Iruuku 23

Â za Ijeesu ne tù Ipayireti ana vị ịgọvọnọ

(Imt 27.1-2,11-14; Ịmk 15.1-5; Ịjọ 18.28-38)

1Dị avaba ọkọnị aza ẹnẹẹ kwẹẹtẹ, dị ẹ sị Ijeesu nọ ịdị Ipayireti nị. 2Dị ẹyaa sị ịrẹyị anịị tụ́ ịrẹka nị ka, “Yâ za ọnọrụ ọnọnị ka ee du ẹkụra ayị; ọ ka asị ẹ rẹ̀ tụ́ ẹkẹhị irehi yị ohinọyị Aniroomi. Ọ rẹ ka ọnị ọ vị Ikirisiti ana vị ohinọyị nị.” 3Dị Ipayireti họ̀ Ijeesu ka, “Ẹ wáá vị ohinọyị Aniju nị?” Dị Ijeesu tụ́ ọọ ohi, dị ọ ka, “Ụ mẹ̀ yị kà a, avọọ yọ.” 4Dị Ipayireti kà a yị ohirẹsụ ẹbanyị irehi Ohomorihi ọnịrị aza ana vọ ka, “Me yi re ịsa odivi ọnị ọnọrụ ọnọnị mẹ, oo!” 5Dị aza ẹnẹẹ sị kà geri-geri, dị ẹ ka, “Aa tụ́ aza ịrẹyị, ọ màa zụ̀ avaba Aniju nịnị ịsa; ô nyima hụrẹ Igariri huuu va ngụ ịzẹnị.” 6Ịjị Ipayireti wụ́ ịrẹha Igariri, di o ve họ̀ use ka Anigariri Íjeesu wáá vị nị. 7Ọ mẹ̀ wụ́ ka ịzị Ịhẹrọdị vị ohinọyị tụ́, Íjeesu hụrẹ vẹ nị, dị ọ sị ọọ tụ́ na yị Ịhẹrọdị nị. Ịhẹrọdị ọnị vị ana yà Ijerusarẹmị ịnị ụmẹ ọnọọ.

A rẹ sị Ijeesu nọ ịdị Ịhẹrọdị

8Ị́hẹrọọdụ mè re Ijeesu, ịnẹ anị ô hine ẹtẹẹtẹrẹ, agụvị ka o si kù oni o hụrẹ ee sì ka oni ò ree. Ịhẹrọdị ộ vịdị wụ́ ịrẹyị irenyi-irenyi ini oze Ijeesu, di ee ro o ka oni vee re ụkọrọ ohyozirenu oni Ijeesuū mẹ nị. 9Ịhẹrọdị ộ họ̀ ọ use ịrẹyị irenyi-renyi, ama Ijeesu o yi tụ́ o ohi vụrụ-vụrụ. 10Di ohirẹsụ ẹbanyị irehi Ohomorihi beri ọzwọzọda nịnị vẹ, dị ẹ sị ịrẹyị Ijeesu tụ́ Ịhẹrọdị ịrẹka ẹtẹẹtẹrẹ nị. 11Dị Ịhẹrọdị ọnịrị isoja anị nịnị aa sị Ijeesu mẹ ịyẹyẹ nị. Dị ẹyaa mẹ̀ ẹ isiya, dị ẹ sị awuru nyanga-nyanga chire e, dị ẹ rẹ sị ọọ varẹma na yị Ipayireti nị. 12Ịhị ọnọọ dị Ipayireti ọnịrị Ịhẹrọdị sị vara ọta nị; agụvị ka ọnịvị ẹngụ ẹ vịdị vị nị.

Ệ jị ịvị isu yị Ijeesu

(Imt 27.15-26; Ịmk 15.6-15; Ịjọ 18.39—19.16)

13Dị Ipayireti hị́ ohirẹsụ ẹbanyị irehi Ohomorihi ọnịrị ọdọvịdị nịnị beri aza ana vọ gụ nị. 14Dị ọ kà a yị wa ka, “Wâ za ọnọrụ ọnọnị vẹ ịdị amị nịnị ka ee du aza. Re nịnị, eyi awụ nịnị mị zama ịrẹyị anị re nị, ama me yi re ka â nyị ịsa odivi ọnị ọ mẹ ịnị ịrẹyị anị ọnị ụ sị va tụ́ ịrẹka nịnị. 15Ịhẹrọdị oni e yi re re ịsa odivi ọnị ọ mẹ, agụvị ka ộ sị ọ vavẹ va yị. Ẹ yị nyị ịsị ọnọrụ ọnọnị mẹ, ana a vọrọ ka à sị wụ ọọ. 16Agụvị avọọ, maa kà a ka è tụ́ ọ ịjapa, dị ma hụrẹ ẹ ụvọ.” 17[Eche ọ̀ọ maanị si tù, â nyị ka Ipayireti ọ̀ hụrẹ anịnẹngwa ọnya ụvọ.] 18Dị ẹ wụsẹ nowu tụ́ ẹba, dị ẹ ka, “Sị ọnọrụ ọnọnị kwooze, dị ụ wa hụrẹ Ibaraba ụvọ yị.” 19Ibaraba ọnọọ vị ana a za tụ́ ịnị ẹngwa agụvị ịrẹkụ ana chị tụ́ ịnị ẹkụra, dị a wụ̀ ọza ịnị anị. 20Ipayireti ee sì ka ọnị ọ̀ hụrẹ Ijeesu ụvọ, di o re beri aza ẹnẹẹ kà ịrẹyị nị. 21Ama di e nowu tụ́ ẹba, dị ẹ ka, “Kanyị ọ za apavahị! Kanyị ọ za apavahị!”

22Dị Ipayireti rẹ kà a yị wa ụpẹ ọhụta ka, “Sị ẹ vẹ, sị ẹ vị ịsa odivi ọnị ọ mẹ? Me yi re ịrẹyị ana a vọrọ ka à sị wụ ọ. Maa kà a ka è tụ́ ọọ ịjapa, dị ma hụrẹ ẹ ụvọ.” 23Dị ẹnịnị sị kà geri-geri, di eyee nowu ka ọ̀ kanyị ọọ za apavahị nị. Dị ahịka owu ẹnẹ ẹyaa na, ọ vana nyị ẹbẹẹba nị. 24Dị Ipayireti mẹ̀ ọkarẹyị yị Ijeesu, dị ọ ka aza ẹnẹẹ ẹ̀ na mẹ̀ ẹ, anka e mè sì nị. 25Dị ọ hụrẹ ụvọ ọza ana a za tụ́ ịnị ẹngwa agụvị ịrẹkụ ana chị dị a wụ̀ ọza nị. Ọza ọnọọ ẹ́nịnị sì nị. Dị ọ sị Ijeesu chire wa ụvọ ka ẹ̀ mẹ̀ ẹ, anka e mè sì ọọ nị.

Â kanyị Ijeesu za apavahị

(Imt 27.32-44; Ịmk 15.21-32; Ịjọ 19.17-27)

26Ẹ mẹ̀ sị Ijeesu aa na, ê re ọza ịnya aanị ana hụrẹ aarẹ aa vẹ. Aā hị́ ọọ Ịsayịmọnị Anisayireni. Dị ẹ sị ụkata za a, ka ọ̀ va za apavahị Ijeesu, dị ọ̀ọ dụ ọọ na nị. 27Dị aza ọrụrụ-ọrụrụ aa dụ ọọ na beri anẹẹ ene ee nowu, dị ẹyaa jị oreree yọ nị. 28Dị Ijeesu kana eyi sì wa, dị ọ ka, “Ẹwụ nịnị ezi anẹẹ Ijerusarẹmị, asị ụ jị òrèrè amị nịnị! Ama waa jị òrèrè ẹngụ awụ nịnị ọnịrị ezi ewu nịnị! 29Agụvị ka ẹkụhị aa vẹ, ana a vaa kà a ka: ‘Ọbọrị nịnị ệ da jẹ. Aza ẹnẹ ẹ̀ yị ma ozi da, ọnịrị aza ẹnẹ ẹ̀ yị kà ozi ịrẹva da, ệ da jẹ.’ 30#Iho 10.8; Ẹtẹ 6.16Ụmẹ ọnọọ, aza vaa kà a yị ataba ka: ‘Aarịhịnị, wú za yị! dị ẹ rẹ kà a yị ataba oweyi ka ọ̀ và kú ẹnị za ẹtẹ’ 31Ẹ̀ẹ maanị mẹ hi ọchị ohwoohu, u mè ro ka ẹ vaa mẹ ọchị ọyịwụ nịnị?”

32Ẹ rẹ za aza ẹnị ẹẹva ana vị oyi ka à na wụ̀ wa beri Ijeesu. 33E mè tù ịzị aā hị́ aha akokoro ịrẹsụ, dị ẹ kanyị ọọ za apavahị ịzọọ nị. Dị ẹ rẹ kanyị oyi ẹnẹẹ za apavahị tụ́ ịzọọ nị; ọnyara yà eyi ụvọrị anị, dị ọsa yà eyi ụvọha anị nị. 34#Ahẹ 22.18Dị Ijeesu ka, “Nda, vagu wa, agụvị ka ẹnịnị ẹ yị yẹ ịsị ẹyaa mẹ!” Dị aza ẹnẹẹ gà ịta Ijeesu nị, dị ẹyaa jị osisii tụ́ ọọ nị. 35#Ahẹ 22.7Dị aza jẹẹ, di eyee re Ijeesu nị. Dị ọdọvịdị ẹnịnị ê beri wa mẹ Ijeesu isiya ka, “Ọọ̄ dọ aza ẹnẹsaa há; àa vị ọnị ọ vị Ikirisiti ọnọọ oni Ohomorihi nyị nị, ọ̀ dọ ẹngụ anị há kẹ!” 36#Ahẹ 69.21Dị isoja nịnị ẹnị raa sị ọọ mẹ enyinyi nị. Dị ẹ sị eche ọsụrẹyị va yọ nị. 37Ệ kà a yọ ka, “Àa vị ẹwa vị ohinọyị Aniju nị, ụ dọ ẹngụ awụ há!” 38Dị ẹ chẹrẹ ịrẹyị ọnọnị tụ́ akẹbẹẹba nị ka, “Ohinọyị Aniju nịnị yị”.

39Dị ọnya ini oyi ana a kanyị za apavahị, ọnị raa kụ̀ Ijeesu ụhụ nị. Dị ọ ka, “Àa vị ẹwa vị Ikirisiti ọnọọ nị, dọ ẹngụ awụ há, dị ụ wa rẹ dọ ẹ yị há!” 40Ama dị ọsa tụ́ ohi, dị aa tụ́ ịịpaapa ohuvọ nị. Dị ọ ka, “Wẹ yị daba hí angwa Ohomorihi, ka â mẹ̀ ọkarẹyị ọnyọọnya yị ẹwụrị ọọ? 41Ọkarẹyị ẹyị ọnị ộ vọrọ, agụvị ka ụkọrọ ụvọ ayị, ị yaa rị ọgụ anị nị. Ama ẹ yị nyị ịsa odivi ọnị ọnọrụ ọnọnị mẹ.” 42Dị ọ kà a yị Ijeesu ka, “Ananyị yị, aarịhịnị tamayị amị, wàa va sị ngụ ịzị ụ yà aa mẹ ịjọva!” 43Dị Ijeesu kà a yọ ka, “Ịzẹyịza m maa kà a wụ nị, ajịnị ụ waa yà pe mi ịnị Aha Ọyịza nị.”

Íjeesu meme sú

(Imt 27.45-56; Ịmk 15.33-41; Ịjọ 19.28-30)

44 # Kụra 26.31-33 Ịnị ụmẹ agogo ẹwụrẹva, avaba ẹtẹ ọnọọ saka-saka ọ sị vara ịrahụ, pooro na ngụ ụmẹ agogo ẹẹta. 45Ọyị o si hozi, dị achị ọratụpọ ana a sị che irehi Ohomorihi, há hi ẹẹva nị. 46#Ahẹ 31.5Dị Ijeesu nowu tụ́ ẹba, dị ọ ka, “Nda, mâ sị ụhwẹ amị chire wu ụvọ.” Ịjị ọ maanị sị kà, dị ọ hụrẹ ụhwẹ anị ụvọ nị. 47Ọga isoja ẹchẹhị nịnị ô re ịsa ana mẹ, dị ọ sị ụga yị Ohomorihi nị, dị ọ ka, “Ịzẹyịza, ọnịrẹyịzẹyịza ọ́nọrụ ọnọnị vị nị.” 48Ịjị avaba aza ana vẹ ịzọọ ve re ẹtẹ, re ịsa ana mẹ, dị ọzọza sị ụvọ kú ịrẹsụ, dị ẹ varẹma aa nọ eehi nị. 49#Irk 8.2,3Dị avaba aza anị ọnịrị anyẹnẹẹ ana saasa a hụrẹ Igariri vẹ, jẹẹ ẹnẹẹnẹ, di eyee re ịsa ana aa mẹ nị.

A mẹmẹ sị oku Ijeesu tụ́ ịnị ụsị ịnị ịrẹta

(Imt 27.57-61; Ịmk 15.42-47; Ịjọ 19.38-42)

50Â nyị ọza ịnya aanị ana aā hị́ Ijosẹẹhụ, ọnyara ọ vị ịnị anikootu nịnị nị. Ọza ọyịza ọ vị, dị ọ rẹẹ̄ mẹ̀ ebira ana vọrọ nị. 51Ama ọ yị nyị ụvọ tụ́ ịnị ẹyọgẹ Aniju nịnị ọnịrị ịsị ẹ mẹ Ijeesu. Anẹkụra Aniju ọnya ana aā hị́ Arịmatịya ọ vị nị. Ọnị vị ene ree zí ụmẹ oni Ohomorihi vaa sị mẹ ịjọva. 52Dị ọnọrụ ọnọọ ne tù Ipayireti, dị ọ na dá ịpẹ ka à sị oku Ijeesu yị ọnị nị. 53Dị Ijosẹẹhụ ne chí oku Ijeesu hụụ ịrẹsụ apavahị, dị ọ sị ịta ọvụ, di o si chire e ikuma, dị ọ sị ọọ na tụ́ ịnị ụsị ana a vịdị chị tụ́ ịnị ịrẹta nị. Ọza ọọ̀ yị vịdị sị oku tụ́ ịnị ụsị ọnọọ da. 54Ịhị ọnọọ ọ vị ẹkụhị ene e sii tenyi ẹngụ nị, agụvị ka ẹkụhị ụhwọtụ ee vee tù.

55Dị anyẹnẹẹ ẹnẹ ẹnịrị Ijeesu zị hụrẹ Igariri vẹ, dụ Ijosẹẹhụ na, di e ne re, ọ mẹmẹ sị oku Ijeesu tụ́ ịnị ụsị nị. 56#Kụra 20.10; Ọda 5.14Dị ẹ varẹma nọ eehi, di e ne tenyi eturare beri ịsa oyisisi oku tịtẹ nị. Ịnị ẹkụhị ụhwọtụ, dị ẹ tụ́ ụhwọ́ nị, anka ọ́da Imosiisi mẹ̀ kà a.

انتخاب شده:

Iruuku 23: EBTP

های‌لایت

به اشتراک گذاشتن

کپی