GENESIS 28
28
1Tichuan, Isaaka chuan Jakoba chu a ko va, mal a sâwm a, thu a pe bawk a, a hnênah, “Kanaan ram nulaho zînga mi hi nupuiah i nei tûr a ni lo. 2Tho la, Paddan-aram rama i nu pa Bethuela inah kal la, chuta mi chu i nu nuṭa Labana fanute zînga mi nupuiah va nei rawh. 3Tin, Pathian Engkimtitheia chuan malsâwm chein, hnam hrang hrang tam tak i lo nih theih nân chi tam tak thlahtîr chein, tipung che rawh se; 4i mikhualna ram, Pathianin Abrahama a pêk hi, i luah nân Abrahama malsâwmna chu dawntîr bawk che rawh se, nang leh i thlahte pawh,” a ti a.#Gen 17.4-8 5Tichuan, Isaaka chuan Jakoba chu a kal botîr a; tin, Paddan-aram rama Jakoba leh Esauva nu Rebeki nuṭa Suria mi Bethuela fapa, Labana hnênah chuan a kal ta a.
Esauvan nupui dang a nei
6Esauva chuan Isaakan Jakoba chu mal a sâwm a, nupui nei tûrin Paddan-aram ramah a kal botîr tih leh, mal a sâwm laia, “Kanaan ram nulaho zînga mi hi nupuiah i nei tûr a ni lo,” tiin thu a pe tih leh, 7Jakoban a nu leh a pa thu awihin Paddan-aram ramah a kal ta tih a hria a; 8tichuan, Esauva chuan Kanaan ram nulate chuan a pa Isaaka lung an tiawi lo tih a hre ta a; 9tichuan, Esauva chu Ismaela hnênah a va kal a, Abrahama fapa Ismaela fanu Mahalathi, Nebaiotha farnu chu, a nupui atân a nupui neih sate bâkah a va neih belhchhah leh a.
Bethel-ah Jakoban mumang a nei
10Tin, Jakoba chu Beer-seba aṭangin a chhuak a, Haran khaw lam a pan ta a. 11Tin, khawi lai hmun emaw a han thleng hlauh va, ni a tlâk tawh avângin chutah chuan a riak ta a; tin, chumi hmuna lung pakhat chu a la a, a lukhamah a dah a, chumi hmunah chuan muhîl tûrin a mu ta a. 12Tin, mumang a nei a; ngai teh, lei chungah hian leilâwn a lo indawh a, a chhîp chuan vân a thleng a; tin, ngai teh, a chungah chuan Pathian vântirhkohte an chhovin an chhuk a.#Joh 1.51 13Tin, ngai teh, a chhîpah chuan Lalpa a ding a, “Kei hi Lalpa, i pu Abrahama Pathian leh Isaaka Pathian chu ka ni; i mutna lei kha nang leh i thlahte ka la pe ang che u.#Gen 13.14-15 14Tin, i thlahte chu leia vaivut zâtin an awm ang a, thlang lamah te, chhak lamah te, hmâr lamah te, chhim lamah te i darh zau vang a; tin, nangmahah leh i thlahah chuan khawvêla hnam tin an la thawveng ang.#Gen 12.3; 18.18; 22.18 15Tin, ngai teh, i hnênah ka awm a, i kalna apiangah ka vêng zêl ang chia, he ramah hian ka hruai kîr leh ang che; i hnêna ka sawi hi ka tih hma loh chuan ka thlahthlam dâwn lo che a ni,” a ti a.
16Tin, Jakoba chu a muhîl a han harh a, “He hmunah hian Lalpa chu a awm ngei mai, ka lo hre si lo va,” a ti a. 17Tichuan, a hlau va, “He hmun hi a va hlauhawm êm! Hei hi hmun dang a nih loh hi, Pathian in a lo nih hi le, hei hi vân kawngka a lo nih hi!” a ti a. 18Tin, Jakoba chu zîng takah a tho va, lung a lukhama a dah chu a la a, lungphun atân a phun a, a chhîpah chuan sahriak a leih a. 19Tin, chumi hmun hmingah chuan Bethel a vuah a; a khaw hming erawh chu a tîrah chuan Luz a ni. 20-21Tin, Jakoba chuan, “Ka pa ina thlamuang taka ka hâwn lehna tûrin Pathian ka hnêna a awma, he ka kalna kawngah hian mi vêna, ei tûr chhang leh sin tûr silhfên mi pêk dâwn chuan, Lalpa chu ka Pathian a ni ang a, 22he lung, lungphun atâna ka phun pawh hi Pathian in a ni ang; tin, i mi pêk tûr zawng zawngah chuan sâwma pakhat ka pe ngei ngei ang che,” tiin thu a tiam ta a.
اکنون انتخاب شده:
GENESIS 28: MIZOVBSI
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Mizo OV - Re-edited Bible
© The Bible Society of India, 2017.
Used by permission. All rights reserved worldwide.