PIENCILNA 1
1
Siemcilna Niguh Sung le Sabbath
(Pien 2:4-9; Job 38:4-11; Jon 1:1-5)
1A kipat cilin Pasien in vantung le leitung a siem#1:1 Ahi sihle “Pasien in siem ding a kipat ciengin” ahi sihle “A kipat cilin Pasien in a siem hi” hi, 2leitung in limlemel nei loin a hawmpi ahi a, tuaci’n khuomiel in tuipi thuh tung teng khucipin tui tungah Pasien’ Hlagau#1:2 “Pasien’ hlagau” ahi sihle “a thahat hui” a gamta hi. 3Tua ciengin Pasien in, “Khuovah om heh,” ci hi; tuale khuovah om pai hi.#2Cor 4:6 4Pasien in tua khuovah hoi a sa hi; tuale Pasien in khuovah le khuomiel a khenkhie hi. 5Pasien in tua khuovah “Sun” ci a, khuomiel “Zan” ci hi. Tuale nitah le zingmawng om a, a ni khatna ahi hi.
6Pasien in, “Tui le tui kikalah vanthamzawl khat om hinlen tui le tui khen heh,” a ci hi. 7Tuaci’n Pasien in vanthamzawl bawlin vanthamzawl tunga tuite le vanthamzawl nei-a tuite a khenkhie hi. Tua ma bangin a om pai hi. 8Pasien in vanthamzawl pen “Van” ci hi. Tuale nitah le zingmawng om a, a ni nina ahi hi.#2Pet 3:5
9Pasien in, “Van nei-a om tuite mun khatah kikhawm hinlen, leigaw kidawh heh,” a ci hi. A ci bangin a pieng pai hi. 10Pasien in leigaw pen “Lei” ci a, tui kikhawmtuote pen “Tuipi” ci hi. Pasien in tua khu hoi a sa hi. 11Tua ciengin Pasien in, “Leitang in singkung lopate posah hinlen, a tang nei singkungte, a ga sunga a tang om singga kungte, amau’ nam cietin leitungah po heh,” a ci hi. Tua ma bangin a pieng pai hi. 12Leitang in singkung lopate amau’ nam ciet tawh kizui-in, khaici a nei lopate le amau’ nam ciet tawh kizui-in a sunga tang a nei a ga singkungte piengsah hi. Tua khu Pasien in hoi a sa hi. 13Tuale nitah le zingmawng om a, a ni thumna ahi hi.
14Pasien in, “Sun le zan a khen dingin vanthamzawl ah khuovahte om heh; tuate khu khuohunte, nite le kumte ciemte nading hi hinlen, 15leitung a tanvah dingin vanthamzawl ah khuovah hi uheh,” a ci hi. A ci bangin a om pai hi. 16Pasien in khuovah gol ni bawl a, khuovah a golzaw pen sun a uh ding, khuovah a neuzaw pen zan a uh dingin bawl a, aasite zong a bawl hi. 17Leitung a tanvah ding, 18sun le zan tunga thunei ding, le khuovah le khuomiel a khen dingin Pasien in vanthamzawl ah tuate a koi hi. Pasien in tua khu hoi a sa hi. 19Tua ciengin nitah le zingmawng om a, a ni lina ahi hi.
20Tuale Pasien in, “Tuite in hinna nei ganhing honpite piengsah hinlen, leitung vanthamzawl ah vate leng uheh,” a ci hi. 21Tuaci’n Pasien in tuipi ganhing golpite le hinna a nei a pia thei ganhing namcin le a leng thei va namcin amau’ namcietin a piengsah hi. Tua khu Pasien in hoi a sa hi. 22Pasien in amate thupha pie a, “Cipha-in pungin tuipi sung dim unlen, leitungah vate pung uheh,” a ci hi. 23Tuale nitah le zingmawng om a, a ni ngana ahi hi.
24Pasien in, “Leitung in amau’ nam cietin hinna nei ganhingte piengsah heh. Amau’ nam cietin innsate, a bawhva ganhingte le gamsate pieng uheh,” a ci hi. Tua ma bangin pieng pai hi. 25Pasien in gamsa, innsa le a bawhva ganhing zosie amau’ nam cietin a piengsah a, tua khu Pasien in hoi a sa hi.
26Tua ciengin Pasien in, “Eima’ lim, eima’ mel sunin mihing#1:26 Heb “adam” siem vai; amate in tuipi sunga ngate, vantunga vate, innsa, gamsa zosie, le leitunga#1:26 Syr: Heb “le leitung buppi ah” a bawhvate zosie tungah thu neisah vai,” ci hi.#1Cor 11:7
27Tuaci’n Pasien in ama’ lim sunin
mihing#1:27 Heb “adam” siem a,
ama in Pasien’ lim bangin
amate#1:27 Heb “ama” a siem hi.
Ama in pasal le numei a siem hi.#Mat 19:4; Mrk 10:6
28Pasien in ama gel thupha pie a, Pasien in ama gel kungah, “Cipha-in pung unlen leitung luodimin zo un; tuipi sunga ngate, vana leng vate, le leitunga gamta hinna nei zosie tungah thu nei un,” a ci hi.#Pien 5:1-2 29Pasien in, “En un, na tung vuah leitung maitang cin tenga om, a tang nei kungno zosie le a ga sunga a tang nei singkung zosie kang pie zo hi; note in an-in tuate na nei ding uhi. 30Tuale leitung ganhing zosie, vana va zosie, leitunga a bawhva zosie, hinna hu a nei zosiete tungah an dingin kunghing zosie kang pie zo hi,” a ci hi. Tua ma bangin a pieng pai hi. 31Pasien in a siemsa na vannuoi en a, hoi a sa mama hi. Tuale nitah le zingmawng om a, a ni guhna ahi hi.
اکنون انتخاب شده:
PIENCILNA 1: ZBOTF01
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Zo Bible © Bible Society of Myanmar, 2018.