*. #12.7: A domidomi na ves hi lo leo nona ngwera Gris hinea rau uli a buku hi luna tomua halaradu he matangwasara tea. #Sione 19.40 8I kamu, a tangaloi kakaravi rau hugu maikamu tigwaravu, vae i nau nanahe hugu te maikamu tigwaravu.” #Dut 15.11
A tovotovo huri na mateana kai Lasaros
9A tangaloi rusa haburu rau rongo kwara i Jisas u hugu Betani, vae hikani ramo vano vaki takwa-hi. Rau vano hete kwara rana tagai Jisas kehekeheki, vae vake kwara rana tagai Lasaros, aia hi i Jisas mo rakatia tina mateana. #Sione 11.43-44 10Hikani a tangaloi* lingilingi lalakua a domiga u huira ramo tovotovo tabulutaki kwara rana kwohi matei Lasaros vake, 11huri a gwaloana noi Isrel* u rusa haburu rau tirakinira, ramo hauhuri lui Jisas huri i Lasaros mo ahi taliku. #Sione 11.45
I Jisas mo vano vaki Serusalem vae a tangaloi rusa ramo tabe hakeki na hinana
(Mat 21.1-11; Mak 11.1-11; Luk 19.28-40)
12Mavukona a vao lakua hinea ramo vanamai vaki lolo Kanikani* na Tivekiana rau rongo kwara vae i Jisas u tuku lakao vanamai vaki lo gwatuivanua lakua Serusalem. 13Hikani ramo tai a rangai-vikai aira hoki na rahere, ramo vano kwara rana tagaia. Ramo kaluhaki ramo viti kwara,
“!Kaluhaki God!
Hugwe i God.
Ko vai tabetabekinia hi
u vanamai lo hinamu.
Ko vai tabetabeki na Hugwe Lakua
nona gwaloana noi Isrel*.” #a Sam 118.25-26; b Mat 27.42; Mak 15.32; Sione 1.49
14I Jisas u hagwe na dogi ngwalageloki mo hugu luna, hoki na Uliuli* Kokona mo viti kwara,
15“I kamu a tangaloi na gwatuivanua lakua Saeon,
tulu hatu mataku.
Hikani a nomiu Hugwe Lakua
u kwalao lo natu na dogi,
u vanamai vaki maikamu.” #Sek 9.9
16A nona ngwalagelo rahe domi kikilaki na kinau te hi lo taro hi, vae vaki takuni lolona hi i Jisas mo mule hake, i God mo tabe hakeki na hinana, vunu ramo domihagwe kwara a Uliuli Kokona u viti hokinia hi, vae aira rau vai hokinia hi ba lakwae. #Sione 2.22
17A vao hinea ramo huri Jisas lolona hi mo kwareluahi i Lasaros tina tabuna mo rakatia tina mateana, aira ramori toko lai leoki lakwa na tangaloi dolua huri na kinau hi mo vaia. #Sione 11.43-44 18Vae huri hi, a tangaloi rusa ramo vano vaki mai Jisas kwara rana tagaia, huri ramo rongo mo vai na kaivosangi lakua hini. 19A Varisi* ramo toko kwahakwaha kinira ramo viti “Tulu taga. I kita hika tanahe vai lavi na kinau te vohoki. A tangaloi doluaki na varamana rau huria aira vunu.” #Sione 11.48
A ngwera Gris ramo soro haro i Jisas
20A ngwera Gris ratuaki aira maira hi ramo vano vaki Serusalem kwara rana kaluhaki God kina domi mavakiana lolo taro na kanikani* hi. 21Ramo vanamai vaki mai Viliv. Aia a ngwera Betsaeta, lo vanua Galili*. Ramo uduhuri kinia ramo viti “Keu lengaia kwara kena tagai Jisas.” #a Sione 1.44; b Luk 19.3; 23.8
22I Viliv mo vano mo viti lakwai Aduru, vunu raru mo vano raru mo viti lakwai Jisas. 23I Jisas mo kwaha maira mo viti kwara, “I nau a Natu* na Tangaloi, a tarogu u vanamai ba, vae i God ne tabe hakeki na hinagu. #Sione 13.31-32; 17.1 24Kareaki na viti lakwakamu. Diko a tangaloi ranahe tanomi na biu na sila tea, a biu hi ne va eno kwehi, huri aia kahea vohoki. Vae diko rana tanomia vae ne tubu, neri kwai, a biuki ne rusa. #1 Kor 15.36 25A tangaloi hinea u lengaia kwara ne kwiribibi na mamaurianana vae ne vakasalakinia, vae ihe hi he domi huri na mamaurianana tea hike lo varamana, vae ne kwiribibia vaki lo ahiana vaki tuai. #Mat 10.39; 16.25; Mak 8.35; Luk 9.24; 17.33 26Ihe hi u lengaia kwara ne boloki lakweau ne huriau, huri kwara vae na hugu takwanahavaki vae nogu tangaloi boloki neri hugu eia maiau. I Tamagu neri vai mavakinira hinea rau boloki lakweau.” #Sione 14.3; 17.24
I Jisas mo viti huri na kana mateana
27Vunu i Jisas mo viti kwara, “?Hikani a domigu u rongo hati vae na viti kworoho? ?Nana viti ‘Mama, ko hatu tiraki na taro hika mo hivo tau lugu’? Hetea, nahe viti te kwehi, huri i nau nu vanamai kwara na vano lalahi na taro na rongoana hati hika. #Sam 6.3; 42.5,11; Mat 26.38; Mak 14.34 28!Mama, ko tabe hakeki na hinamu!”
Vunu a dilao mo tatangi tina taetae, mo viti kwara, “I nau nu tabe hakekinia u rovo ba, vae nari tabe hakekinia taliku.” #Mat 3.17; 17.5; Mak 1.11; 9.7; Luk 3.22; 9.35
29A vao rau tu ramo rongo na dilao hi, ramo viti “!Ii! !A gwatuhari mo dadare!”
Ratuaki ramo viti “!A kaihora tina taetae u kwaha maia!”
30Vae i Jisas mo kwaha maira mo viti kwara, “A dilao hika he vanamai te lakweau, vae u vanamai lakwakamu kwara tulu ne rongo. #Sione 11.42 31Hika a taro kwara i God ne areki na tangaloi na varamana, vae hika, i God ne gui i Setano*, a hugwe na varamana. #a Sione 9.39; b Sione 14.30; 16.11 32Vae i nau, lo taro hi a tangaloi rana tabeau hake tina tano vaki lo kaibetu, nari revei na tangaloi vunuhira vaki maiau.” 33U viti hokinia hi, u vosangi kwara vae ne mate kworohokinia. #Sione 18.32; 21.19
34A vao ramo kwaha maia ramo viti kwara, “A noda Tangwata* u viti lakwakita kwara i Vurae* ne toka vae vaki na tuai. ?Vunu kworoho komo viti hokinia hi, kwara a Natu* na Tangaloi ne tabe hakekiana? ?Ihe hi a Natu na Tangaloi?” #Sam 89.4,36; 110.4; Aes 9.7; Dan 7.14
35I Jisas mo daraki mo viti kwara, “Ne leleha maikamu nehe tuai tea. U leleha maikamu radu, tulu lakalakao luna kwara vae a dodoki ne mai guikamu, huri a tangaloi hinea u lakao lolo dodoki he kikilai tea kwara ne vano ave. #a Sione 7.33; b Sione 8.12; 9.4; 12.46; d Sione 11.10; 1 Sione 2.11 36Lo taro hi u leleha radu maikamu, tulu hauhuri lo leleha hini kwara vae tulu ne kwareki a raranatu na leleha.”
A gwaloana noi Isrel rahe hauhuri tea lui Jisas
I Jisas mo viti hokinia hi vunu mo vano tiura mo hili. #Eves 5.8 37I Jisas mo vai na kaivosangi lalakua rusa lo nakoga vae rahe hauhuri tea luna. 38Hokinia a leo nona tangaloi* duruduruki i Aesaea mo viti u mule luna, hi mo viti
“Hugwe i God.
?Ihe u hauhuri lo leo hi kemo viti?
?Ku vosangi na nomu huirana lakwai ihe?” #a Rom 10.16; b Aes 53.1
39Vunu vake rahe hauhuri lai tea, huri i Aesaea u viti buluiki vake kwara i God u viti
40“Nu kwiri koro mataga,
nu kwiri koro domiga,
kwara vae a mataga ranahe tagataga tea,
vake a domiga ranahe kikilai utuhaki tea,
vae ranahe halebohi tea vaki maiau,
kwara na vakahikinira.” #Aes 6.10; Mat 13.15; Mak 4.12
41I Aesaea u kwaha hokinia hi huri aia u tagai na huirana noi Jisas, vae mo toko vitiviti huria luna. #Aes 6.1
42Vae a kaitomuaki nona gwaloana noi Isrel*, u rusa rau hauhuri luna, vae rahe viti te tivarea huri rau mataku kina Varisi*, huri vae ramai taura tivarea tina vale* na tiutangaroa. #a Sione 7.48; b Sione 2.23; 7.31; 8.30; 10.42; 11.45; 12.11; d Sione 9.22 43Rau lagwa kwara a tangaloi rana kaluhakinira u sileti kwara i God ne kaluhakinira. #Sione 5.44
A leo noi Jisas ne areki na tangaloi savia
44I Jisas mo kwaha karakara mo viti kwara, “Ihe hi u hauhuri lugu, he hauhuri tea lugu kehekeheki, vae luna vake aia hini mo horeau. #Mat 10.40; Sione 5.24 45Ihe hi u tagaiau, u tagaia vake hinea mo horeau. #Sione 14.9 46I nau a leleha nu vanamai tilo varamana, kwara aira hinea rau hauhuri lugu ranahe hugu tea lolo dodoki. #a Sione 3.19; 8.12; 9.5; b Sione 12.35 47Ihe hi u rongo na leogu vae he rongohuria tea, vae i nau nahe arekinia tea. Nahe vanamai tea kwara na areki na tangaloi na varamana, vae nu vanamai kwara na vakahiki na tangaloi na varamana. #a Mat 7.26; b Sione 3.17; 8.15 48Ihe hi u bena kiau, vake he lavi na nogu leo tea, a kaiareki katukwale eia vae neri arekinia. A leo vano hi nomo vitira, ranari arekinia lo rani ki rovonaki, 49huri hika a leo vano hi nomo vitira, hete leogu sibogu, vae rau vanamai ti Tamagu hi mo horeau. Aia u viti lakweau kwara na kwaha, na viti hokinia hi lakwakamu. #Sione 7.17 50I nau nu kikilai kwara a nona tulikileo hini, u lavi na ahiana vaki tuai vanamai. Vae a havakinau hi nomo viti, aia hi i Tamagu mo horeau kwara na viti.” #Sione 8.26,28
اکنون انتخاب شده:
SIONE 12: HWT
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Havakinau New Testament © Bible Society of the South Pacific, 2016.
