GENESIS 16
16
Hagari leh Ismaela
1Tin, Abrama nupui Saraii chuan fa rêng rêng a hrinsak lo va; tin, Saraii chuan Aigupta mi bâwihnu pakhat a nei a, chu mi hming chu Hagari a ni a. 2Tin, Saraii chuan Abrama hnênah, “Ngai teh khai, Lalpan fa mi neihtîr phal loh hi; khawngaih takin ka bâwihnu hi pâwl rawh; ama lakah chuan fate ka nei mahna,” a ti a. Tichuan, Abrama chuan Saraii thu chu a zâwm ta a. 3Tichuan, Abrama nupui Saraii chuan, Abrama chu Kanaan rama kum sâwm a awm hnu chuan, a bâwihnu Aigupta mi Hagari chu a hruai a, a pasal Abrama hnênah chuan a nupuia awm tûrin a pe a. 4Tin, Hagari chu a lo pâwl a; tin, ani chu a rai ta a. Tin, a rai tih a inhriat veleh a pi chu a hmusit ta mai a.
5Tichuan, Saraii chuan Abrama hnênah, “Ka thil tuar hi nangin a mawh phur rawh! Ka bâwihnu chu i pawm atân ka pe chia; tin, a rai tih a inhriat veleh mi hmusit ta mai a. Lalpa chuan nang leh keia thu hi ngaihtuah rawh se,” a ti a: 6Abrama erawh chuan Saraii hnênah, “Ngai teh, i bâwihnu chu i kuta awm alâwm; i remtih ang apiang chu a chungah ti ta che,” a ti a. Tichuan, Saraii chuan a tirethei ta hle a; chuvângin, a tlân bosan ta a. 7Tin, Lalpa vântirhkoh chuan thlalêrah tuikhur kiangah, Sur panna kawnga tuikhur kiangah chuan a lo hmu a. 8Tin, a hnênah, “Hagar, Saraii bâwihnu, khawi aṭangin nge i lo kala, khawiah nge i kal dâwn?” a ti a. Tin, ani chuan, “Ka pi Saraii hnên ata ka tlân bo a ni,” a ti a.
9Tin, Lalpa vântirhkoh chuan a hnênah, “I pi hnênah kîr leh la, a thû thûin awm rawh,” a ti a. 10Tin, Lalpa vântirhkoh vêk chuan a hnênah, “I thlahte chu chhiar sên loh khawp hiala tamin ka la tipung ang,” a ti leh a. 11Tin, Lalpa vântirhkoh vêk chuan a hnênah, “Ngai teh, nau i pai ta a, fapa i hring ang a; Lalpa chuan i hrehawmzia hi a hriat tâk avâng hian a hmingah chuan Ismaela i sa tûr a ni. 12Ani chu mihring zînga ram sabengtung ang a ni ang; ani chuan mi tin a do vang a, mi tinin ani pawh an do bawk ang; a unau zawng zawng depah a awm bawk ang,” a ti leh pek a. 13Tin, Hagari chuan amah betu Lalpa hming chu, “Nang hi hmutheitu Pathian i ni,” tiin a vuah a, “Hetah ngei hian mi hmutu chu ka en zui zêl em ni aw?” a ti a ni. 14Chumi avâng chuan tuichhunchhuah chu “Beer-lahai-roi” vuah a ni ta a; ngai teh, Kadesh leh Bered khaw inkârah a awm. 15Tin, Hagari chuan Abrama chu fapa a hrinsak a; tin, Abrama chuan a fapa Hagari hrin chu a hmingah Ismaela a sa ta a.#Gal 4.22 16Tin, Hagarin Abrama tân Ismaela a hrin lai chuan Abrama chu kum sawmriat leh kum ruk mi a ni a.
اکنون انتخاب شده:
GENESIS 16: MIZOVBSI
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Mizo OV - Re-edited Bible
© The Bible Society of India, 2017.
Used by permission. All rights reserved worldwide.