Jénesii̱s 2
2
Bi̱ kamá ni̱xtjin xi ma yito nga kamánda nga̱sondiee̱
1-3Kó bo̱a̱ tsꞌén kamándo̱jo̱ó Néná
nga katsꞌénda nkꞌaján ko̱jo nga̱sondiee̱,
ko̱jo ngayeje ni xi tjiín.
Kó ni̱xtjin xi ma yitoo̱ katsꞌénkjaꞌyá.
Kó Néná katsꞌénchikonñé kui ni̱xtjii̱n,
kó ni̱xtjin ndikón katsꞌén,
tsi̱ꞌe̱ nga kui ni̱xtjii̱n nga si̱ꞌandikón kuí.
Bi̱ tsꞌén katsꞌénda Néná Andaa̱n ko̱jo na̱ Ebaa̱
4Bi̱ tsꞌén kjindiboáni nga katsꞌénda Néná nkꞌaján ko̱jo nga̱sondiee̱.
Kui ni̱xtjinján, 5kji̱e̱ jmí yájín nga̱sondiee̱ ko̱jo kji̱e̱ jmí kꞌijñájín, ngatꞌa̱ Néná kji̱e̱ jmí stsé tsꞌenkáꞌájín, ti̱ nde kji̱e̱ jmí xota̱jín xi sa̱ꞌínxájin tꞌananguii̱. 6Ngu̱i̱jin ńdiee̱ jatjoni ngo xoño xi asíndaá nga̱són tꞌananguii̱. 7Kó Néná iskjíbé chií chojo, kó kui nii̱ xi katsꞌéndani ngo nda̱, kó askjonomójón ṉtjo̱n nga katsjaá kjo̱a̱mindyion, kó bo̱a̱ tsꞌén nga ngo xota̱ xi tikón kamá nguijee̱.
8Kó Néná ítji̱e̱ ni tjié ngo ngu̱i̱ndie xi ꞌmí Ende̱n, kó ki̱a̱ katsꞌénkꞌíjñá kui nda̱a̱. 9Sꞌe̱ jaskan Néná katsꞌéntjo tꞌananguii̱ ngayeje to̱ko̱ya yá, achichí tsjákón kamá kui yaá, kó tsajaá to xi nda chinie. Ngamasiee̱n kui ngu̱i̱ndiee̱ kisꞌijña ngo yá xí tsjá kjo̱a̱mindyion, ko̱jo ngo yá xí tsjá kjo̱a̱kjíntakón kjo̱a̱a̱ ni xi ndaa̱ ko̱jo ni xi ndajiín.
10Kó ki̱a̱ Endee̱n jatjo ngo ndejé xi bosíndaá ngu̱i̱ndie nínga tjitji̱e̱ kui yaá, kó ki̱a̱ boaꞌanii̱ nga nijón tjín má kui ndejeé. 11Ndejé xi tjoón kuí xí ꞌmí Piso̱n, kó kuí bí xi jaꞌatjiyajoo̱n ngayeje nangui Abila̱, nínga tjín to̱nsinié, 12kó achichí nda to̱nsinié xi tjín kuí ngu̱i̱ndiee̱, ti̱ tjín ndi̱jo̱ tsjakon xi ꞌmí ónise̱ ko̱jo xka̱ bedelio̱ kui xi niꞌándani ndásíje̱n nga. 13Ndejé xi ma joó kuí xí ꞌmí Nguijo̱n, kó kuí boá xi foaꞌatjiyajoo̱n ngayeje nangui Etiopía̱. 14Ndejé xi ma jaán kuí xí ꞌmí Tingri̱, kó kuí boá xi foaꞌa nangui Asiria̱. Ndejé xi ma nijoón kuí xí ꞌmí ndejé Éufratee̱.
15Kó Néná katsꞌénkꞌíjñá kui nda̱a̱ ki̱a̱ ngu̱i̱ndie nínga tjitji̱e̱ ni tjieé, ki̱a̱ nínga ꞌmí Endee̱n, tsi̱ꞌe̱ nga ki̱a̱ sa̱ꞌínxá, kó skoón kui ngu̱i̱ndiee̱, 16ta̱nga Néná, bi̱ katsó cha̱n cha̱a̱n kui nda̱a̱ nga atíxomaa̱: «Ka̱ma xi̱ni̱ ji ngayeje too̱ yá xi tjín kuí ngu̱i̱ndiee̱, 17ta̱nga ka̱májín xi̱ni̱ ji to xi tsjá yaá kjo̱a̱kjíntakoón ni xi ndaa̱ ko̱jo ni xi ndajiín, ngatꞌa̱ ni̱xtjin nga xi̱ni̱ ji too̱ kui yaá, ja̱koxi̱ boá nga ko̱ye jí ki».
18Sꞌe̱ jaskan bi̱ katsó Néná: «Ndajínkjiꞌi nga kꞌuijñá soboá nda̱ xi̱ꞌii̱n. Ta̱sá sa̱ꞌindáa̱ ngo xi ka̱maa̱ nga nda ko̱síko̱jo nga nijan ka̱ma». 19-20Néná katsꞌénda ngayeje cho̱ xi tjín ngu̱i̱jin kꞌijñaá, ko̱jo ngayeje ni̱sie xi ꞌbímatji̱e̱n nkꞌaján, kó ki̱a̱ kijíjoo̱ kui nda̱a̱ tsi̱ꞌe̱ nga ku̱i̱ꞌítꞌa jaꞌén, kó Andaa̱n ítꞌa jaꞌén ngayeje kui cho̱o̱. Ta̱nga nde ngojín xi kasakoo̱ xi ka̱maa̱ nga nda ko̱síko̱jo nga nijan ka̱ma, 21kuíni nga Néná katsꞌénkáfé tjen Andaa̱n, kó tji̱e̱nga kjiꞌifé, Néná tsꞌaxié ngo ńdanisee̱n kósꞌe̱ íchjá nguiní yojoo̱. 22Kó Néná kui ńdanise̱n xi jaꞌáxiín nda̱a̱, katsꞌéndani ngo na̱, kósꞌe̱ kijíjoo̱ nda̱ xi̱ꞌii̱n, 23kó bi̱ katsó Andaa̱n:
«Kuí bí xi̱ꞌbi̱ xi yojona ko̱jo xi ńdana jatjojinni,
kuí bí xi na̱ kꞌuin,
ngatꞌa̱ Néná ngu̱i̱jin yojoo̱ nda̱ xi̱ꞌii̱n tsꞌaxiéjinni».
24Kuí nii̱ xi bokó míkjo̱a̱a̱ nga nda̱ xi̱ꞌii̱n ꞌbijñá na̱ꞌmii̱ ko̱jo na̱aa̱n, kó ꞌbíjñajo̱ chjo̱ón, kó nga joó nga ta̱ ngo tsi yojo ma nguijee̱.
25Kó Andaa̱n ko̱jo chjo̱ón kisꞌiṉtso̱ma kjiꞌixtí, ta̱nga soboájín kamaá.
اکنون انتخاب شده:
Jénesii̱s 2: MAIX
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014